Maung Waik គឺជាមហាសេដ្ឋីរកស៊ីខាងសំណង់ដែលមានទំនាក់ទំនងជាមួយនឹងមេដឹកនាំយោធា ។ ការចោទប្រកាន់របស់មហាសេដ្ឋីរូបនេះ អាចនឹងបើកផ្លូវឲ្យរបបយោធាធ្វើការចោទប្រកាន់ធ្ងន់ធ្ងរថែមទៀតទៅលើរូបលោកស្រី អ៊ុង សានស៊ូជី ដែលត្រូវបានរបបយោធាចាប់ខ្លួនតាំងពីថ្ងៃទី១ ខែកុម្ភៈមក នៅខណៈដែលកងកម្លាំងប្រដាប់អាវុធរបស់របបយោធាបង្កើនការប្រើប្រាស់កម្លាំងបាញ់សម្លាប់ទៅលើក្រុមអ្នកតវ៉ា ។
កន្លងមក របបយោធាបានព្យាយាមដាក់ទោសកំហុសលើរូបលោកស្រី អ៊ុង សានស៊ូជី ពីបទប្រព្រឹត្តអំពើពុករលួយ ដោយចោទថា លោកស្រីបានទទួលសំណូកជាលុយ ៦សែនដុល្លារ រួមទាំងដុំមាស ពីសំណាក់សម្ព័ន្ធមិត្រនយោបាយរបស់លោកស្រី ហើយលោកស្រីនិងប្រធានាធិបតីដែលគេទម្លាក់ពីតំណែង គឺលោក វិន មីយិន (Win Myint) ត្រូវបានគេចោទប្រកាន់ពីបទញុះញង់ឲ្យកើតចលាចល កាន់កាប់វិទ្យុទាក់ទងដោយខុសច្បាប់ និងរំលោភបទបញ្ជារឹតត្បិតការជួបជុំគ្នាក្នុងអំឡុងពេលមានជំងឺឆ្លងរាតត្បាត ។
អត្ថបទទាក់ទង
ប៉ុន្តែ មេធាវីរបស់លោកស្រី អ៊ុង សានស៊ូជី បានច្រានចោលការចោទប្រកាន់បទពុករលួយទាំងនេះ ដោយនិយាយថា គ្មានភ័ស្តុតាង ។
មហាសេដ្ឋី Maung Waik ដែលបានចោទប្រកាន់លោកស្រី អ៊ុង សានស៊ូជី គឺធ្លាប់ត្រូវបានផ្ដន្ទាទោសពីបទជួញដូរគ្រឿងញៀន ។
មហាសេដ្ឋីរូបនេះបានប្រាប់ទូរទស្សន៍រដ្ឋថា លោកបានឲ្យលុយសុទ្ធទៅរដ្ឋមន្ត្រីរដ្ឋាភិបាល ដើម្បីឲ្យជួយអាជីវកម្មរបស់លោក ហើយលោកបាននិយាយថា លុយទាំងនោះរួមមាន ១សែនដុល្លារ ឲ្យទៅលោកស្រី អ៊ុង សានស៊ូជី កាលពីឆ្នាំ២០១៨ សម្រាប់មូលនិធិសប្បុរសធម៌មួយ ដែលដាក់ឈ្មោះម្ដាយរបស់លោកស្រី ។ មហាសេដ្ឋីដដែលបានបន្តថា ឆ្នាំ២០១៩ លោកបានឲ្យលុយទៅ លោកស្រី អ៊ុង សានស៊ូជី ម្ដងទៀត ចំនួន ១សែន ៥ម៉ឺនដុល្លារ និងចុងក្រោយ គឺខែកុម្ភៈ ឆ្នាំមុន ឲ្យ ៥ម៉ឺនដុល្លារ និងខែមេសា ឆ្នាំមុន ឲ្យ ២សែន ៥ម៉ឺនដុល្លារ ប៉ុន្តែ មិនបានបញ្ជាក់ថា ការឲ្យលុយទាំងនេះដើម្បីហេតុផលអ្វីនោះឡើយ ៕
