តើប្រាក់យ័នឌីជីថលរបស់ចិន វាអាចបង្កក្តីព្រួយបារម្ភ ដល់ប្រាក់ដុល្លារអាមេរិកយ៉ាងណាខ្លះ0x017d7 បច្ចុប្បន្ននេះ មានប្រទេសជិត៨០ រួមទាំងប្រទេសចិន និង អាមេរិកផង កំពុងស្ថិតក្នុងដំណើរការអភិវឌ្ឍធនាគារកណ្ដាលរូបិយបណ្ណឌីជីថល (Central Bank Digital Currency) ហើយក្នុងនោះ ប្រទេសចិន ថ្មីៗនេះ ទើបតែបានបោះមួយជំហានទៅមុនអាមេរិក ដោយបានដាក់ឲ្យប្រើប្រាស់ប្រាក់យ័នឌីជីថលរបស់ខ្លួនក្នុងគម្រោងសាកល្បង និងមានអ្នកប្រើប្រាស់រាប់លាននាក់រួចហើយ ខណៈដែលសហរដ្ឋអាមេរិកវិញ នៅតែផ្ដោតលើការស្រាវជ្រាវនៅឡើយ។
សហរដ្ឋអាមេរិក នៅតែចាត់ស្ថាប័នពាក់ព័ន្ធឲ្យបន្ដស្រាវជ្រាវលើការអភិវឌ្ឍ និងវិភាគមើលថា តើរូបិយវត្ថុឌីជីថលមានលក្ខណៈបែបណា ដែលអាចនឹងត្រូវជាមួយអ្នកប្រើប្រាស់អាមេរិក។ ក្នុងនោះ បញ្ហាឯកជនភាព គឺជាក្ដីបារម្ភដ៏ធំចំពោះអាមេរិកក្នុងការបង្កើតប្រាក់ដុល្លារឌីជីថលនេះ។ ដូច្នេះហើយ ទើបក្រុមអ្នកស្រាវជ្រាវ និងអ្នកវិភាគរបស់អាមេរិក កំពុងសង្កេតតាមដានមើលការដាក់ចេញនូវប្រាក់យ័នឌីជីថលរបស់ចិនយ៉ាងយកចិត្តទុកដាក់បំផុត។
ទោះយ៉ាងណា នាយកស្ថាប័នគំនិតផ្ដួចផ្ដើមរូបិយវត្ថុឌីជីថលរបស់អាមេរិក បាននិយាយថា ការបង្កើតឡើងនូវប្រាក់ដុល្លារឌីជីថលបាន គឺត្រូវមានការគិតគូរយ៉ាងសំខាន់បំផុតទៅលើប្រព័ន្ធឯកជនភាព ហើយលោកថា ចំពោះវិស័យនេះ នៅអាមេរិកគឺពិតជាមានការខុសគ្នាខ្លាំងណាស់ពីប្រទេសចិន។
អត្ថបទគួរអាន
សូមបញ្ជាក់ថា ប្រទេសចិនបានចាប់ផ្ដើមស្វែងរកការបង្កើតរូបិយវត្ថុឌីជីថលតាំងពីឆ្នាំ២០១៤មកម្ល៉េះ ហើយកន្លងមកប្រទេសចិនក៏បានដាក់បញ្ចូលសាច់ប្រាក់ប្រមាណ៣០លានដុល្លារអាមេរិក ទៅក្នុងរូបិយវត្ថុឌីជីល ដែលជាផ្នែកមួយនៃគម្រោងសាកល្បងប្រើប្រាស់នៅទូទាំងប្រទេស។ បើទោះបីជា ស្ថិតក្នុងគម្រោងសាកល្បងក៏ពិតមែន ប៉ុន្ដែ បច្ចុប្បន្នក៏មានអ្នកប្រើប្រាស់រាប់លាននាក់រួចហើយនៅប្រទេសចិនបាននិងកំពុងប្រើប្រាស់ប្រាក់យ័នឌីជីថលនេះ ដើម្បីធ្វើការទូទាត់នានានៅតាមហាងទំនិញ សូម្បីតែនៅតាមហាងយីហោពីអាមេរិកដូចជា Starbucks និង MC Donald ក៏ទទួលយកការទូទាត់ប្រាក់យ័នឌីជីថលនេះដែរ។
មិនមែនតែប្រាក់ដុល្លារអាមេរិកទេ ដែលត្រូវបានគេមើលឃើញថាអាចប្រឈមនឹងបញ្ហាដោយសារតែ ប្រាក់យ័នឌីជីថលរបស់ចិននេះ នៅប្រទេសលោកខាងលិចផ្សេងទៀត ពិសេសនៅអឺរ៉ុបក៏មានការព្រួយបារម្ភពីការគំរាមកំហែងនៃប្រាក់យ័នឌីជីថលរបស់ចិននេះដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
