វៀតណាមអាចរកចំណូលបានរហូតដល់ជាង៥ពាន់លានដុល្លារនៅក្នុងរយៈពេល១១ខែឆ្នាំនេះ កើនឡើងជិត៧៥% បើធៀបនឹងរយៈពេលដូចគ្នាកាលពីឆ្នាំមុន។ ក្នុងរយៈពេលដូចគ្នានេះ ប្រទេសក្បែរខាងកម្ពុជាមួយនេះបាននាំចេញអង្ករបានជិត៨លានតោន គិតជាប្រាក់ជាង៤ពាន់លានដុល្លារ កើនឡើងជាង១៦% បើធៀបនឹងការនាំចេញក្នុងរយៈពេលដូចគ្នា។ នេះបើតាមការគូសបញ្ជាក់របស់លោកស្រី ផាន ធី ថាង (Phan Thi Thắng) អនុរដ្ឋមន្ត្រីក្រសួងឧស្សាហកម្មនិងពាណិជ្ជកម្មវៀតណាម ដែលបានបន្ថែមថា ចិន សហរដ្ឋអាម៉េរិក និងជប៉ុន គឺជាទីផ្សារដែលស្រូបទាញផលិតផលកសិកម្មរបស់វៀតណាម ច្រើនជាងគេ ដោយការនាំចេញទៅប្រទេសទាំងនេះមានការកើនឡើង២៣%។
លោក ដាង ភុកឃ្វៀន ( Đặng Phúc Nguyên) អគ្គលេខាធិការនៃសមាគមបន្លែ និងផ្លែឈើវៀតណាម ចាត់ទុកឆ្នាំ២០២៣ គឺជាឆ្នាំ ដែលមានសន្ទុះខ្លាំងបំផុតសម្រាប់ការនាំចេញផលិតផលកសិកម្មរបស់វៀតណាម ជាពិសេសការនាំចេញទុរេនរបស់វៀតណាម ទៅចិនបានកើនឡើង ដល់ទៅជិត១៦២%។ យ៉ាងណាមិញ អាជ្ញាធរវៀតណាមកំពុងជំរុញការចរចាជាមួយប្រទេសចិន ដើម្បីនាំចេញទុរេនក្លាសេ និងដូងស្រស់តាមច្រកផ្លូវការបន្ថែមទៀត ហើយប្រសិនបើមិនមានបញ្ហាទីផ្សារទេនោះ ការនាំចេញផ្លែឈើ និងបន្លែរបស់វៀតណាម អាចមានតម្លៃលើសពី៦ ពាន់លានដុល្លារ ក្នុងឆ្នាំ២០២៤ ខាងមុខ។
លោក ឡេ ថាញ់ ហាវ ( Lê Thanh Hoa) អនុប្រធាននាយកដ្ឋានគុណភាព ដំណើរការ និងអភិវឌ្ឍន៍ទីផ្សារវៀតណាមបានលើកឡើងថា បច្ចុប្បន្នចិនបានផ្តល់អាជ្ញាប័ណ្ណបន្លែ និងផ្លែឈើចំនួន១២ប្រភេទដល់វៀតណាម ហើយរដ្ឋបាលគយចិន បានប្រកាសបញ្ជីឈ្មោះអាជីវកម្មកែច្នៃជលផលវៀតណាម ជាង៨០០សហគ្រាសឱ្យពូកគេមានសិទ្ធិនាំចេញផលិតផលនេសាទទៅកាន់ប្រទេសចិន ព្រមទាំងបានអនុម័តលេខកូដផលិតផលសម្រាប់គ្រឹះស្ថានវេចខ្ចប់ក្តាមរស់ និងបង្កង ព្រមទាំងផលិតផលជលផលជាច្រើនទៀតរាប់សិបសហគ្រាស៕
ដោយៈ សរ សុជាតិ
