ក្រោយពីលទ្ធផលបោះឆ្នោតព្យួរសមាជិកភាពរបស់រុស្ស៊ីនៅក្រុមប្រឹក្សាសិទ្ធិមនុស្សត្រូវបានបង្ហាញ ដោយសំឡេងគាំទ្រភាគច្រើននោះ ទីក្រុងម៉ូស្គូបានប្រកាសភ្លាមៗ ដើរចេញពីក្រុមប្រឹក្សាសិទ្ធិមនុស្សអង្គការសហប្រជាជាតិតែម្តង ក្រោយពីបានថ្លែងថា ការបោះឆ្នោតនេះ គឺជារឿងខុសច្បាប់ និងធ្វើឡើងក្រោមហេតុផលនយោបាយតែប៉ុណ្ណោះ។ នេះបើតាមការចុះផ្សាយដោយសារព័ត៌មានរ៉យទ័រ។
ការបោះឆ្នោតរបស់មហាសន្និបាតអង្គការសហប្រជាជាតិទាំង១៩៣ប្រទេស ព្យួររុស្ស៊ីពីក្រុមប្រឹក្សាសិទ្ធិមនុស្ស បានសម្រេចជាលទ្ធផល សម្លេងគាំទ្រចំនួន៩៣ ទល់នឹងប្រឆាំង២៤សម្លេង ខណៈដែល៥៨សម្លេងផ្សេងទៀត អនុប្បវាទ ដែលក្នុងនោះ កម្ពុជាយើងក៏បានបោះឆ្នោត អនុប្បវាទផងដែរ។ សម្លេងគាំទ្រទាំង ៩៣គ្រប់គ្រាន់នឹងអាចឲ្យគេព្យួររុស្ស៊ីពីក្រុងប្រឹក្សាសិទ្ធិមនុស្ស ស្របតាមការកំណត់យកសម្លេងភាគច្រើន ២ភាគ៣នៃសម្លេងទាំងអស់ ដោយមិនរាប់បញ្ចូលសម្លេងអនុប្បវាទ។
ថ្លែងបន្ទាប់ពីការបោះឆ្នោត ឯកអគ្គរដ្ឋទូតរងរបស់រុស្ស៊ីប្រចាំនៅអង្គការសហប្រជាជាតិ លោក ចេនណាឌី គូសមីន(Gennady Kuzmin) បានពណ៌នាចំណាត់ការនេះថាជា រឿងដែលមិនស្របច្បាប់ និងធ្វើឡើងក្រោមហេតុផលនយោបាយសុទ្ធសាធ។ ក្រោយថ្លែងបែបនេះរួច លោកបានប្រកាសតែម្តងថា រុស្ស៊ីសូមចាកចេញពីក្រុមប្រឹក្សាសិទ្ធិមនុស្សអង្គការសហប្រជាជាតិតែម្តង។
ដោយឡែក ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី លីនដា ថូម៉ាស់គ្រីនហ្វៀល(Linda Thomas-Greenfield) បានបង្ហាញក្តីរីករាយចំពោះចំណាត់ការរបស់អង្គការសហប្រជាជាតិ។ លោកស្រីនិយាយថា វាបានផ្ញើសារយ៉ាងច្បាស់ថា ការរងទុក្ខរបស់ជនរងគ្រោះ និងអ្នករស់រានមានជីវិតនៅអ៊ុយក្រែន នឹងមិនត្រូវបានគេមើលរំលងឡើយ។
លោកស្រី លីនដា ថូម៉ាស់គ្រីនហ្វៀល បានថ្លែងនៅក្នុងសុន្ទរកថាយ៉ាងដូច្នេះថា៖ «យើងធានាថា អ្នករំលោភសិទ្ធិមនុស្សដ៏ធ្ងន់ធ្ងរ នឹងមិនត្រូវបានអនុញ្ញាតឱ្យកាន់កាប់តំណែងជាអ្នកដឹកនាំផ្នែកសិទ្ធិមនុស្សនៅអង្គការសហប្រជាជាតិនោះទេ»។
គួរជម្រាបថា ក្រុមប្រឹក្សាសិទ្ធិមនុស្សគ្មានអំណាចធ្វើសេចក្តីសម្រេចចិត្តណាមួយ ដោយខ្លួនឯងបានទេ លើកលែងតែមានចំណាត់ការបែបនេះពីមហាសន្និបាត។អត្ថបទគួរអាន
ទោះជាយ៉ាងណាក៏ដោយ ការសម្រេចចិត្តនេះ បានផ្ញើសារច្បាស់លាស់មួយទៅឲ្យរុស្ស៊ីបានដឹងខ្លួនជាងមុន អំពីទង្វើបង្កសង្គ្រាមរបស់ខ្លួននៅអ៊ុយក្រែន។ បន្ថែមពីលើនេះ ក្រុមប្រឹក្សាសិទ្ធិមនុស្ស បានអនុញ្ញាតឱ្យមានការស៊ើបអង្កេត ករណីសម្លាប់រង្គាលនៅប៊ូឆារួចហើយ រួមទាំងឧក្រិដ្ឋកម្មសង្គ្រាមដែលអាចកើតមាននៅក្នុងប្រទេសអ៊ុយក្រែនទាំងមូលផងដែរ។
គួរកត់សម្គាល់ថា នៅមុនការបោះឆ្នោតកាលពីម្សិលមិញ រុស្ស៊ីបានចេញលិខិតគំរាមប្រទេសសមាជិកអង្គការសហប្រជាជាតិទាំងអស់ថា រាល់ការបោះឆ្នោតយល់ព្រម និងអនុប្បវាទ ចំពោះសំណើព្យួររុស្ស៊ីពីក្រុមប្រឹក្សាសិទ្ធិមនុស្ស គឺជា « អំពើអមិត្ត »ជាមួយរុស្ស៊ី។ មានន័យថា វាអាចនឹងមានផលវិបាក ទៅលើទំនាក់ទំនងទ្វេភាគី រវាងប្រទេសទាំងនោះជាមួយរុស្ស៊ីទៅថ្ងៃអនាគត។
គួររំឭកថា គិតចាប់ពីរុស្ស៊ីបានបញ្ជូនទ័ព ធ្វើសង្គ្រាមឈ្លានពានអ៊ុយក្រែន អង្គការសហប្រជាជាតិ បានចេញសេចក្តីសម្រេចចិត្តចំនួន២លើកហើយ ជាមួយនឹងសម្លេងឆ្នោតភាគច្រើនលើសលប់ ដើម្បីថ្កោលទោសរុស្ស៊ី ព្រមទាំងទាមទារឲ្យរុស្ស៊ីទំលាក់អាវុធ បញ្ចប់សង្គ្រាមនៅអ៊ុយក្រែន។ ដោយឡែក កាលពីថ្ងៃទី៣មេសា ភាគីអ៊ុយក្រែនបានផ្សព្វផ្សាយរូបភាព សាកសពជនស៊ីវីលអ៊ុយក្រែនប្រមាណជាង៤០០នាក់ នៅក្រុងប៊ូឆា ដែលខ្លះដេកស្លាប់តាមផ្លូវ ខ្លះទៀតដៃមានជាប់ចំណង និងមានស្លាកស្នាមគ្រាប់កាំភ្លើងស្រស់ៗនៅលើក្បាលជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
