អាមេរិក និងប្រទេសសម្ព័ន្ធមិត្តលោកខាងលិច កំពុងរិះរកគ្រប់មធ្យោបាយក្នុងការដាក់ទណ្ឌកម្មថ្មីៗបន្ថែមទៅលើទីក្រុងម៉ូស្គូ ដើម្បីដាក់សម្ពាធដល់ប្រធានាធិបតីពូទីនឲ្យបញ្ឈប់សង្គ្រាមឈ្លានពាននៅអ៊ុយក្រែន។ យ៉ាងណាមិញ ថ្មីៗនេះ ទីក្រុងវ៉ាស៊ិនតោនទើបតែសម្រេចការដាក់ទណ្ឌកម្មថ្មីមួយទៀតទៅលើម៉ូស្គូ ដោយបញ្ឈប់ការទូទាត់សងបណ្ណបំណុលរដ្ឋ ៦០០លានដុល្លាររបស់រុស្ស៊ី តាមរយៈការកាត់ផ្ដាច់រុស្ស៊ីពីការទទួលបានមូលនិធិរបស់ខ្លួនដែលមាននៅធនាគាររបស់អាមេរិក។
មែនទែនទៅ អាមេរិកបានដាក់ទណ្ឌកម្មច្រើនណាស់ទៅលើរុស្ស៊ី តាំងតែពីថ្ងៃដែលវិមានក្រឹមឡាំងបានចាប់ផ្ដើមចូលឈ្លានពានអ៊ុយក្រែននៅថ្ងៃទី ២៤ ខែកុម្ភៈមកម្ល៉េះ ដោយទុនបម្រុងអន្តរជាតិរបស់រុស្ស៊ី ដែលគ្រប់គ្រងដោយធនាគារកណ្ដាលរុស្ស៊ី មាននៅក្នុងស្ថាប័នហិរញ្ញវត្ថុរបស់អាមេរិក គឺត្រូវបានបង្កកទុកអស់ទៅហើយ។
ប៉ុន្ដែ ក្រសួងហិរញ្ញវត្ថុអាមេរិក បានអនុញ្ញាតឲ្យរដ្ឋាភិបាលទីក្រុងម៉ូស្គូ អាចប្រើប្រាស់មូលនិធិដែលខ្លួនបានបង្កកទាំងនោះបាន តាមរយៈការបង្កើតជាកូប៉ុង សម្រាប់ទូទាត់ជាប្រាក់ដុល្លារអាមេរិក ក្នុងការសងបំណុលរដ្ឋ ស្របទៅតាមមូលដ្ឋាន ករណីមួយៗ (Cas-by -Case) តែប៉ុណ្ណោះ។
ប៉ុន្ដែ នៅថ្ងៃទី ៤ខែមេសា នៅគ្រាដែលរុស្ស៊ីត្រូវទូទាត់សងបំណុលដ៏ច្រើន រួមបញ្ចូលទាំងការសងប្រាក់ដើមនៃបំណុលជាង៥៥០លានដុល្លារផងនោះ រដ្ឋាភិបាលអាមេរិក បានសម្រេចកាត់ផ្ដាច់ការទទួលបានមូលនិធិរបស់រុស្ស៊ីដែលបានបង្កកនៅធនាគារអាមេរិកទាំងនោះ។ ក្នុងន័យនេះ គឺរុស្ស៊ី មិនអាចទទួលបានកូប៉ុងទូទាត់ជាប្រាក់ដុល្លារ ដើម្បីសងបំណុលរដ្ឋទៅកាន់ម្ចាស់បំណុលរបស់ខ្លួនទៀតទេ។ ប្រការនេះ បានធ្វើឲ្យក្រុងម៉ូស្គូកាន់តែលំបាកក្នុងការសម្រេចចិត្តថា តើនឹងត្រូវបន្ដប្រើប្រាក់ដុល្លារ ដើម្បីសងបំណុលទៀត ឬក៏អត់ ឬក៏ប្រើសម្រាប់គោលបំណងផ្សេងទៀត រួមទាំងការគាំទ្រដល់ការធ្វើសង្គ្រាមផងដែរ។ នេះបើតាមការអះអាងរបស់អ្នកនាំពាក្យក្រសួងហិរញ្ញវត្ថុអាមេរិក។
អត្ថបទគួរអាន
ប្រទេសរុស្ស៊ី មានរយៈពេលអនុគ្រោះ៣០ថ្ងៃ ដើម្បីរកប្រាក់ដុល្លារមកធ្វើការទូទាត់សងបំណុលរបស់ខ្លួនទៅកាន់ម្ចាស់បំណុល។
រុស្ស៊ី មានបណ្ណបំណុលអន្តរជាតិមិនទាន់សងចំនួន១៥ ជាមួយនឹងតម្លៃទឹកប្រាក់សរុប៤០ពាន់លានដុល្លារ ហើយរុស្ស៊ីបានខិតខំខ្លាំងណាស់ ដើម្បីរកមធ្យោបាយបញ្ជៀសការបរាជ័យលើការសងបំណុលទាំងនេះ បើទោះបីជាត្រូវរងសម្ពាធទណ្ឌកម្មពីលោកខាងលិចខ្លាំងក្លាយ៉ាងណាក្ដី។
ប៉ុន្ដែ ប្រសិនបើរុស្ស៊ី ពិតជាខកខានក្នុងការទូទាត់បណ្ណបំណុលនៅពេលខាងមុខរបស់ខ្លួន ឬក៏បង់សងជាប្រាក់រូប្ល ទៅឲ្យប្រទេសម្ចាស់បំណុលដែលទទួលយកតែលុយដុល្លារ និងអឺរ៉ូ នោះមានន័យថា រុស្ស៊ីនឹងបរាជ័យក្នុងការសងបំណុលរបស់ខ្លួនហើយ។ ដូច្នេះ វានឹងរុញឲ្យសេដ្ឋកិច្ចរុស្ស៊ីកាន់តែអាប់អួកាន់តែខ្លាំងដែរ។
សូមបញ្ជាក់ថា ការបង្កើនសម្ពាធកាន់តែខ្លាំងទៅរុស្ស៊ីនេះ គឺធ្វើឡើង នៅចំពេលដែលសហរដ្ឋអាមេរិក និងសហភាពអឺរ៉ុប កំពុងមានផែនការដាក់ទណ្ឌកម្មថ្មីៗបន្ថែមទៀតលើទីក្រុងម៉ូស្គូក្នុងសប្ដាហ៍នេះ ដើម្បីដាក់ពិន័យទៅលើទីក្រុងម៉ូស្គូដែលបានសម្លាក់ជនស៊ីវិលនៅអ៊ុយក្រែន៕
None
