លេខាធិការដ្ឋានសុខភាពនៃសហរដ្ឋអាមេរិក បានបញ្ជាក់ថា អាមេរិក កំពុងពិចារណាលើ ជំហានបន្ទាប់ ដើម្បីទប់ស្កាត់ការរាតត្បាតនៃ មេរោគកូរ៉ូណា បន្ទាប់ពីមានករណីឆ្លង ៥ករណីហើយ នៅក្នុងសហរដ្ឋអាមេរិក គិតត្រឹមថ្ងៃទី ២៩ ខែ មករា ឆ្នាំ ២០២០នេះ ហើយការផ្អាកជើងហោះហើររវាង អាមេរិក និងចិន ក៏ជាប្រធានបទមួយក្តៅ នៅក្នុងកិច្ចប្រជុំផងដែរ។
តាមការបញ្ជាក់ពី សេតវិមានអាមេរិក គឺថា រដ្ឋាភិបាលលោកដូណាល់ ត្រាំ មិនទាន់សម្រេចឲ្យផ្អាកជើងហោះហើរពី ចិន មក អាមេរិក នោះទេ បើទោះបីជាមាន ការទទូចសុំពី សមាជិកព្រឹទ្ធសភាអាមេរិក ឲ្យសម្រេចផ្អាកភ្លាមៗក៏ដោយ។
រដ្ឋាភិបាលអាមេរិក ក៏បានស្នើឲ្យ ប្រជាពលរដ្ឋអាមេរិក ដែលមានបំណងហោះហើរទៅកាន់ប្រទេសចិន ពិចារណាឡើងវិញជាថ្មី និងមានការប្រុងប្រយ័ត្នខ្ពស់ចំពោះ ករណីឆ្លងនៃមេរោគកូរ៉ូណា ជាពិសេសគឺ ការហោះហើរទៅកាន់ ខេត្តហ៊ូប៉ី ដែលជាចំណុចស្នូលនៃការផ្ទុះឡើងនៃជម្ងឺនេះរាប់ពាន់ករណី។
អត្ថបទគួរអាន!
លោក អេឡិច អាហ្សា រដ្ឋលេខាធិការក្រសួងសុខាភិបាលអាមេរិក បានថ្លែងឲ្យដឹងដែរថា អាមេរិក ក៏បានស្នើ ដើម្បីបញ្ជូនអ្នកជំនាញសុខភាពផ្នែកជម្ងឺឆ្លងរបស់អាមេរិក ទៅកាន់ប្រទេសចិន ដើម្បីធ្វើជាជំនួយការដល់ សេវាសុខភាពសាធារណៈ ហើយបើតាមអង្គការសុខភាពពិភពលោក WHO បានឆ្លើយតបថា ប្រទេសចិន យល់ព្រមនឹងទទួលអ្នកជំនាញអន្តរជាតិ កាន់តែឆាប់កាន់តែល្អ។
ទោះបីជាយ៉ាងណាក៏ដោយ ភាពភ័យខ្លាចនៃការឆ្លងរាតត្បាតនៃមេរោគដ៏កាចសាហាវនេះ បានជម្រុញឲ្យ ក្រុមហ៊ុនអាកាសចរណ៍ជាច្រើន ជុំវិញសកលលោក បានកាត់បន្ថយជើងហោះហើរទៅកាន់ ប្រទេសចិន ហើយក្រុមហ៊ុនអន្តរជាតិធំៗ ក៏បានហាមឃាត់បុគ្គលិករបស់ខ្លួន មិនឲ្យធ្វើដំណើរទៅកាន់ ប្រទេសចិនថែមទៀត ហើយខ្លះទៀត ក៏ព្យាយាមជម្លៀសបុគ្គលិករបស់ខ្លួន ចេញពី ទីក្រុងវូហាន នេះតែម្តង។
សូមបញ្ជាក់ថា
បើតាមអាជ្ញាធរសុខាភិបាលចិន គិតត្រឹមព្រឹកថ្ងៃទី ២៩ ខែមករា ឆ្នាំ២០២០នេះ ករណីមនុស្សឆ្លងមេរោគ
Corona បានកើនដល់ជាង ៦០០០នាក់ និងសម្លាប់មនុស្សអស់ ១៣២នាក់ នៅក្នុងប្រទេសចិន
ហើយសម្រាប់អាមេរិក ក៏មានករណីឆ្លងចំនួន ៥ផងដែរ៕
None
