មន្ត្រីអាម៉េរិក រុស្ស៊ី និងអ៊ុយក្រែន គ្រោងជួបគ្នាឆាប់ៗ ដើម្បីពិភាក្សាលើបញ្ហាសន្តិភាពនៅអ៊ុយក្រែន

សេតវិមានអាម៉េរិក បានអះអាងថា មន្រ្តីជំនាញរបស់អាម៉េរិក អ៊ុយក្រែន និងរុស្ស៊ី គ្រោងជួបពិភាក្សាជាមួយគ្នាជាប្រវត្តិសាស្រ្តនៅប្រទេសអារ៉ាប៊ីសាអូឌីត នាប៉ុន្មានថ្ងៃខាងមុខនេះ ដើម្បីពិភាក្សាពីការអនុវត្តបទឈប់បាញ់ដោយផ្នែក។ ប៉ុន្តែមកទល់ពេលនេះគេនៅមិនទាន់ដឹងទេថា តើជំនួបនេះធ្វើឡើងជាលក្ខណៈត្រីភាគី ឬជាជំនួបដាច់ដោយឡែកនោះទេ។

ពាក់ព័ន្ធបញ្ហានេះដែរ ប្រធានាធិបតីអ៊ុយក្រែន លោក វ៉្លូឌីមៀ ហ្សេឡិនស្គី បានប្រាប់អ្នកសារព័ត៌មានថា កិច្ចពិភាក្សាកម្រិតបច្ចេកទេស ដែលមានភាគីអាម៉េរិក រុស្ស៊ី និងអ៊ុយក្រែន នៅក្នុងប្រទេសអារ៉ាប៊ីសាអូឌីត​ នៅចុងសប្តាហ៍នេះ គឺដើម្បីស្វែងរកការដោះស្រាយពាក់ព័ន្ធនឹងការគំរាមកំហែងលើហេដ្ឋារចនាសម្ព័ន្ធ។ លោកបានអះអាងថា អ៊ុយក្រែន ត្រូវការដឹងឲ្យប្រាកពីប្រភេទហេដ្ឋារចនាសម្ព័ន្ធ ដែលត្រូវបានការពារក្រោមកិច្ចព្រមព្រៀង ពោលគឺជាហេដ្ឋារចនាសម្ព័ន្ធថាមពល ឬក៏ផ្លូវដែក ឬកំពង់ផែ ឬហេដ្ឋារចនាសម្ព័ន្ធដឹកជញ្ជូន។

សម្រាប់អាម៉េរិក កិច្ចព្រមព្រៀបបទឈប់បាញ់លើហេដ្ឋារចនាសម្ព័ន្ធថាមពល ដែលខ្លួនបានកំណត់ អាចមានលទ្ធភាពគ្របដណ្តប់រហូតដល់រោងចក្រអគ្គិសនីដើរដោយថាមពលនុយក្លេអ៊ែរបស់អ៊ុយក្រែន នៅក្នុងតំបន់ជម្លោះ ដែលអ្នកវិភាគបានលើកឡើងថា អាម៉េរិកចង់ដឹងពីបច្ចេកវិទ្យារោងចក្រនុយក្លេអ៊ែស៊ីវិល ដែលបន្សល់ទុកដោយរុស្ស៊ីនេះ៕

ដោយៈ សរ សុជាតិ