បុរសខ្លាំងអាមេរិក និងចិន គ្រោងជួបគ្នាក្នុងពេលឆាប់ៗនេះ ស្របពេលដែលទំនាក់ទំនងរវាងមហាអំណាចទាំងពីរកាន់តែប្រេះឆា

លោក Biden បានប្រាប់ក្រុមអ្នកយកព័ត៌មាន ខណៈដែលលោកត្រឡប់មកពីរដ្ឋម៉ាសាជូសេតន៍ (Massachusetts) វិញថា៖ «លោកមានបំណងជួបនិយាយជាមួយប្រធានាធិបតីចិនលោកស៊ី នៅរយៈពេល ១០ ថ្ងៃខាងមុខនេះ»។

ការណ៍នេះត្រូវបានគេមើលឃើញថា វាជាលើកដំបូងហើយ និងជាពេលវេលាមួយគួរឲ្យចិត្តទុកដាក់ក្នុងក្នុងរយៈពេល ៤ ខែមកនេះ ដែលមេដឹកនាំនៃប្រទេសមហាអំណាចពិភពលោកទាំងពីរស្កាត់ជួបគ្នា ដើម្បីពិភាក្សាបញ្ហាដ៍ចម្រូងចម្រាស់មួយចំនួន ដូចជាភាពតានតឹងនៅកោះតៃវ៉ាន់ ព្រមទាំងការកាត់បន្ថយពន្ធនាំចូលលើទំនិញពីប្រទេសចិន ដើម្បីជួយកាត់បន្ថយសម្ពាធអតិផរណាសម្រាប់អ្នកប្រើប្រាស់នៅអាមេរិកជាដើម។

សហរដ្ឋអាមេរិកបានចាត់ទុកប្រទេសចិនថា ជាគូប្រជែងយុទ្ធសាស្ត្រដ៏សំខាន់របស់ខ្លួន ដូច្នេះហើយប្រទេសទាំងពីរត្រូវមានការចូលរួមយ៉ាងសកម្ម ដើម្បីរក្សាការពារទំនាក់ទំនងឲ្យមានស្ថិរភាព ក៏ដូចជាកើតមានជម្លោះដោយចៃដន្យណាមួយ។

យ៉ាងណាមិញ ក្នុងពេលថ្មីៗនេះ ក្រោយពីលោកស្រីណេនស៊ី ពេឡូស៊ី (Nancy Pelosi) ដែលជាប្រធានរដ្ឋសភាសហរដ្ឋអាមេរិក ត្រូវបានចុះផ្សាយដោយកាសែត Financial Time ថាលោកស្រីគ្រោងនឹងទៅបំពេញទស្សនកិច្ចនៅតៃវ៉ាន់នៅខែក្រោយនោះ លោក Biden បានថ្លែងទៅកាន់អ្នកសារព័ត៌មានកាលពីថ្ងៃពុធនេះថា៖ «វាមិនមែនជាគំនិតល្អទេនៅពេលនេះ ហើយលោកក៏ព្រួយបារម្ភលើរឿងនេះដែរ»។

ភ្លាមៗ ក្រោយមានការចុះផ្សាយពីគម្រោងដំណើរទស្សនកិច្ចរបស់ប្រធានសភាអាមេរិក នៅទីក្រុងតៃប៉ិនោះ ទីក្រុងប៉េកាំងបាននិយាយកាលពីថ្ងៃអង្គារថា ខ្លួននឹងធ្វើការឆ្លើយតបដោយប្រើ "វិធានការទាំងបង្ខំចិត្ត" ប្រសិនបើលោកស្រី Pelosi មានវត្តមាននៅកោះតៃវ៉ាន់មែន ក៏ព្រោះតែចិនចាត់ទុក ដំណើរទស្សនកិច្ចនេះនឹងធ្វើឲ្យ «ប៉ះពាល់យ៉ាងធ្ងន់ធ្ងរដល់អធិបតេយ្យភាព និងបូរណភាពទឹកដីរបស់ប្រទេសចិន»។

ក៏ប៉ុន្តែ ការិយាល័យរបស់លោកស្រី Pelosi បានបដិសេធមិនធ្វើអត្ថាធិប្បាយអំពីដំណើរទស្សនកិច្ចនេះនោះទេ ដោយលើកឡើងពីកង្វល់ផ្នែកសន្តិសុខ។

ទោះបីជាយ៉ាងក៏ដោយចុះ ទំនាក់ទំនងពាណិជ្ជកម្មរវាងរដ្ឋបាលលោក Biden ជាមួយប្រទេសចិន ជុំវិញការដាក់រឿងពន្ធ ក៏ជាបញ្ហាចាក់ស្រេះមួយដែលត្រូវលើកមកពិភាក្សាគ្នាដែរ។

ការកើនឡើងអតិផរណានៅអាមេរិកថ្មីៗនេះ បានជំរុញឱ្យសេតវិមានបន្ធូរបន្ថយពន្ធលើទំនិញចិនផងដែរ រួមទាំងពន្ធ ដែលដាក់ដោយអតីតប្រធានាធិបតី លោក Donald Trump លើការនាំចូលពីប្រទេសចិនមានតម្លៃប្រហែល ៣៧០ ពាន់លានដុល្លារ។

យោងតាមអ្នកជំនាញពន្ធគយបានប្រាប់ទីភ្នាក់ងារ Reuters ថា គេមិនទាន់ដឹងទេថា រដ្ឋកាលលោកបៃដិន នឹងបន្ធូរបន្ថយពន្ធ ឬក៏បន្ថែមយ៉ាងណាទេ តែបើតាមការស៊ើបអង្កេតថ្មីលើឧស្សាហកម្មរបស់ប្រទេសចិន អាចនាំឱ្យមានការបន្ថែមពន្ធគយលើទំនិញចិនថែមមួយកម្រិតទៀតក៏ថាបាន៕