សេដ្ឋកិច្ចអាម៉េរិក ត្រូវបានព្យាករថា នឹងសម្រេចបានកំណើនរង្វង់២% នៅឆ្នាំ២០២៥

លោក ប្រាយអែន ម៉យនីហែន (Brian Moynihan) នាយកប្រតិបត្តិធនាគារអាម៉េរិក Bank of America បានលើកឡើងថា អត្រាគ្មានការងារធ្វើនៅសហរដ្ឋអាម៉េរិក មានក្នុងរង្វង់៤,១% ប៉ុណ្ណោះកាលពីអំឡុងខែតុលា កន្លងទៅថ្មីៗនេះ ខណៈដែលប្រាក់ឈ្នួលមានការកើនឡើង។ លោកបានគូសបញ្ជាក់ថា ពេលនេះសេដ្ឋកិច្ចអាម៉េរិក កំពុងដំណើរការល្អទាំងសម្រាប់អតិថិជនជាអ្នកប្រើប្រាស់ និងអាជីវកម្ម ដែលកត្តានេះកំពុងជួយជំរុញការចំណាយរបស់អតិថិជនជាអ្នកប្រើប្រាស់។

ធនាគារកណ្តាលអាម៉េរិក កាលពីខែកញ្ញា កន្លងទៅថ្មីៗនេះបានបញ្ចុះអត្រាការប្រាក់គោលនយោបាយជាលើកដំបូងមិនធ្លាប់មានក្នុងរយៈពេល៤ឆ្នាំមកនេះ។ ធនាគារអាម៉េរិក Bank of America បានព្យាករថា ធនាគារកណ្តាលអាម៉េរិក អាចនឹងបញ្ចុះអត្រាការប្រាក់២លើកបន្ថែមទៀត នៅមុនដាច់ឆ្នាំ២០២៤ ហើយនឹងបញ្ចុះអត្រាការប្រាក់សរុប៥លើកនៅឆ្នាំ២០២៥។

លោក ប្រាយអែន ម៉យនីហែន (Brian Moynihan) បានលើកឡើងថា ដោយសារតែការបញ្ចុះអត្រាការប្រាក់ជាបន្តបន្ទាប់ទាំងនេះ ក្រុមស្រាវជ្រាវនៃធនាគារ Bank of America បានព្យាករថា សេដ្ឋកិច្ចរបស់សហរដ្ឋអាម៉េរិក នឹងបន្តសម្រេចបានកំណើនស្ថិរភាពក្នុងរង្វង់ប្រមាណចន្លោះពី១,៨% ទៅ២% នៅឆ្នាំក្រោយ។

នេះបង្ហាញពីការធ្លាក់ចុះ បើធៀបនឹងកំណើនប្រចាំត្រីមាសបច្ចុប្បន្នក្នុងរង្វង់ជិត៣% ប៉ុន្តែកំណើនដែលត្រូវបានព្យាករនេះ គឺស្របនឹងអត្រាកំណើនដែលអាចសម្រេចបានរបស់សហរដ្ឋអាម៉េរិកក្នុងរង្វង់ប្រមាណ២% ដែលបង្ហាញពីភាពរឹងមាំនៃសេដ្ឋកិច្ច។

លោក ប្រាយអែន ម៉យនីហែន (Brian Moynihan) បានសង្កត់ធ្ងន់ថា មិនថាជាលោក ដូណាល់ ត្រាំ ឬក៏លោកស្រី កាម៉ាឡា ហារីស ឈ្នះការបោះឆ្នោតក្លាយប្រធានាធិបតីរបស់សហរដ្ឋអាម៉េរិកនោះទេ គឺចាំបាច់ត្រូវតែផ្ដោតការយកចិត្តទុកដាក់លើការដោះស្រាយបញ្ហាសារពើពន្ធ ដើម្បីរក្សាស្ថិរភាពសេដ្ឋកិច្ចរបស់មហាអំណាចមួយនេះ៕

ដោយ: តែម សុខុម