ថ្លែងទៅកាន់អ្នកសារព័ត៌មាននៅខាងក្រៅសេតវិមាន លោក បៃដិន បាននិយាយថា តាមទស្សនរបស់ខ្ញុំការបាញ់ទម្លាក់នេះ គឺពិតជាសាកសមទៅនឹងស្ថានការ។ ត្រូវបានចោទសួរថាតើឧបទ្ទវហេតុនេះនឹងធ្វើឱ្យទំនាក់ទំនងអាមេរិក-ចិនចុះខ្សោយឬអត់នោះ? លោកចូ បៃដិន បានឆ្លើយថា វាមិនប៉ះពាល់ទៅលើទំនាក់ទំនងនៃប្រទេសទាំងពីរទេ ព្រោះយើងដឹងច្បាស់អ្វីជាជំហររបស់យើង ហើយប្រទេសចិនក៏ដឹងថាយើងនឹងធ្វើវាដូចគ្នា។
ដោយឡែក នៅថ្ងៃចន្ទដដែលនោះ កងឆ្នាំឆ្នេរសមុទ្រអាមេរិកបានដាក់ដែនសមុទ្រនៃរដ្ឋ South Carolina ជាតំបន់ហាមឃាត់ និងផ្អាកធ្វើនាវាចរណ៍បណ្តោះអាសន្ន ដើម្បីបើកបេសសកម្មរុករក និងប្រមូលយកកំទេចកំទីបាឡុងក្រោយបាញ់ទម្លាក់ ដែលអាមេរិកអះអាងមិនដាច់ពីមាត់ថាជាឧបករណ៍ចារកម្មនោះ។
កាលពីពេលថ្មីៗនេះ ទីក្រុងប៉េកាំងបានចេញមុខប្រតិកម្ម ដោយបានថ្កោលទោសអាមេរិកថាមានប្រតិកម្មឆ្លើយតបហួសហេតុ ព្រោះរដ្ឋាភិបាលចិនបានអះអាងហើយថា វាជាឧបករណ៍ស៊ីវិល មិនបានបម្រើឱ្យចារកិច្ចដូចអាមេរិកប៉ាន់ស្មានឡើយ។ យ៉ាងណា អ្នកនាំពាក្យសន្តិសុខជាតិប្រចាំសេតវិមានលោក John Kirby បានប្រាប់អ្នកយកព័ត៌មានថា «គ្មាននរណាម្នាក់ចង់ឃើញជម្លោះដោយសារតែបាឡុងមួយនោះទេ»។ លោក ខ័រប៊ី បានបា្រប់ឱ្យដឹងថា លោក Blinken នឹងព្យាយាមកំណត់ពេលវេលាធ្វើដំណើរទស្សនកិច្ចទៅប្រទេសចិនឡើងវិញ ក្រោយរដ្ឋមន្ត្រីការបរទេសរូបនេះបានលុបចោលដំណើរទស្សនកិច្ចភ្លាមៗក្រោយឧបទ្ទវហេតុបាឡុងហោះនេះ។
អត្ថបទគួរអាន
បើយោងតាមអ្នកនាំពាក្យសេតវិមានអាមេរិករូបនេះដដែលបានសង្កត់ធ្ងន់ថា ក្រុមមន្ត្រីយោធាជំនាញរបស់អាមេរិក នឹងប្រមូលយកបំណែកនៃបាឡុង ហើយអាចទាញយកសមាសធាតុសំខាន់ៗពីបាឡុងនោះតាមដែរគេអាចធ្វើទៅបាន។
ទោះជាយ៉ាងណាក៏ដោយ នៅថ្ងៃដដែលនោះអ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ប្រទេសចិនបានដឹងហើយថា បាឡុងនោះបានរសាត់ចូលទៅក្នុងដែនអាកាសអាមេរិក បន្ទាប់ពីត្រូវបានជូនដំណឹងដោយទីក្រុងវ៉ាស៊ីនតោន។ ប៉ុន្តែលោកស្រីបានសង្កត់ធ្ងន់ថា៖ «ការហោះចូលនោះគឺដោយអចេតនាសុទ្ធសាធ និងជាឧបទ្ទវហេតុចៃដន្យទាំងស្រុង។ លោកស្រីអះអាងថា ឥលូវនេះគាប់ជួនយើងអាចដឹងបាន ពីវិធីដោះស្រាយនិងឆ្លើយតបរបស់សហរដ្ឋអាមរិកក្នុងពេលមានភាពតានតឹងរវាងប្រទេសទាំងពីរ។
គួរជម្រាបដែរថា កាលពីថ្ងៃអាទិត្យទី៥កុម្ភៈ យោធាកូឡុំប៊ីត្រូវបានរាយការណ៍មកថាបានប្រទះឃើញបាឡុងមួយទៀតហោះហើរលើប្រទេសខ្លួន ដែលវាដូចទៅនឹងបាឡុងដែលហោះនៅអាមេរិកដែរ។ ប៉ុន្តែគេមិនបានកំណត់ថាជារបស់ប្រទេសចិន ឬប្រទេសណាមួយផ្សេងទៀតនោះទេ ហើយបាឡុងនោះត្រូវបានគេសម្មតថាបាននិងកំពុងហោះហើរក្នុងប្រទេសផ្សេងទៀតក្នុងទ្វីបអាមរិកខាងត្បូង។
អ្វីដែលគេគួរកត់សម្គាល់នោះគឺ រដ្ឋាភិបាលនៃប្រទេសរួមតំបន់គឺកូស្តារីកា បានឱ្យដឹងថា ប្រទេសចិនបានចេញមកសុំទោសខ្លួនតាមរយៈស្ថានទូត ក្រោយបាឡុងមួយបានហោះចូលក្នុងដែនអាកាសនៃប្រទេសរបស់ខ្លួន។ យោងតាមសេចក្តីថ្លែងការណ៍ខ្លីមួយពីក្រសួងការបរទេសរបស់ប្រទេសកូស្តារីកា រដ្ឋាភិបាលចិនបានទទួលស្គាល់ថា បាឡុងរបស់ខ្លួនពិតជាបានហោះលើប្រទេសកូស្តារីកាមែន ហើយស្ថានទូតចិននៅទីក្រុង San Jose «បានសុំទោសចំពោះឧបទ្ទវហេតុនេះ» ដោយលើកឡើងថា បាឡុងនេះគឺមានបេសកកម្មលើការស្រាវជ្រាវវិទ្យាសាស្ត្រ និងសិក្សាអាកាសធាតុផ្នែកឧតុនិយមតែប៉ុណ្ណោះ៕
