តើការប្រកបអាជីវកម្មតូច-ធំនៅកម្ពុជាមានស្ថានភាពបែបណា និងកំពុងប្រឈមបញ្ហាអ្វីខ្លះ?
ទាំងអាជីវកម្មលក្ខណៈគ្រួសារ និងក្រុមហ៊ុនធំៗនៅកម្ពុជាសុទ្ធតែជាក្បាលម៉ាស៊ីនសេដ្ឋកិច្ចដ៏សំខាន់ក្នុងការជួយបង្កើតការងារ ទ្រទ្រង់ជីវភាពប្រជាពលរដ្ឋ…
ក្រុមហ៊ុនផ្លូវដែករដ្ឋថៃ បានដាក់ពាក្យបណ្តឹងនៅតុលាការកាលពីថ្ងៃទី២១ ខែតុលា ដោយប្តឹងភាគីចំនួន៨ ដើម្បីទាមទារប្រាក់ប្រមាណ៣៩៤លានដុល្លារអាម៉េរិក រួមទាំងការប្រាក់ពាក់ព័ន្ធនឹងថ្លៃវិនិយោគដែលមិនទាន់បានបង់ក្នុងគម្រោងផ្លូវដែកភ្ជាប់ទៅអាកាសយានដ្ឋាន។ ជម្លោះនេះផ្តើមចេញពីប្រាក់ប្រមាណ៣១៦លានដុល្លារអាម៉េរិក ដែលក្រុមហ៊ុន Asia Era One ជាដៃគូឯកជនក្នុងគម្រោងត្រូវបង់នៅខែតុលា ឆ្នាំ២០២១ តាមកិច្ចព្រមព្រៀងវិនិយោគរួមគ្នា ដែលបានចុះហត្ថលេខាកាលពីឆ្នាំ២០១៩។ ចាប់តាំងពីពេលនោះមកបំណុលនេះបានកើនឡើងដោយសារការប្រាក់ជិត៧៩លានដុល្លារអាម៉េរិក។
ក្នុងចំណោមចុងចោទទាំង៨ ក៏មានធនាគារក្រុងបាងកក និងធនាគារពាណិជ្ជស្យ៉ាមផងដែរ។ ធនាគារទាំងពីរនេះបានផ្តល់ការធានាលើការអនុវត្តកិច្ចសន្យាក្នុងទំហំម្នាក់ៗជាង២៩លានដុល្លារអាម៉េរិក។ ចុងចោទផ្សេងទៀតរួមមានក្រុមហ៊ុនចំនួន៥ ដែលបានផ្តល់ការធានាផ្នែកហិរញ្ញវត្ថុដល់គម្រោងនេះ។
ក្រុមហ៊ុនផ្លូវដែករដ្ឋថៃបានឱ្យដឹងថា ខ្លួនបានព្យាយាមទាមទារប្រាក់ដែលជំពាក់ និងដោះស្រាយជម្លោះតាមនីតិវិធីដែលមានចែងក្នុងកិច្ចសន្យារួចមកហើយ ប៉ុន្តែការចរចាមិនទទួលបានលទ្ធផល។ ដូច្នេះក្រុមហ៊ុនផ្លូវដែករដ្ឋថៃ ក៏សម្រេចចិត្តប្រើវិធានការផ្លូវច្បាប់ ដើម្បីទាមទារប្រាក់មកវិញ។
សម្ព័ន្ធក្រុមហ៊ុនដែលពាក់ព័ន្ធគម្រោងនេះរួមមានក្រុមហ៊ុន Charoen Pokphand Holding ក្រុមហ៊ុន China Railway Construction Corporation ក្រុមហ៊ុន Bangkok Expressway and Metro ក្រុមហ៊ុន CH. Karnchang និងក្រុមហ៊ុន Italian-Thai Development។
ក្រុមហ៊ុនផ្លូវដែករដ្ឋថៃបានបញ្ជាក់ថា ការប្តឹងនេះមានគោលបំណងការពារផលប្រយោជន៍របស់រដ្ឋ និងថវិកាសាធារណៈ ព្រមទាំងធានាឱ្យមានការដោះស្រាយជម្លោះដោយយុត្តិធម៌។ ទន្ទឹមនេះអាជ្ញាធរធានាថា ដំណើរការតុលាការនឹងមិនប៉ះពាល់ដល់ប្រតិបត្តិការរបស់ផ្លូវដែកអាកាសយានដ្ឋាននោះឡើយ ហើយសុវត្ថិភាព និងភាពងាយស្រួលរបស់អ្នកដំណើរនៅតែជាអាទិភាព៕
