បើគិតក្នុងរយៈពេលជិត២សប្ដាហ៍មកនេះ ទីក្រុងព្យ៉ុងយ៉ាងបានបាញ់ម៉ីស៊ីល៦គ្រាប់ហើយ ដោយក្នុងនោះ ក៏មានការបាញ់ម៉ីស៊ីលហោះរំលងលើប្រទេសជប៉ុនផងដែរ។ នេះបើតាមការរាយការណ៍ដោយទីភ្នាក់ងារយទ័រ។
គិតត្រឹម១២ថ្ងៃចុងក្រោយនេះ រដ្ឋផ្តាច់ការកូរ៉ខាងជើងបានបាញ់មីស៊ីលសរុបចំនួន៦គ្រាប់ ដែលក្នុងនោះ មីស៊ីលប៉ាលេស្ទីករយៈចម្ងាយមធ្យមមួយគ្រាប់បានត្រូវបាញ់រំលងពីលើប្រទេសជប៉ុន មុននឹងធ្លាក់ចូលទៅក្នុងមហាសមុទ្រប៉ាស៊ីហ្វិក កាលពីថ្ងៃអង្គារ ទី ៤ តុលា ដែលមានរយៈចម្ងាយ៤៦០០គីឡូម៉ែត្រ។
ការធ្វើតេស្តថ្មីនេះ ត្រូវបានធ្វើឡើងមួយម៉ោង បន្ទាប់ពីប្រទេសកូរ៉េខាងជើងបានថ្កោលទោសសហរដ្ឋអាមេរិកដែលធ្វើការថ្កោលទោសខ្លួន ទៅកាន់ក្រុមប្រឹក្សាសន្តិសុខអង្គការសហប្រជាតិ និងការធ្វើសមយុទ្ធរួមគ្នារវាងកូរ៉េខាងត្បូង និងសហរដ្ឋអាមេរិក។
បន្ថែមពីនេះ នៅក្នុងសេចក្តីថ្លែងការណ៍ដែលចេញផ្សាយដោយក្រសួងការបរទេសរបស់ប្រទេសកូរ៉េខាងជើង ក៏បានថ្កោលទោសទីក្រុងវ៉ាស៊ីនតោនផងដែរ សម្រាប់ការចល័តនាវាផ្ទុកយន្តហោះអាមេរិក (USS Ronald Reagan) មកឈរជើងនៅឧបទ្វីបកូរ៉េឡើងវិញ ដោយកូរ៉េខាងជើងថា ជាការគំរាមកំហែងយ៉ាងធ្ងន់ធ្ងរដល់ស្ថិរភាពរបស់ខ្លួន។
ចំពេលជាមួយគ្នានេះដែរ ប្រធានាធិបតីកូរ៉េខាងត្បូង លោក Yoon Suk-yeol បាននិយាយទៅកាន់លោក Kishida នាយករដ្ឋមន្ត្រីជប៉ុន តាមរយៈទូរស័ព្ធថា កូរ៉េខាងត្បូងនឹងពង្រឹងយោធារបស់ខ្លួន និងចាប់ដៃគ្នាជាមួយសហរដ្ឋអាមេរិក និងប្រទេសជប៉ុនកាន់តែស្អិតល្មួតថែមទៀត។
អត្ថបទគួរអាន
ជុំវិញការបាញ់ម៉ីស៊ីលជាបន្តបន្ទាប់នេះដែរ សហរដ្ឋអាមេរិកបានចោទប្រកាន់ប្រទេសចិន និងរុស្ស៊ីថា បានអនុញ្ញាតឲ្យមេដឹកនាំកូរ៉េខាងជើង លោក គីម ជុងអ៊ុន ធ្វើការសាកល្បងអាវុធនុយក្លេអ៊ែរ និងមីស៊ីលតាមតែអំពើចិត្ត ដោយបានជំទាស់មិនព្រមថ្កោលទោសនៅក្នុងក្រុមប្រឹក្សាសន្តិសុខអង្គការសហប្រជាជាតិនោះ។
បន្ទាប់ពីកិច្ចប្រជុំកាលពីថ្ងៃពុធ សមាជិកក្រុមប្រឹក្សាសន្តិសុខចំនួនប្រាំបួន រួមមានសហរដ្ឋអាមេរិក អង់គ្លេស បារាំង អាល់បានី ប្រេស៊ីល ឥណ្ឌា អៀរឡង់ ន័រវេស និងអារ៉ាប់រួម បានថ្កោលទោសការបាញ់មីស៊ីលរបស់កូរ៉េខាងជើងនៅក្នុងសេចក្តីថ្លែងការណ៍រួមរបស់ខ្លួន។
ឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បាននិយាយថា «កូរ៉េខាងជើង ទទួលបានការការពារពីក្រោយពីសមាជិកពីររូបនៃក្រុមប្រឹក្សានេះ ដោយលោកស្រីចង់សំដៅទៅប្រទេសចិន និងរុស្សីតែម្តង»។
ផ្ទុយទៅវិញ លោក Geng Shuang ឯកអគ្គរដ្ឋទូតរងរបស់ចិនប្រចាំនៅអង្គការសហប្រជាជាតិ បាននិយាយថា ក្រុមប្រឹក្សាសន្តិសុខចាំបាច់ត្រូវដើរតួនាទីស្ថាបនា «ជាងការពឹងផ្អែកតែលើវោហាសាស្ត្រ ឬការដាក់សម្ពាធនោះ» ។ ចំណែកឯ លោកស្រីអានណា (Anna Evstigneeva) ឯអគ្គរដ្ឋទូតរងរបស់រុស្សីនៅអង្គការសហប្រជាជាតិ បានប្រាប់ក្រុមប្រឹក្សាសន្តិសុខថា «ការដាក់ទណ្ឌកម្មថ្មីប្រឆាំងនឹងកូរ៉េខាងជើងគឺជាទីបញ្ចប់» និង «គ្មានបានលទ្ធផលអ្វីទាំងអស់»។
លោកស្រីជឿជាក់ថា យន្តការអង្គការសហប្រជាជាតិ និងក្រុមប្រឹក្សាសន្តិសុខ ចាំបាច់ត្រូវប្រើដើម្បីគាំទ្រកិច្ចសន្ទនាអន្តរកូរ៉េ និងការចរចាពហុភាគី ជាជាងការដាក់សម្ពាធឲ្យក្លាយជាឧបសគ្គទៅវិញ៕
