លោក Guterres លើកឡើងបែបនេះ ក្រោយលោកបានជួបជាមួយប្រធានាធិបតីចិន លោក ស៊ីន ជីនពីង និង រដ្ឋមន្ត្រីការបរទេសចិន លោក វ៉ាង យី ស្របពេលដែលមេ UNរូបនេះមានវត្តមាននៅប្រទេសចិន ក្នុងព្រឹត្តិការណ៍បើកកីឡាអូឡាំពិករដូវរងាឆ្នាំ២០២២។
លោក Antonio Guterres បានសម្តែងការរំពឹងទុកថា ទំនាក់ទំនងរវាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស និងអាជ្ញាធរចិន នឹងអនុញ្ញាតឱ្យមានដំណើរទស្សនកិច្ចដ៏គួរឱ្យទុកចិត្តមួយ របស់ឧត្តមស្នងការសិទ្ធិមនុស្សទៅកាន់ប្រទេសចិន រួមទាំងខេត្តស៊ីនជាំងផងដែរ។ ការលើកឡើងរបស់អគ្គលេខាធិការអង្គការសហប្រជាជាតិរូបនេះ ធ្វើឡើងក្រោយពេលដែល ការិយាល័យឧត្តមស្នងការសិទ្ធិមនុស្សប្រចាំទីក្រុងហ្សឺណេវ កាលពីចុងខែមករាធ្លាប់បានប្រកាសថា ការចរចាគ្នាជាមួយអាជ្ញាធរចិន កំពុងដំណើរការសម្រាប់ការធ្វើដំណើទស្សនកិច្ចនៅពាក់កណ្តាលឆ្នាំនេះ។
កាសែត South China Morning Post ក៏ធ្លាប់បានចុះផ្សាយស្រដៀងគ្នានេះដែរ ដោយយោងប្រភពមិនបញ្ចេញឈ្មោះថា ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោកស្រី Michelle Bachelet នឹងធ្វើដំណើរទៅតំបន់ស៊ីនជាំងនៅក្រោយការប្រកួតកីឡាអូឡាំពិកបិទបញ្ចប់ ក្នុងនាមជាទស្សនកិច្ច តែមិនមែនជាលក្ខណស៊ើបអង្កេតឡើយ។
អត្ថបទគួរអាន
គួរជម្រាបថា មន្ត្រីសិទ្ធិមនុស្សជាន់ខ្ពស់រូបនេះ ធ្លាប់បានធ្វើការចរចាជាមួយប្រទេសចិន ដើម្បីធ្វើដំណើរទស្សនកិច្ចទៅតំបន់ស៊ីនជាំង ចាប់តាំងពីខែកញ្ញា ឆ្នាំ២០១៨មកម្ល៉េះ ខណៈក្រុមសកម្មជនសិទ្ធិមនុស្ស អង្គការអន្តរជាតិ និង ប្រទេសលោកខាងលិចបានចោទប្រកាន់ប្រទេសចិនពីបទរំលោភបំពានយ៉ាងសម្បើមដៃ រួមមានការឃុំខ្លួនទ្រង់ទ្រាយធំ ការធ្វើទារុណកម្ម និងពលកម្មដោយបង្ខំប្រឆាំងនឹងជនជាតិ អ៊ុយហ្គ័រ និងក្រុមជនជាតិភាគតិចផ្សេងទៀតនៅក្នុងតំបន់ស៊ីនជាំង ភាគខាងលិចនៃប្រទេសចិន។
គួរកត់សម្គាល់ថា ពិធីបើកការប្រកួតកីឡាអូឡាំពិកកាលពីថ្ងៃទី០៤កុម្ភៈ បានបញ្ចប់ទៅជាមួយនឹងភ្លើងគុបអូឡាំពិកដែលត្រូវបានបំភ្លឺដោយកីឡាករអូឡាំពិកវ័យក្មេងជនជាតិចិនពីររូប ដែលម្នាក់ក្នុងចំណោមពួកគេជាសមាជិកនៃជនជាតិភាគតិច អ៊ុយហ្គ័ររបស់ប្រទេសចិន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
