ទោះមិនបាននិយាយចំៗទៅលើប្រទេសចិន ដូចដែលអតីតប្រធានាធិបតីដូណាល់ ត្រាំធ្លាប់បាននិយាយកន្លងមកក្ដី ប៉ុន្តែលោក ចូ បៃឌិន នៅតែបង្ហាញពីជំហរយ៉ាងរឹងមាំក្នុងការរួបរួមគ្នាជាមួយសម្ព័ន្ធមិត្តរបស់អាមេរិក ដើម្បីប្រកួតប្រជែងទាំងផ្លូវនយោបាយ និងសេដ្ឋកិច្ច។ ការប្រកួតប្រជែង ដែលលោកបៃឌិន ទំនងជាចង់សំដៅដល់ គូប្រជែងតែមួយគត់របស់អាមេរិក គឺប្រទេសចិន។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
«សហរដ្ឋអាមេរិកនឹងដឹកនាំការប្រកួតប្រជែងដ៏ស្វិតស្វាញមួយ ជាមួយគុណតម្លៃ និងកម្លាំងរួបរួមគ្នារបស់យើង ដើម្បីសេដ្ឋកិច្ច លទ្ធិប្រជាធិបតេយ្យ និងនីតិរដ្ឋ។ យើងនឹងក្រោកឈរឡើងដើម្បីសម្ព័ន្ធមិត្ត និងមិត្តភាពរបស់យើង ហើយយើងប្រឆាំងដាច់ខាតចំពោះការប៉ុនប៉ងគ្រប់គ្រងមកលើប្រទេសទន់ខ្សោយ ពីប្រទេសដែលមានកម្លាំងខ្លាំងជាង។ យើងនឹងធ្វើការប្រឆាំងតាមគ្រប់ទម្រង់ មិនថាតាមរយៈការប្រើប្រាស់ កម្លាំង ការដាក់សម្ពាធខាងសេដ្ឋកិច្ច ឬយុទ្ធសាស្ត្រផ្សេងៗនោះទេ» ទាំងនេះជាអ្វីដែលប្រធានាធិបតីអាមេរិក លោកចូ បៃឌិន បានសង្កត់ធ្ងន់អំឡុងការឡើងថ្លែងសុន្ទរកថាក្នុងមហាសន្និបាតអង្គការសហប្រជាជាតិលើកទី៧៦នៅក្រុងញ៉ូវយ៉ក កាលពីថ្ងៃអង្គារទី២១ ខែកញ្ញា។
ទោះបីជាមិនបានសំដៅចំៗ ទៅលើប្រទេសចិន ដូចដែលអតីតប្រធានាធិបតីដូណាល់ ត្រាំ ធ្លាប់បាននិយាយក៏ពិតមែន ប៉ុន្តែ នៅក្នុងសុន្ទរកថារបស់លោក ចូ បៃ ឌិន ប្រមាណ ៣០នាទីរបស់លោក គឺបានបង្ហាញច្បាស់ពីគោលនយោបាយការបរទេសថ្មីមួយរបស់លោក ក្នុងការបន្តប្រកួតប្រជែង និងទប់ទល់នឹងការរះត្រដែតឡើងរបស់ប្រទេសចិន។ ការគូសបញ្ជាក់ច្បាស់ៗបែបនេះ គឺវាដូចទៅនឹងអ្វីដែលលោក បៃឌិន ធ្លាប់បាននិយាយកាលពីពេលដែលលោកជាប់ឆ្នោតភ្លាមៗ កាលពីដើមឆ្នាំនេះ។
ប្រធានាធិបតី លោក ចូ ប៉ៃឌិន ធ្លាប់បាននិយាយថា រដ្ឋបាលថ្មីរបស់លោក នឹងនៅតែបន្តរារាំងប្រទេសចិនពីការរះត្រដែតឡើង ព្រមទាំងបន្តប្រកួតប្រជែងជាមួយក្រុងប៉េកាំងដដែល ប៉ុន្តែលោកបៃឌិន នឹងប្រើប្រាស់វិធីសាស្ត្រផ្សេង ដោយមិនអនុវត្តតាមអ្វីដែលលោកដូណាល់ត្រាំ ធ្លាប់បានធ្វើនោះទេ។
អត្ថបទទាក់ទង
ទន្ទឹមនឹងការថ្លែងរបស់ប្រមុខដឹកនាំអាមេរិកដូចនេះ លោកចូ បៃឌិន ក៏បានឆ្លៀតរំឭកផងដែរថា ទោះបីការប្រកួតប្រជែងនៅបន្តកើតមាន ប៉ុន្តែសហរដ្ឋអាមេរិក នឹងមិនធ្វើឲ្យមានសង្គ្រាមត្រជាក់កើតឡើងជាថ្មីម្តងទៀតនោះទេ ហើយក៏មិនព្យាយាមបែងចែកពិភពលោកជាប្លុកនោះដែរ។
ផ្ទុយទៅវិញ សហរដ្ឋអាមេរិកបានបង្ហាញពីការត្រៀមខ្លួនរួចជាស្រេច ដើម្បីធ្វើការជាមួយប្រទេសណា ដែលចង់បោះជំហានទៅមុខរួមគ្នា ដើម្បីដំណោះស្រាយដោយសន្តិវិធី នូវបញ្ហាប្រឈមរួម ដូចជាវិបត្តិកូវីដ១៩ ការប្រែប្រួលអាកាសធាតុ និងរីកសាយភាយនៃអាវុធនុយក្លេអ៊ែរជាដើម។
សូមជម្រាបថា មេដឹកនាំបណ្តាប្រទេសជាច្រើនកាលពីថ្ងៃអង្គារទី២១កញ្ញា នេះ បានឡើងថ្លែងសុន្ទរកថាផ្សេងៗពីគ្នា ក្នុងមហាសន្និបាតអង្គការសហប្រជាជាតិលើកទី៧៦ ដែលធ្វើឡើងនៅស្នាក់ការកណ្តាលអង្គការសហប្រជាជាតិនាទីក្រុងញូយ៉ក។ ក្នុងនោះសន្ទរកថា របស់មេដឹកនាំមហាអំណាចទាំង២ គឺ ចិន និង អាមេរិក ត្រូវបានពិភពលោកតាមដានដោយយកចិត្តទុកដាក់បំផុត ខណៈដែលទំនាក់ទំនងនៃប្រទេសមហាអំណាចទាំង២នេះ កំពុងស្ថិតក្នុងស្ថានភាពមួយ ដ៏តានតឹងនៅឡើយទេ។
យ៉ាងណាមិញ គេសង្កេតឃើញថា ភាគីចិនមិនបានថ្លែងចំៗ ទាក់ទងនឹងបញ្ហាក្តៅបញ្ហារសើប ដូចទៅនឹងអ្វីដែលសហរដ្ឋអាមេរិក បានគូសបញ្ជាក់នោះទេ។ ផ្ទុយទៅវិញ សុន្ទរកថារបស់ចិនសង្កត់ធ្ងន់តែទៅលើបញ្ហារឿងការប្រែប្រួលអាកាសធាតុ និង វិបត្តិកូវីដ១៩ប៉ុណ្ណោះ។ ប្រការនេះអាចទំនងដោយសារតែយុទ្ធនាការប្រឆាំងនឹងជំងឺកូវីដ១៩ និង ការប្រែប្រួលអាកាសធាតុ គឺជាប្រធានបទអាទិភាពសម្រាប់មហាសន្និបាតអង្គការសហប្រជាជាតិលើកទី៧៦ឆ្នាំនេះ៕
None
