ការបោះឆ្នោតនេះបានធ្វើឡើងក្នុងពេលតែមួយសប្តាហ៍ប៉ុណ្ណោះ បន្ទាប់ពីសេចក្តីព្រាងច្បាប់នេះត្រូវបានតាក់តែងឡើង និងបន្ទាប់ពីមានសវនាការសាធារណៈ ដើម្បីជជែកដេញដោលពីច្បាប់នេះ។ គណៈកម្មាធិការថាមពល និងពាណិជ្ជកម្មរបស់សភា កាលពីសប្តាហ៍មុន បានបោះឆ្នោតគាំទ្រក្នុងសំឡេងគាំទ្រ៥០ ទល់នឹង០ ទៅលើសេចក្តីព្រាងច្បាប់នេះ និងបញ្ជូនបន្តទៅបោះឆ្នោតនៅក្នុងសភា។
ទីភ្នាក់ងារចារកម្មអាម៉េរិក (FBI) ក្រសួងយុត្តិធម៌ និងការិយាល័យនាយកស៊ើបការណ៍សម្ងាត់ជាតិ បានធ្វើសន្និសីទខ្លីមួយសម្រាប់សមាជិកសភា កាលពីថ្ងៃអង្គារ។ លោក ស្ទីវ ស្កេឡាយ (Steve Scalise) មេដឹកនាំសំឡេងភាគច្រើនក្នុងសភា បាននិយាយថា ពួកគេបានឆ្លើយសំណួររបស់សមាជិកជាច្រើន ដូច្នេះហើយសមាជិកអាចមើលឃើញព័ត៌មានលម្អិតបន្ថែមទៀតអំពីអ្វីដែលមានហានិភ័យ និងរបៀបដែលបក្សកុម្មុយនិស្តចិន អាចបង្កគ្រោះថ្នាក់ដល់ក្រុមគ្រួសាររបស់អាម៉េរិកជាច្រើន។
អត្តបទគួរអាន
ប្រភពមួយបាននិយាយថា នាយកប្រតិបត្តិក្រុមហ៊ុន TikTok គឺលោក ឈូ សូ ហ្ស៊ី (Chew Shou Zi) នឹងត្រូវឡើងទៅកាន់វិមានអគារសភា (Capitol Hill) នៅថ្ងៃពុធសប្តាហ៍នេះ តាមការគ្រោងទុកពីមុនមក ដើម្បីនិយាយជាមួយនឹងសមាជិកព្រឹទ្ធសភា។ នាយកប្រតិបត្តិរូបនេះអះអាងថា ច្បាប់នេះបានកំណត់លទ្ធផលទុកជាមុនរួចទៅហើយ គឺការហាមឃាត់ទាំងស្រុងនៃកម្មវិធី TikTok នៅសហរដ្ឋអាម៉េរិក ហើយថា រដ្ឋាភិបាលកំពុងព្យាយាមដកហូតសិទ្ធិពលរដ្ឋអាម៉េរិកចំនួន១៧០លាននាក់ក្នុងការបញ្ចេញមតិដោយសេរី។
មនុស្សមួយចំនួនដែលជំទាស់នឹងច្បាប់នេះ រួមទាំងតំណាងរាស្ត្រនៃគណបក្សប្រជាធិបតេយ្យ គឺលោក ម៉ាកវែល ហ្រ្វូស (Maxwell Frost) គិតថា ច្បាប់នេះនឹងអនុម័តនៅក្នុងសភា។ បើទោះបីជាច្បាប់នេះទទួលបានការគាំទ្រពីសភាក៏ដោយ ប៉ុន្តែវាសនានៃច្បាប់នេះ នៅមិនទាន់ច្បាស់នៅឡើយទេ នៅពេលច្បាប់នេះបញ្ជូនទៅកាន់ព្រឹទ្ធសភា ព្រោះព្រឹទ្ធសមាជិកមួយចំនួនចង់បាននីតិវិធីផ្សេងពីនេះ ខណៈប្រធានាធិបតីអាម៉េរិក លោក ចូ បៃដិន បាននិយាយកាលពីសប្ដាហ៍មុនថា លោកនឹងចុះហត្ថលេខាលើសេចក្ដីព្រាងច្បាប់នេះ៕
អត្ថបទ៖ សុខ ជា
None
