អគ្គនាយកក្រុមវាយនភណ្ឌ និងកាត់ដេររបស់វៀតណាម លោក លី ទៀន ត្រុង បាននិយាយថា វិស័យវាយនភណ្ឌ និងកាត់ដេរវៀតណាម នឹងប្រឈមនឹងការលំបាកកាន់តែខ្លាំងឡើង នៅក្នុងពាក់កណ្ដាលឆ្នាំចុងក្រោយនៃឆ្នាំ២០២០ ធៀបនឹងពាក់កណ្ដាលឆ្នាំដំបូង។ លោក ត្រុង បន្ថែមថា នៅបច្ចុប្បន្ននេះ វាស្ទើរតែគ្មានការបញ្ជាទិញពីអ្នកបញ្ជាទិញទៅហើយនៅត្រីមាសទី៤ នៃឆ្នាំនេះ ហើយវាគឺជាបញ្ហាប្រឈមដ៏ធំបំផុតសម្រាប់ម្ចាស់រោងចក្រសហគ្រាស។ ការបញ្ជាទិញម៉ាស់ទៀតសោត ក៏មានការកាត់បន្ថយមកនៅបរិមាណកាន់តែតិចជាងមុន ខណៈដែលតម្លៃ ក៏មានការធ្លាក់ចុះជាងមុនដែរ។
នៅត្រីមាសទី ២ គឺជាពេលវេលាដ៏លំបាកបំផុត សម្រាប់វិស័យឧស្សាហកម្មវាយនភណ្ឌ និងកាត់ដេរវៀតណាម ព្រោះតែអតិថិជន នៅក្នុងទីផ្សារនាំចេញសំខាន់ៗដូចជា នៅអាមេរិក និងអឺរ៉ុប បានលុបចោលការបញ្ជាទិញប្រមាណ៣០ ទៅ៧០% ព្រោះតែប្រទេសទាំងនោះបិទទីផ្សារ នៅអំឡុងពេលមេរោគរាតត្បាត។
អត្ថបទទាក់ទង!
ក្រសួងឧស្សាហកម្ម និងពាណិជ្ជកម្មវៀតណាមបានលើកឡើងកាលពីខែកន្លងទៅនេះថា មិនមាននរណាម្នាក់ដឹងទេថា ការផ្ទុះរាលដាលនៃមេរោគនេះ នឹងត្រូវបញ្ចប់នៅពេលណានោះទេ ដូច្នេះ សហគ្រាសវាយនភណ្ឌ និងកាត់ដេរ ត្រូវការយកចិត្តទុកដាក់ ទៅលើតម្រូវការទីផ្សារក្នុងស្រុក ដោយសារតែការបញ្ជាទិញនាំចេញធ្លាក់ចុះ។ នៅគ្រាជាមួយគ្នានេះ សហគ្រាសទាំងនេះ ក៏ត្រូវគ្រប់គ្រងការចំណាយផលិតកម្ម និងអភិវឌ្ឍនូវគុណភាពផលិតផល ដើម្បីកាត់បន្ថយការធ្លាក់ចុះនៃប្រាក់ចំណូល។
បច្ចុប្បន្ន មាន៨០% នៃសហគ្រាសក្នុងវិស័យឧស្សាហកម្មវាយនភណ្ឌ និងកាត់ដេរនៅវៀតណាម បានកាត់បន្ថយការងារបុគ្គលិក ខណៈដែលអាជីវកម្មភាគច្រើនកាត់បន្ថយសមត្ថភាពប្រតិបត្តិការរហូតដល់ទៅ ៥០%។
សូមបញ្ជាក់ថា នៅរយៈពេល ៧ខែឆ្នាំនេះ ការនាំចេញផលិតផលវាយនភណ្ឌ និងកាត់ដេររបស់វៀតណាមសម្រេចបានជាង ១៩ពាន់លានដុល្លារ ធ្លាក់ចុះ ជិត១៤% ធៀបនឹងរយៈពេលដូចគ្នាកាលពីឆ្នាំមុន៕
None
