តុលាការអង់គ្លេស បង្កកទ្រព្យសម្បត្តិក្រុមហ៊ុន Vietjet ជុំវិញបំណុលជួលយន្តហោះជាង២៥០លានដុល្លារ

តុលាការជាន់ខ្ពស់នៃប្រទេសអង់គ្លេស និងវែលស៍ (Wales) កាលពីថ្ងៃទី១៥ ខែតុលា ឆ្នាំ២០២៦ បានចេញដីការបង្កកទ្រព្យសម្បត្តិរបស់ក្រុមហ៊ុនអាកាសចរណ៍ Vietjet បន្ទាប់ពីមានជម្លោះផ្លូវច្បាប់អូសបន្លាយពេលជាច្រើនឆ្នាំពាក់ព័ន្ធនឹងកិច្ចសន្យាជួលយន្តហោះ Airbus A321 ចំនួន៤គ្រឿង ដែលត្រូវបានប្រគល់ឱ្យក្រុមហ៊ុននេះក្នុងឆ្នាំ២០១៨ និង២០១៩។

ក្រុមហ៊ុន Vietjet បានខកខានបង់ថ្លៃជួលយន្តហោះមួយចំនួនអំឡុងវិបត្តិកូវីដ-១៩ ហើយកិច្ចសន្យាជួលត្រូវបានបញ្ចប់នៅឆ្នាំ២០២១។ ក្រោយមក តុលាការបានសម្រេចឱ្យក្រុមហ៊ុននេះបង់ប្រាក់សំណងពាក់ព័ន្ធការបញ្ចប់កិច្ចសន្យា។ បូករួមទាំងការប្រាក់ និងថ្លៃចំណាយសេវាផ្លូវច្បាប់ បំណុលសរុបបានកើនលើសពី២៥០លានដុល្លារ។

បញ្ជាបង្កកទ្រព្យសម្បត្តិនេះគ្របដណ្តប់លើយន្តហោះ ការបញ្ជាទិញយន្តហោះ ម៉ាស៊ីនយន្តហោះ ប្រាក់កក់ជួល ប្រាក់បម្រុងសម្រាប់ការថែទាំ និងចំណូលពីការលក់សំបុត្រមួយចំនួន។ ទោះជាយ៉ាងណា តុលាការមិនបានបង្គាប់ឱ្យក្រុមហ៊ុន Vietjet ផ្អាកប្រតិបត្តិការនោះទេ ដោយក្រុមហ៊ុនអាចបន្តអាជីវកម្មជាធម្មតា ប៉ុន្តែប្រតិបត្តិការមួយចំនួនត្រូវស្ថិតក្រោមការរឹតបន្តឹង។ ដោយឡែកកាលពីខែកញ្ញា តុលាការនេះបានអនុម័តជាគោលការណ៍លើការចាត់តាំងអ្នកទទួលបន្ទុកគ្រប់គ្រងទ្រព្យសម្បត្តិមួយចំនួនរបស់ក្រុមហ៊ុន Vietjet នៅក្រៅប្រទេសវៀតណាម ដើម្បីជួយអនុវត្តសាលក្រមទាមទារបំណុល។

សូមបញ្ជាក់ថា ករណីនេះពាក់ព័ន្ធនឹងក្រុមហ៊ុន VietJet Aviation នៅវៀតណាម គឺមិនមែនក្រុមហ៊ុន Thai Vietjet ដែលជាក្រុមហ៊ុនដាច់ដោយឡែកនោះទេ។ ហើយបច្ចុប្បន្នមិនមានភ័ស្តុតាងបង្ហាញថា យន្តហោះ ឬជើងហោះហើររបស់ក្រុមហ៊ុន Thai Vietjet ត្រូវបានបង្កក ឬផ្អាកដំណើរការនោះដែរ៕