នៅក្នុងជំនួបជាមួយប្រធានាធិបតីអ៊ុយក្រែន លោក វូឡូឌីមៀ ហ្ស៊ើឡិនស្គី (Volodymyr Zelenskiy) ប្រធានធនាគារពិភពលោក លោក ដេវីដ ម៉ាលផាស (David Malpass) បាននិយាយថា ធនាគារពិភពលោកនឹងបន្តគាំទ្រប្រជាជនអ៊ុយក្រែន និងសេដ្ឋកិច្ចរបស់ប្រទេសនេះ សម្រាប់តម្រូវការហិរញ្ញវត្ថុរយៈពេលខ្លី និងរយៈពេលវែង។
ក្នុងសេចក្តីថ្លែងការណ៍របស់ថណាគារពិភពលោកបានឱ្យដឹងទៀតថា មូលនិធិដំបូងពីធនាគារពិភពលោកនឹងត្រូវបន្តដោយជំនួយថវិកាបន្ថែមទៀត និងកំណែទម្រង់ជាច្រើនទៀត ក្នុងនោះរួមទាំង វិស័យថាមពល និងអាកាសធាតុ។ ក្រៅតែពីនេះ លោក ម៉ាលផាស និងលោក ហ្ស៊ើឡិនស្គី ក៏បានពិភាក្សាអំពីគម្រោងបំពង់បង្ហូរប្រេងសម្រាប់អ៊ុយក្រែន រួមទាំងប្រសិទ្ធភាពថាមពល ហេដ្ឋារចនាសម្ព័ន្ធ ផ្លូវដែក និងការពង្រឹងសេដ្ឋកិច្ច ក៏ដូចជាឱកាសការងារនៅភាគខាងកើតអ៊ុយក្រែនផងដែរ។
អត្ថបទគួរអាន
គួរជម្រាបថា ថ្នាក់ដឹកនាំទាំងពីនោះបានជួបប្រជុំគ្នានៅទីក្រុងមុយនិច ស្របពេលដែលកងកម្លាំងនុយក្លេអ៊ែរយុទ្ធសាស្ត្ររបស់រុស្ស៊ីបានធ្វើសមយុទ្ធនៅតាមបណ្ដោយព្រំដែនរុស្ស៊ី-អ៊ុយក្រែន ហើយការធ្វើសមយុទ្ធនេះត្រូវបានក្រុងវ៉ាស៊ីនតោនចោទប្រកាន់ទាហានរុស្ស៊ីថា "ពួកគេត្រៀមខ្លួនធ្វើការវាយប្រហារលើអ៊ុយក្រែន" ។
យ៉ាងណាមិញ ទោះបីជាមានការផ្តល់ប្រាក់កម្ចីពីធនាគារពិភពលោក និងអង្គការមូលនិធិរូបិយវត្ថុអន្តរជាតិ ក្នុងការជួយដល់ការបង្កើតការងារ និងការគាំទ្រសកម្មភាពសេដ្ឋកិច្ចនានាសម្រាប់ប្រទេសអ៊ុយក្រែនក្ដី ប៉ុន្ដែកាលពីថ្ងៃច័ន្ទសប្ដាហ៍មុននេះ ទាំងធនាគារពិភពលោក និងមូលនិធិរូបិយវត្ថុអន្តរជាតិបានផ្លាស់បុគ្គលិកមួយចំនួនចេញពីប្រទេសអ៊ុយក្រែនជាបណ្តោះអាសន្នហើយ ក្រោយមានការកើនឡើងនៃក្តីបារម្ភអំពីការលុកលុយរបស់រុស្ស៊ីមកលើអ៊ុយក្រែន។
សូមរំឭកថា ក្នុងរយៈពេលមួយឆ្នាំចុងក្រោយនេះ ធនាគារពិភពលោកបានផ្អាកប្រតិបត្តិការផ្ដល់ប្រាក់កម្ចីដល់ប្រទេសជាច្រើនដែលបានធ្វើរដ្ឋប្រហារ រួមមានមីយ៉ាន់ម៉ា និងស៊ូដង់ផងដែរ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
