រាជរដ្ឋាភិបាលមានគោលដៅដាក់ឱ្យអនុវត្តការទទួលយកក្រដាសប្រាក់ដុល្លារទក់ រហែក ឬប្រឡាក់ទូទាំងប្រទេស

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជានាថ្ងៃទី២ ខែសីហា ឆ្នាំ២០២៤នេះ បានអរគុណដល់បណ្តាធនាគារ អាជីវករ អ្នកប្ដូរប្រាក់ ក៏ដូចជាប្រជាពលរដ្ឋនៅក្នុងខេត្តសៀមរាបទាំងអស់ ដែលបានចូលរួមអនុវត្តនូវគោលការណ៍ថ្មីរបស់ធនាគារជាតិនៃកម្ពុជា ពាក់ព័ន្ធនឹងការប្រើប្រាស់ក្រដាសប្រាក់ដុល្លារ ដែលមានសភាពចាស់ ទក់ ឬរហែក។

ជាមួយគ្នានេះ សម្តេចធិបតី ក៏បានឆ្លើយបតនឹងសំណួររបស់បងប្អូនប្រជាពលរដ្ឋ ដែលបានចោទសួរថា ហេតុអ្វីបានជាធនាគារជាតិមិនដាក់ឱ្យអនុវត្តនៅទូទាំងប្រទេសតែម្ដងនោះ សម្តេចធិបតី បានបញ្ជាក់ថា គឺដោយសារការទទួលយកក្រដាសប្រាក់ដុល្លារហែក ឬចាស់ដែលមិនអាចប្រើប្រាស់បាន ដើម្បីយកទៅដូរយកក្រដាសប្រាក់ថ្មីពីធនាគារកណ្តាលសហរដ្ឋអាម៉េរិក ជាកាតព្វកិច្ចរបស់ធនាគារជាតិនៃកម្ពុជាដែលត្រូវការចំណាយថវិកាច្រើន មិនតែប៉ុណ្ណោះ ការដាក់ឱ្យអនុវត្តនូវគោលការណ៍ថ្មីនេះ ក៏ត្រូវធ្វើឡើងដោយការប្រុងប្រយ័ត្ន និងជាជំហានផងដែរ។ ហេតុដូច្នេះ សម្តេចធិបតី អះអាងថា ការដាក់ឱ្យអនុវត្តចំពោះតែនៅខេត្តសៀមរាបនេះ គឺជាជំហានសាកល្បង ដើម្បីឱ្យធនាគារជាតិអាចវាយតម្លៃ និងយកជាមូលដ្ឋានសម្រាប់រៀបចំផែនការឱ្យបានជាក់លាក់ មុននឹងប្រកាសដាក់ឱ្យអនុវត្តគោលការណ៍ថ្មីនេះនៅទូទាំងប្រទេសក្នុងពេលឆាប់ៗខាងមុខ។

សូមសម្រាបថា កាលពីពេលថ្មីៗធនាគារជាតិនៃកម្ពុជា បានដាក់ចេញយន្តការបន្ទាន់ ដោយអនុញ្ញាតឱ្យប្រជាពលរដ្ឋ ឬភ្ញៀវទេសចរអាចយកក្រដាសប្រាក់ដុល្លារអាម៉េរិកចាស់ៗ ឬប្រឡាក់ទៅដូរនៅគ្រប់សាខាធនាគារពាណិជ្ជក្នុងខេត្តសៀមរាប ដោយគ្មានកាត់ទឹកនោះទេ ដើម្បីជួយសម្រួលដល់ការចរាចរក្រដាសប្រាស់ដុល្លារអាម៉េរិក ដែលមានសភាពចាស់ ឬប្រឡាក់ ក៏ដូចជាដើម្បីជួយសម្រួលដល់ការចាយវាយរបស់ភ្ញៀវទេសចរនៅក្នុងខេត្តសៀមរាបផងដែរ៕

អត្ថបទ សោម ស្រីពេជ្រ និងរូបភាពឯកសារ