ទីផ្សារជ្រូកខ្វៃឆ្នាំនេះហាក់កាក់កបជាងឆ្នាំមុន ខណៈតម្លៃមានការកើនឡើងបន្តិច

ពាក់ព័ន្ធតម្លៃជ្រូកខ្វៃវិញ ក្រុមអាជីវករលក់អះអាងថា តម្លៃជ្រូកខ្វៃឆ្នាំនេះមានការឡើងតិចតួចបើធៀបនឹងឆ្នាំមុន ដោយសារតម្លៃជ្រូករស់មានការកើនឡើង។

យ៉ាងណាក៏ដោយ បើតាមការលើកឡើងរបស់លោក លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា តម្លៃជ្រូករស់នៅក្នុងឱកាសបុណ្យចូលឆ្នាំចិនឆ្នាំនេះពុំមានការឡើងថ្លៃនោះទេ។ កត្តាដែលធ្វើឱ្យតម្លៃជ្រូកនៅឆ្នាំនេះមិនមានការឡើងថ្លៃ ត្រូវបានអ្នកជំនាញរូបនេះវាយតម្លៃថា គឺអាចបណ្តាលមកពីជ្រូកចាលនៅក្នុងទ្រុងច្រើនពេក គួបផ្សំសាច់បង្កកនៅតែចរាចរណ៍លើទីផ្សារ។

បើតាមប្រធានសាមគមអ្នកចិញ្ចឹមសត្វកម្ពុជារូបនេះ ជ្រូករស់បច្ចុប្បន្នអាចលក់បានចម្លោះពី៨ពាន់រៀល ទៅ៨ពាន់៣រយរៀលក្នុង១គីឡូក្រាម វាអាស្រ័យលើតំបន់មានតម្រូវការសាច់ជ្រូកតិច ឬច្រើន ដែលតម្លៃនេះវាហាក់ផ្ទុយពីអ្វីលោករំពឹងទុក ដែលរំពឹងអាចហក់ដល់១ម៉ឺនរៀលក្នុងមួយគីឡូក្រាម៕

អត្ថបទ៖ បូ ដូឡា