តំណាងរោងចក្រ និង មន្ត្រីក្រសួងការងារបានអះអាងថា ការជំរុញការធ្វើតេស្ដរហ័សរកកូវីដ១៩ ដល់កម្មករនិយោជិតរោងចក្រសហគ្រាសនេះ មិនត្រឹមតែជាការជួយទប់ស្កាត់កូវីដ១៩ ស្របតាមវិធានការរបស់រាជរដ្ឋាភិបាលកម្ពុជាប៉ុណ្ណោះទេ ប៉ុន្ដែវា នឹងជួយធ្វើឲ្យផលិតកម្មនៅក្នុងវិស័យរោងចក្រសហគ្រាសនឹងកាន់តែប្រសើរឡើងផងដែរ។
យោងតាមការសេចក្ដីណែនាំមួយរបស់ក្រសួងការងារ និងបណ្ដុះបណ្ដាលជីវៈ នៅថ្ងៃទី១៨ ខែសីហា ការដាក់ចេញនូវវិធានការធ្វើតេស្ដរហ័សជូនដល់កម្មករនិយោជិតនេះ គឺស្របពេលជាមួយកម្ពុជា កំពុងជួបបញ្ហាឆ្លងរាលដាលនៃវីរុសបម្លែងថ្មីកូវីដ-១៩ ប្រភេទដែលតា (Delta)។ ដើម្បីទប់ស្កាត់ការឆ្លងរាលដាលនេះ ឯកឧត្តម អ៊ិត សំហេង រដ្ឋមន្ត្រីក្រសួងការងារ បានណែនាំគ្រប់ម្ចាស់ ឬនាយករោងចក្រ សហគ្រាស ត្រូវរៀបចំធ្វើតេស្តរហ័សកូវីដ-១៩ ដល់កម្មករទាំងអស់ឱ្យបាន ២ដងយ៉ាងតិចមុន ថ្ងៃទី១០ ខែកញ្ញា ខាងមុខនេះ។
បន្ថែមពីនេះ ក្រសួងក៏បានណែនាំឱ្យម្ចាស់ ឬនាយករោងចក្រ សហគ្រាស បញ្ជាទិញឧបករណ៍តេស្តរហ័សរកអង់ទីហ្សែនកូវីដ-១៩ ក្នុងតម្លៃដើមតាមក្រសួងប្រៃសណីយ៍ និងទូរគមនាគមន៍។ ចំពោះករណីរកឃើញកម្មករនិយោជិតណាមួយមានវិជ្ជមានកូវីដ-១៩ តាមរយៈការធ្វើតេស្តរហ័សនេះ ឬមានអាការៈសង្ស័យ រោងចក្រ សហគ្រាស ត្រូវរាយការណ៍បន្ទាន់ទៅក្រសួងសុខាភិបាល។
អត្ថបទគួរអាន
បើតាមឯកឧត្តម ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ប្រាប់សារព័ត៌មានខេមបូណូមីសថា នេះជាវិធានការចាំបាច់របស់ក្រសួងសុខាភិបាល ដើម្បីទប់ស្កាត់ ការឆ្លងរាលដាលនៃវីរុសបម្លែងថ្មី ប្រភេទដែលតា(Delta) ក៏ដូចជា រក្សាសុវត្ថិភាពជូនកម្មករ-កម្មាការិនី គ្រប់ៗរូប។
ជាមួយគ្នានេះដែឬ លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរ កម្ពុជា រំពឹងថា វិធានការរបស់ក្រសួងសុខាភិបាល និងការណែនាំរបស់ក្រសួងការងារ នឹងចូលរួមកាត់បន្ថយ ការឆ្លងរាលដាលនៃជំងឺកូវីដ-១៩ យ៉ាងមានប្រសិទ្ធភាព។ លោក កាំង ម៉ូនីកា យល់ថា វិធានការនេះ មិនត្រឹមតែជួយទប់ស្កាត់ការឆ្លងរាលដាលនៃជំងឺកូវីដ-១៩ ប៉ុណ្ណោះទេ ប៉ន្ដែវាក៏ធ្វើឱ្យដំណើរផលិតកម្ម ក្នុងវិស័យកាត់ដេរ និងវាយភ័ណ្ឌ កាន់តែប្រសើរផងដែរ។
បើតាមលោក កាំង ម៉ូនីកា ដ្បិតថា ជំងឺកូវីដ-១៩ នៅបន្តអូសបន្លាយ និងមានមេរោគបម្លែងថ្មី ប្រភេទដែលតា ចូលមកកម្ពុជា តែរយៈពេលចុងក្រោយនេះ វិស័យកាត់ដេរ និងវាយភ័ណ្ឌ នៅតែអាចបន្តជាធម្មតា និងកាន់តែមានសភាពវិលមករកធម្មតាឡើងវិញជាបណ្ដើរៗហើយដែរ៕
អត្ថបទ៖ ខន ណារី
None
