លោកសាស្ត្រាចារ្យ ង៉ោ ជី ឡុង (Ngô Trí Long) ប្រធានវិទ្យាស្ថានស្រាវជ្រាវ Price Research នៃក្រសួងហិរញ្ញវត្ថុវៀតណាម បានថ្លែងក្នុងសិក្ខាសាលាស្តីមួយ ដែលរៀបចំឡើងដោយសមាគមប្រឹក្សាហិរញ្ញវត្ថុវៀតណាម កាលពីថ្ងៃទី ១៩ ខែ មេសា ថា ក្នុងកិច្ចខិតខំប្រឹងប្រែងដើម្បីដោះស្រាយបញ្ហាប្រឈមដែលកំពុងកើតមាននៅក្នុងទីផ្សារអចលនទ្រព្យក្នុងស្រុកនាពេលបច្ចុប្បន្ន វិធានការបន្ទាន់នោះ គឺត្រូវមានវិធីសាស្រ្តដែលគ្របដណ្តប់លើដំណោះស្រាយផ្លូវច្បាប់ រដ្ឋបាល និងហិរញ្ញវត្ថុ ជាពិសេសនៅក្នុងវិស័យឥណទានតែម្ដង។
ដោយឡែក លោកបណ្ឌិត ឡេ មិញ ងេ ( Lê Minh Nghĩa )អនុប្រធានសមាគមប្រឹក្សាហិរញ្ញវត្ថុវៀតណាមបាននិយាយក្នុងអំឡុងកិច្ចពិភាក្សាដដែលនេះដែរថា ដើមទុនភាគច្រើនដែលដាក់វិនិយោគដោយផ្ទាល់នៅក្នុងទីផ្សារអចលនទ្រព្យគឺស្ថិតក្នុងកម្រិតមួយដែលមាននិរន្តរភាព ហើយជាទូទៅមានទម្រង់នៃការវិនិយោគចាប់ពីរយៈពេលមធ្យមទៅវែង។ ទោះជាយ៉ាងណាក៏ដោយ អស់រយៈពេលជាច្រើនឆ្នាំមកនេះ ទីផ្សារអចលនទ្រព្យរបស់វៀតណាមបានពឹងផ្អែកយ៉ាងខ្លាំងលើឥណទានធនាគារ ដែលមានទំហំប្រហែលជាជាង ១១០ ពាន់លានដុល្លារ ពោលគឺមានតម្លៃជិត ២០% នៃដើមទុនសរុបរបស់ប្រទេស។
អ្នកជំនាញរូបនេះ បានបន្តថា ក្នុងន័យនេះ ការខិតខំនាពេលថ្មីៗនេះបានស្វែងរកការធ្វើពិពិធកម្មប្រភពដើមទុន ដោយបានវិនិយោគទៅក្នុងទីផ្សារភាគហ៊ុន មូលបត្របំណុល និងការវិនិយោគបរទេស ក្នុងគោលបំណងចាំមើលពីការងើបឡើងវិញ និងកំណើននៅក្នុងទីផ្សារអចលនទ្រព្យ។
ទោះបីជាយ៉ាងណាក៏ដោយ ចាប់ពីឆមាសទីពីរ នៃឆ្នាំ ២០២២មក ទីផ្សារអចលនទ្រព្យ និងអាជីវកម្មសំណង់នៅវៀតណាមបានជួបប្រទះការលំបាកជាច្រើន ជាពិសេសទាក់ទងនឹងដើមទុនបង្វិល និងនីតិវិធីច្បាប់។ ក្រៅពីនោះ អត្រាការប្រាក់កម្ចី ថ្លៃសាំង និងប្រេង តម្លៃសម្ភារៈសំណង់ និងថ្លៃពលកម្មបានកើនឡើង ដែលនាំឱ្យតម្លៃផលិតកម្មកើនឡើងខ្ពស់សម្រាប់អាជីវកម្មអចលនទ្រព្យដូចគ្នា ហើយកត្តាទាំងនោះបានធ្វើឲ្យគម្រោងជាច្រើនត្រូវបញ្ឈប់ការសាងសង់។
អត្ថបទគួរអាន
ជុំវិញបញ្ហានេះ ដើម្បីលុបបំបាត់ការលំបាកទាំងនោះ សម្រាប់ទីផ្សារអចលនទ្រព្យ លោកសាស្ត្រាចារ្យ ង៉ោ ជី ឡុង (Ngô Trí Long) ប្រធានវិទ្យាស្ថានស្រាវជ្រាវ Price Research នៃក្រសួងហិរញ្ញវត្ថុវៀតណាម បាននិយាយថា វៀតណាមចាំបាច់ត្រូវផ្តោតលើការផ្តល់ឥណទានលើគម្រោងអចលនទ្រព្យដែលមានសិទ្ធិ និងលទ្ធភាពទទួលបានកម្ចី និងផ្នែកលំនៅដ្ឋានដែលទីផ្សារមានតម្រូវការពិតប្រាកដ។
អ្នកជំនាញរូបនេះអះអាងថា ឥឡូវនេះ ធនាគាររដ្ឋគួរតែពិចារណាលើការបែងចែកគម្រោងអចលនទ្រព្យ និងអ្នកវិនិយោគ ដើម្បីរក្សាស្ថិរភាពទីផ្សារ ក៏ដូចជាសតិអារម្មរបស់អ្នកទិញផ្ទះ។ បន្ថែមពីនេះ រដ្ឋត្រូវគ្រប់គ្រងហានិភ័យឥណទានសម្រាប់ផ្នែកអចលនទ្រព្យ ហើយក៏ត្រូវបន្ដការផ្តល់ឥណទានសម្រាប់សហគ្រាស និងគម្រោងអចលនទ្រព្យផងដែរ។
ក្រៅពីយន្តការទាំងនេះ អ្នកជំនាញវៀតណាមក៏បានជំរុញឲ្យរដ្ឋាភិបាលវៀតណាម អនុវត្តកញ្ចប់ឥណទានដែលមានទំហំប្រមាណជាង ៥ ពាន់លានដុល្លារសម្រាប់គាំទ្រដល់កម្មវិធីគម្រោងលំនៅដ្ឋានសង្គម កម្មវិធីផ្តល់ប្រាក់កម្ចីសម្រាប់អភិវឌ្ឍគម្រោងលំនៅដ្ឋាន និងលំនៅដ្ឋានរបស់កម្មករ និងការធ្វើឱ្យប្រសើរឡើង ឬសាងសង់ផ្ទះល្វែងចាស់ឡើងវិញជាដើម៕
អត្ថបទ ៖ សរ សុជាតិ
