ថ្លែងនៅឯពិធីអបអរខួបលើកទី៣០ នៃ មូលនិធិប្រាសាទពិភពលោក (WMF) នៅភ្នំបាខែង ខេត្តសៀមរាប កាលពីថ្ងៃទី១០ មិថុនា លោកភារធារីស្ថានទូតអាមេរិកប្រចាំកម្ពុជា Michael Newbill ប្រាប់ឲ្យដឹងថា គិតចាប់តាំងពីឆ្នាំ២០០៤ មក WMF តាមរយៈមូលនិធិឯកអគ្គរដ្ឋទូតអាមេរិកសម្រាប់ការអភិរក្សវប្បធម៌ បានជួសជុលនិងអភិរក្សប្រាសាទភ្នំបាខែង ដោយចំណាយទឹកប្រាក់ចំនួន ៣.២២៩.០០០ដុល្លា។
WMF បានមកដល់ប្រទេសកម្ពុជា នៅឆ្នាំ១៩៨៩ រួចបានបណ្តុះបណ្តាលពលរដ្ឋកម្ពុជាជាង ១០០នាក់ ឲ្យក្លាយជាអ្នកមានជំនាញផ្នែកបេតិកភណ្ឌវប្បធម៌ ហើយបង្កើតនូវអ្នកឯកទេសជំនាន់ថ្មី ខាងផ្នែកស្ថាបត្យកម្ម បូរាណវិទ្យា និងវិស្វកម្ម។
លោកភារធារី Newbill បាននិយាយដូច្នេះថា ៖ «ខ្ញុំមានមោទនភាព ដែលគម្រោងជួសជុលប្រាសាទភ្នំបាខែង គឺជាគម្រោងធំជាងគេនៅក្នុងពិភពលោក ដែលជាជំនួយថវិការបស់មូលនិធិឯកអគ្គរដ្ឋទូត។ តាមរយៈអនុស្សរណៈយោគយល់គ្នា ឆ្នាំ២០០៣ ស្តីពីសម្បត្តិវប្បធម៌ រវាងសហរដ្ឋអាមេរិកនិងប្រទេសកម្ពុជា (ដែលត្រូវបានបន្តនៅឆ្នាំ២០០៨, ២០១៣ និង ២០១៨) អ្នកអាចមើលឃើញប្រវត្តិនៃកិច្ចសហប្រតិបត្តិការដ៏រឹងមាំរវាងរដ្ឋាភិបាលទាំងពីរ និងការប្តេជ្ញាចិត្តរបស់យើង ចំពោះកិច្ចសហប្រតិបត្តិការទ្វេភាគីក្នុងការអភិរក្សបេតិកភណ្ឌវប្បធម៌» ។
ពលរដ្ឋកម្ពុជាដែលបានទទួលការបណ្ដុះបណ្ដាលក្លាយជាអ្នកអភិរក្សប្រាសាទ ពីអង្គការ មូលនិធិប្រាសាទពិភពលោក (World Monuments Fund) តាមរយៈជំនួយរបស់សហរដ្ឋអាមេរិក។
តើបានអានអត្ថបទនេះ ឬ នៅ?
លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានអាជ្ញាធរអប្សរា ដែលបានចូលរួមពិធីអបអរខួបលើកទី៣០ នៃ មូលនិធិប្រាសាទពិភពលោក (WMF) នៅប្រាសាទភ្នំបាខែង ដែរនោះ មានប្រសាសន៍ថា អស់រយៈពេល ៣០ឆ្នាំហើយ ដែល មូលនិធិប្រាសាទពិភពលោក មានវត្តមាននៅលើទឹកដីអង្គរ ។
លោកជំទាវបន្តថា ក្នុងរយៈពេល ៣០ឆ្នាំនេះ មូលនិធិប្រាសាទពិភពលោក បានធ្វើការអភិរក្សនិងជួសជុលប្រាសាទជាច្រើនគួរឲ្យកត់សម្គាល់នៅក្នុងតំបន់អង្គរ ជាពិសេស ប្រាសាទព្រះខ័ន តាសោម អង្គរវត្ត និងប្រាសាទភ្នំបាខែង។
លោកជំទាវរដ្ឋមន្ត្រីវប្បធម៌និងជាប្រធានអាជ្ញាធរអប្សរា មានប្រសាសន៍ដូច្នេះថា ៖ «យើងខ្ញុំ និងអាជ្ញាធរជាតិអប្សរា មានសេចក្ដីសោមនស្សរីករាយឥតឧប្បមា និងពេញចិត្តយ៉ាងខ្លាំងនូវលទ្ធផលដ៏ធំធេង នៃការកសាងសមត្ថភាពធនធានមនុស្ស ដោយអង្គការ មូលនិធិប្រាសាទពិភពលោក ហើយបច្ចុប្បន្ន យើងមានមោទនភាពបំផុត ដែលមានពួកគាត់ធ្វើការនៅតំបន់អង្គរ»៕
