ការអំពាវនាវរបស់ទីក្រុងកៀវ ទៅកាន់អង្គការកាកបាទក្រហម និង UN ធ្វើឡើងមួយថ្ងៃបន្ទាប់ពី មានការទម្លាប់គ្រាប់បែកទៅលើមន្ទីរឃុំឃាំងមួយកន្លែងនៃទីក្រុង Olenivka ខេត្តដូណេក បច្ចុប្បន្នគ្រប់គ្រងដោយរុស្ស៊ី និងដែលបានបណ្តាលឲ្យស្លាប់មនុស្សជាង៥០នាក់និងរបួសរាប់សិបនាក់។
មន្ត្រីសិទ្ធិមនុស្សរបស់អ៊ុយក្រែន លោក Dmytro Lubinetsk បាននិយាយថា លោកបានស្នើសុំឱ្យកាកបាទក្រហម និងបេសកកម្មឃ្លាំមើលសិទ្ធិមនុស្សរបស់អង្គការសហប្រជាជាតិ ធ្វើដំណើរទៅកាន់ទីក្រុង Olenivka ដើម្បីពិនិត្យដោយផ្ទាល់។
ក្រោយមានការស្នើសុំពីភាគីអ៊ុយក្រែន បេសកកម្មឃ្លាំមើលសិទ្ធិមនុស្សរបស់អង្គការសហប្រជាជាតិ ដែលហៅកាត់ថា ICRC បានធ្វើសំណើមួយទៅភាគីរុស្ស៊ីសុំចូលទៅត្រួតពិនិត្យ ប៉ុន្តែមិនទាន់ទទួលបានការអនុញ្ញាតនៅឡើយ។
សូមរំឭកថា កាលពីថ្ងៃសុក្រសប្តាហ៍មុន មានព្រឹត្តិការណ៍ទម្លាក់គ្រាប់បែកទៅលើមន្ទីរឃុំឃាំងមួយកន្លែង បណ្តាលឲ្យស្លាប់មនុស្សជាង៥០នាក់និងរបួបរាប់សិបនាក់ ដែលសុទ្ធតែជាអតីតសមាជិកកងកម្លាំងអាហ្សូវ (Azov)។ ទីក្រុងកៀវនិងម៉ូស្គូ បានចោទគ្នាទៅវិញទៅមកថា ជាអ្នកនៅពីក្រោយអំពើឃាតកម្មនេះ។ កន្លែងទម្លាក់គ្រាប់បែកនេះ គឺឋិតនៅប៉ែកអាគ្នេយ៍អ៊ុយក្រែននៃខេត្តដូណេក ដែលជាតំបន់ផ្តាច់ខ្លួនគាំទ្រដោយរុស្ស៊ី។ ប៉ុន្មានខែមុនទាហានអ៊ុយក្រែន ប្រមាណជា២.៥០០នាក់ ដែលតស៊ូប្រយុទ្ធការពារតំបន់នេះលែងបាន ក៏បានសុំចុះចាញ់ ហើយត្រូវ រុស្ស៊ីចាប់ឃុំឃាំងនៅទីក្រុងអូលេនីវកា (Olenivka)។
ក្រុមហ៊ុនឧស្ម័នរុស្ស៊ី Gazprom បានប្រកាសកាលពីចុងសប្តាហ៍មុន ពីការឈប់លក់ឧស្ម័នឲ្យប្រទេសឡាតវី ដោយសំអាងថា ប្រទេសជិតខាងរុស្ស៊ីមួយនេះ បានរំលោភលើលក្ខខណ្ឌ។ ការប្រកាសរបស់រុស្ស៊ីនេះ ជាការដាក់សម្ពាធបន្ថែមលើវិស័យថាមពលទៅលើប្រទេសសហភាពអឺរ៉ុប ហើយក៏ជាការវាយបកសងសឹកទៅនឹងទណ្ឌកម្មសេដ្ឋកិច្ចដែលអឺរ៉ុបដាក់មកលើក្រុងម៉ូស្កូដែរ។ ប៉ុន្តែ មន្ត្រីជាន់ខ្ពស់ឡាតវីបានអះអាងថា ខ្លួនមិនបារម្ភពេកទេ ព្រោះប្រទេសខ្លួនបានត្រៀម និងមានគម្រោងរួចហើយ ថានឹងឈប់ទិញឧស្ម័នពីរុស្ស៊ី។
បើតាមការអះអាងពីក្រុមហ៊ុនរុស្ស៊ី Gazprom បានសង្កត់ធ្ងន់ថា ប្រទេសឡាតវី រំលោភលើលក្ខខណ្ឌបង់ប្រាក់ ដែលរុស្ស៊ីតម្រូវឲ្យទូទាត់សាច់ប្រាក់ ជារូបិយបណ្ណ «រូប្ល» របស់រុស្ស៊ី។ ការសម្រេចចិត្តរបស់ក្រុមហ៊ុនឧស្ម័នរុស្ស៊ី គឺបន្ទាប់ពី ឡាតវីនៅតែបន្តទូទាត់ជាប្រាក់អឺរ៉ូ។
គួរជម្រាបថា ក្រៅពីឡាតវី រុស្ស៊ីបានផ្អាកលក់ឧស្ម័នឲ្យប្រទេសនៅអឺរុបជាច្រើនទៀតរួចមកហើយដូចជា ប្រទេសប៉ូឡូញ ប៊ុលហ្ការី ហ្វាំងឡង់ ហូឡង់ និងដាណឺម៉ាក់ ខណៈដែលប្រទេសនៅអឺរ៉ុបជាច្រើន កំពុងតែញាប់ដៃជើងប្រមូលឧស្ម័ន ត្រៀមទុកសម្រាប់រដូវរងាខាងមុខ។
សូមបញ្ជាក់ថា ដើម្បីចូលរួមកាត់បន្ថយហានិភ័យនេះ សហភាពអឺរ៉ុបទាំង២៧ប្រទេស កាលដើមសប្តាហ៍មុន បានព្រមព្រៀងគ្នាកាត់បន្ថយ និងសន្សំសំចៃការប្រើប្រាស់ឧស្ម័ន ឲ្យបានយ៉ាងតិច១៥% បើធៀបនឹងប្រាំឆ្នាំចុងក្រោយ។ ឧស្ម័នរុស្ស៊ី តំណាងឲ្យ៤០% នៃការនាំចូលឧស្ម័នរបស់សហភាពអឺរ៉ុបសរុប៕
