ថវិកាទាំងនេះ នឹងត្រូវបែងចែង ដោយក្រសួងថាមពលសហរដ្ឋអាមេរិក និងត្រូវដកចេញពីមូលនិធិហេដ្ឋរចនាសម្ព័ន្ធ ១ទ្រីលាន ដុល្លារ ដែលទើបតែត្រូវបានចុះហត្ថលេខាដោយលោកប្រធានាធិបតីចូបៃដិន កាលពីឆ្នាំមុន។ នេះបើតាមការអះអាងរបស់មន្ត្រីអាមេរិកបានកាលពីថ្ងៃចន្ទចុះផ្សាយដោយសារព័ត៌មាន CNA។
ប្រធានាធិបតីអាមេរិកលោក ចូ បៃឌិន មានគោលបំណងចង់ឱ្យរថយន្តពាក់កណ្តាល ដែលត្រូវដាក់លក់នៅអាមេរិកនៅត្រឹមឆ្នាំ២០៣០ គឺជារថយន្តអគ្គិសនី ខណៈនេះជាគោលដៅដែលលោកសង្ឃឹមថា នឹងជំរុញការងារផលិតកម្មនៅក្នុងវិស័យនេះ នៅក្នុងយុទ្ធសាស្ត្រសំខាន់ៗ ដើម្បីទប់ទល់ការប្រកួតប្រជែងរបស់ចិននៅក្នុងទីផ្សារ ដែលកំពុងរីកចម្រើនយ៉ាងឆាប់រហ័ស និងកាត់បន្ថយការបំភាយឧស្ម័នកាបូន ដែលធ្វើឲ្យមានបម្រែបម្រួលអាកាសធាតុផងដែរ។ រដ្ឋបាល លោក ចូ បៃឌិន ក៏កំពុងដាក់ចេញវិធានការនេះ ជាជំហានមួយដើម្បីធានាឯករាជ្យភាពថាមពល និង កាត់បន្ថយសម្ពាធអតិផរណារយៈពេលវែង ដែលកាន់តែធ្ងន់ធ្ងរឡើង ដោយសារតែការឈ្លានពានរបស់រុស្ស៊ីលើអ៊ុយក្រែនផងដែរ។
លោក Mitch Landrieu អ្នកសម្របសម្រួលផ្នែកហេដ្ឋារចនាសម្ព័ន្ធសេតវិមាន បានប្រាប់អ្នកយកព័ត៌មានក្នុងសន្និសីទខ្លីមួយថា នៅពេលដែលមានការប្រឈមមុខនឹងការឡើងថ្លៃប្រេង និង ឧស្ម័ន វាបានបង្ហាញពីសារៈសំខាន់ នៃយានយន្ដអគ្គិសនី ដែលអាចចូលរួមកាត់បន្ថយការចំណាយថវិកា ចាក់ប្រេងឥន្ទនៈ ដែលកំពុងឡើងថ្លៃកាន់តខ្ពស់នោះ។
អត្ថបទគួរអាន
ទន្ទឹមនឹងនេះ លោក Steven Croley ទីប្រឹក្សាទូទៅរបស់ក្រុមហ៊ុន Ford បាននិយាយនៅក្នុងសេចក្តីថ្លែងការណ៍មួយថា ការវិនិយោគលើការជំរុញគាំទ្រការផលិតអាគុយរថយន្ដអគ្គិសនីរបស់រដ្ឋាភិបាលអាមេរិកនេះ នឹងពង្រឹងខ្សែសង្វាក់ផ្គត់ផ្គង់អាគុយរថយន្ដអគ្គិសនីក្នុងស្រុក បង្កើតការងារ និង ជួយក្រុមហ៊ុនផលិតរបស់សហរដ្ឋអាមេរិកប្រកួតប្រជែងនៅលើឆាកពិភពលោក។
បន្ថែមពីនេះ មូលនិធិថវិកាសម្រាប់ប្រើប្រាស់ជំរុញការផលិតអាគុយរថយន្ដអគ្គិសនីនេះទៀតសោត ក៏នឹងជួយបង្កើត និងស្ថាបនារោងចក្រផលិតអាគុយរថយន្ដនៅអាមេរិកឲ្យកាន់តែមានភាពប្រសើរឡើង។ ជាមួយគ្នានេះ ច្បាប់ថវិកា សម្រាប់អភិវឌ្ឍហេដ្ឋរចនាសម្ព័ន្ធរបស់អាមេរិក ក៏មានបែងចែកថវិការាប់ពាន់លានដុល្លារបន្ថែមទៀត សម្រាប់រដ្ឋាភិបាលយកទៅប្រើប្រាស់ក្នុងការទិញរថយន្ដក្រុងអគ្គិសនី និងដំឡើងកន្លែងសាកអាគុយរថយន្ដកាន់តែច្រើនបន្ថែមទៀតផងដែរ។
គួរជម្រាបថា ដើម្បីជំរុញដល់ការផលិតអាគុយរថយន្តអគ្គិសនីនេះ ឲ្យកាន់តែមានប្រសិទ្ធភាព កន្លងមក រដ្ឋបាលលោក ចូ បាយឌិន បាននិងកំពុងសហការជាមួយក្រុមហ៊ុនផលិតជាច្រើន រួមទាំងនាយកប្រតិបត្តិក្រុមហ៊ុន Tesla នាយកប្រតិបត្តិ General Motors និង នាយកប្រតិបត្តិក្រុមហ៊ុន Ford ផងដែរ៕
អត្ថបទ៖ វ៉ាន់ ស្រីរ័ត្ន
None
