រយៈពេល៥ថ្ងៃចុងក្រោយនេះ បុគ្គលិកពេទ្យនិងអ្នកធ្វើការនៅជួរមុខ ១៦០០នាក់ នៅក្នុងតំបន់ចំនួន៩ នៅប្រទេសវៀតណាម បានចាក់ដូសទីមួយនៃវ៉ាក់សាំង AstraZeneca ដែលផលិតដោយក្រុមហ៊ុនអង់គ្លេស-ស៊ុយអែត សហការជាមួយសាកលវិទ្យាល័យ Oxford របស់អង់គ្លេស ។
នៅវៀតណាម ពុំទាន់មានករណីកំណកឈាមនៅក្នុងសរសៃបន្ទាប់ពីការចាក់វ៉ាក់សាំង AstraZeneca នៅឡើយទេ កន្លងមក ។ នេះបើតាមការឲ្យដឹងរបស់សាស្ត្រាចារ្យ Dang Duc Anh នាយកវិទ្យាស្ថានជាតិអនាម័យនិងអេពីដេមីសាស្ត្ររបស់វៀតណាម ដែលផ្សាយដោយ VN Express ។
លោកសាស្ត្រាចារ្យ Dang Duc Anh បាននិយាយថា «វៀតណាមកំពុងអនុវត្តកម្មវិធីចាក់វ៉ាក់សាំង AstraZeneca ជាបន្ត ទៅតាមការគ្រោងទុកដដែល និងបន្តតាមដានប្រតិកម្មនៅក្រោយការចាក់វ៉ាក់សាំងយ៉ាងយកចិត្តទុកដាក់ ។»
អត្ថបទទាក់ទង
គិតត្រឹមថ្ងៃសុក្រនេះ ប្រទេសអឺរ៉ុបចំនួនយ៉ាងហោចណាស់ ៩ បានប្រកាសផ្អាកការប្រើវ៉ាក់សាំង AstraZeneca នៅក្រោយពេលមានរបាយការណ៍អំពីករណីកំណកឈាមក្នុងសរសៃនៅលើខ្លួនមនុស្សដែលបានចាក់វ៉ាក់សាំង AstraZeneca ។ ហើយប្រទេសថៃ គឺជាប្រទេសអាស៊ីដំបូងគេបង្អស់ដែលបានផ្អាកជាបណ្ដោះអាសន្ននូវការប្រើវ៉ាក់សាំង AstraZeneca នេះដែរ ។
ប៉ុន្តែទោះជាយ៉ាងណា គណៈកម្មាធិការសុវត្ថិភាពនៃនិយតករឱសថអឺរ៉ុប កំពុងធ្វើការស៊ើបអង្កេតលើបញ្ហានេះ ប៉ុន្តែ បាននិយាយថា បច្ចុប្បន្ន ពុំមានភ័ស្តុតាងបញ្ជាក់ថា ការចាក់វ៉ាក់សាំង AstraZeneca បានបណ្ដាលឲ្យមានឈាមកកនៅក្នុងសរសៃនៅឡើយទេ ។
និយតករឱសថអឺរ៉ុប ក៏បានកត់សម្គាល់ផងដែរថា ទិន្នន័យដែលអាចរកបានកន្លងមក បានបង្ហាញថា ចំនួននៃករណីកំណកឈាមនៅក្នុងសរសៃក្នុងចំណោមប្រជាជនដែលបានចាក់វ៉ាក់សាំង គឺពុំមានកម្រិតខ្ពស់ជាងអ្វីដែលគេសង្កេតឃើញកើតមាននៅក្នុងចំណោមប្រជាជនទូទៅនោះទេ ។
វេជ្ជបណ្ឌិតជំនាញផ្នែកសុវត្ថិភាពវ៉ាក់សាំង នៅនិយតករឱសថនិងផលិផលថែទាំសុខភាពនៃចក្រភពអង់គ្លេស បាននិយាយថា សុវត្ថិភាពរបស់មហាជនគឺជាអាទិភាពចម្បង ហើយយើងកំពុងបន្តស៊ើបអង្កេតលើបញ្ហានេះ ប៉ុន្តែ យើងសូមបញ្ជាក់ថា ភ័ស្តុតាងដែលមានពុំបានបញ្ជាក់ថា វ៉ាក់សាំង AstraZeneca ជាបុព្វហេតុនៃការកកឈាមនៅក្នុងសរសៃឡើយ ៕
