នៅក្នុងរបាយការណ៍ចុងក្រោយរបស់ក្រុមហ៊ុន បៅ វៀត ស៊ីឃ្យូរ៉ីធី បានបង្ហាញថា វិស័យសេវាកម្មរបស់វៀតណាមបានចូលរួមចំណែករហូតដល់ទៅ ៤១% នៃ GDP របស់វៀតណាម កាលពីឆ្នាំ ២០១៩កន្លងទៅ ហើយវានឹងរងផលប៉ះពាល់ពីជំងឺរលាកផ្លូវដង្ហើមបង្ករដោយវីរុសកូរ៉ូណានេះ ដូចជា វិស័យលក់រាយ វិស័យដឹកជញ្ជូន វិស័យទេសចរណ៍ និងកម្សាន្តជាដើម។
កាលពីពេលថ្មីៗនេះ ក្រសួងសន្តិសុខសាធារណៈវៀតណាម ក៏បានបញ្ជាឲ្យមាន ការបិទវីសា ចំពោះភ្ញៀវទេសចរមកពី តំបន់ដែលមានមេរោគកូរ៉ូណា ដែលភាគច្រើនពួកគេជា ភ្ញៀវទេសចរណ៍ចិន ហើយវាបានប៉ះពាល់យ៉ាងធ្ងន់ធ្ងរដល់ វិស័យទេសចរណ៍ ក្នុងត្រីមាសទី ១ ឆ្នាំ២០២០នេះ។
ម្យ៉ាងទៀត អាជ្ញាធរអាកាសចរណ៍ស៊ីវិលវៀតណាម ក៏បានសម្រេចផ្អាកជើងហោះហើរជាមួយ ចិន ភ្លាមៗតែម្តង ក្រោយការរីករាលដាលនៃមេរោគកូរ៉ូណា ដោយចាត់ទុកជា ផ្អែកមួយនៃយុទ្ធសាស្ត្រការពារជំងឺឆ្លងកូរ៉ូណា។
អត្ថបទទាក់ទង!
លើសពីនេះទៅទៀត ការផ្ទុះឡើងនូវ ជំងឺរលាកផ្លូវដង្ហើមនេះ ក៏ប៉ះពាល់ដល់ ការនាំចេញរបស់វៀតណាម ដូចជា ផលិតផលកសិកម្ម និងជលផល ដែលប្រទេសចិន ជាទីផ្សារប្រើប្រាស់ធំជាងគេបំផុតរបស់វៀតណាម។
តួយ៉ាង ឡានដឹកផ្លែឈើជាច្រើនគ្រឿង គឺកំពុងជាប់គាំងនៅច្រកព្រំដែន វៀតណាម-ចិន ដោយសារតែ បន្ទាប់ពី វីរុសកូរ៉ូណា ផ្ទុះឡើង ហាងលក់ទំនិញជាច្រើននៅចិន បានផ្អាកដំណើរការជាបណ្តោះអាសន្ន ធ្វើឲ្យតម្រូវការធ្លាក់ចុះខ្លាំង ទើបឈ្មួញចិន សម្រេចឈប់ទិញផ្លែឈើទាំងនោះ។
អនុរដ្ឋមន្ត្រីនៃក្រសួងឧស្សាហកម្ម និងពាណិជ្ជកម្មវៀតណាម បានពន្យល់ដែរថា ឥទ្ធិពលអាក្រក់នេះ អាចនឹងអូសបន្លាយពេលយូរ រហូតដល់ទៅ ៨ខែ សម្រាប់វិស័យកសិកម្ម និងផលិតផលគ្រឿងសមុទ្រវៀតណាម ហើយរដ្ឋាភិបាលវៀតណាម ក៏បានស្នើឲ្យ អាជីករ និងពាណិជ្ជករ ងាកមកបែងចែកផលិតផលទាំងនោះ ក្នុងទីផ្សារក្នុងស្រុកជាបណ្តោះអាសន្នសិន។
គួរជម្រាបដែរថា រដ្ឋាភិបាលវៀតណាម ក៏ប្រកាសនឹងស្វែងរកទីផ្សារថ្មី សម្រាប់ផលិតផលកសិកម្មវៀតណាម ចៀសវាងការពឹងផ្អែកតែលើ ទីផ្សារប្រទេសចិន ខណៈក្នុងឆ្នាំ ២០១៩កន្លងទៅ វៀតណាម សម្រេចការនាំចេញផលិតផលកសិកម្ម និងគ្រឿងសមុទ្រប្រមាណ ៤១ពាន់លានដុល្លារអាមេរិក ក្នុងនោះ ចិន កាន់កាប់ចំណែកប្រមាណ ២៧%៕
None
