បើទោះបីជា វៀតណាមផលិតថាមពលបានកាន់តែច្រើនក្ដី ប៉ុន្ដែ បញ្ហាកង្វះខាតថាមពលប្រើប្រាស់នៅក្នុងប្រទេសនេះ នៅតែបន្ដកើតមាននៅតាមតំបន់មួយចំនួន ដោយសារតែតម្រូវការប្រើប្រាស់ក៏កំពុងមានការកើនឡើងកាន់តែច្រើន និងបញ្ហាអាកាសធាតុផងដែរ។
ប្រធាននាយកប្រតិបត្តិអគ្គិសនីវៀតណាម លោក ត្រាន់ ឌិញញ៉ាន (Tran Dinh Nhan) បានអះអាងថា សមត្ថភាពផលិតអគ្គិសនីរបស់វៀតណាមមានការកើនឡើងជិត១០% កាលពីឆ្នាំ២០២១។ ប៉ុន្ដែ លោកក៏បានលើកឡើងពីក្ដីបារម្ភផងដែរថា អំពីការលំបាកក្នុងការគ្រប់គ្រងលើការបែងចែកថាមពលដែលបានមកពីប្រភពថាមពលកកើតឡើងវិញ ដោយថាមពលប្រភេទនេះ បច្ចុប្ន្នគឺមានប្រហែល២៧% នៃថាមពលសរុបរបស់វៀតណាម។
ប្រធាននាយកប្រតិបត្តិអគ្គិសនីវៀតណាមលើកឡើងថា នៅអំឡុងពេលមានការបិទខ្ទប់ការផលិតអគ្គិសនី គឺមានកើនដល់ទៅ ៦០% បានមកពីប្រភពថាមពលកកើតឡើងវិញ ហើយដោយសារតែសកម្មភាពរោងចក្រសហគ្រាសត្រូវបានផ្អាក វាក៏បានធ្វើឲ្យការផ្គត់ផ្គង់អគ្គិសនីនៅវៀតណាមកាលពីឆ្នាំ២០២១ មានពេលខ្លះ លើសតម្រូវការទៅទៀត។អត្ថបទគួរអាន
ទោះយ៉ាងណា អគ្គិសនីវៀតណាមបានព្យាករថា នៅក្នុងខែមិថុនាខាងមុខនេះ នៅពេលដែលកម្ដៅឡើងក្ដៅខ្លះ នៅភាគខាងជើងនៃប្រទេសវៀតណាម អាចនឹងមានជួបបញ្ហាខ្វះខាតអគ្គិសនីប្រើប្រាស់ ខណៈដែលនៅតំបន់ភាគកណ្ដាល និងភាគខាងត្បូង គឺអាចនឹងមានការផ្គត់ផ្គង់លើសតម្រូវការ។
ការប្រើប្រាស់អគ្គិសនីនៅវៀតណាមនៅក្នុងឆ្នាំ២០២២នេះ ត្រូវបានរំពឹងថា នឹងកើនឡើងជាង៧% ដោយមានទំហំថាមពលដល់ទៅប្រមាណជាង ២៤២ ពាន់លានគីឡូវ៉ាត់ម៉ោង។
សូមបញ្ជាក់ថា ប្រភពថាមពលកកើតឡើងវិញនៅវៀតណាម គឺភាគច្រើនបានមកពី ថាមពលសូឡាមានជាង ១ម៉ឺន៦ពាន់មេហ្គាត់ ថាមពលដើរដោយកម្លាំងខ្យល់បក់មានជាង ៤ពាន់មេហ្គាវ៉ាត់ និងមួយចំនួនទៀត បានមកថាមពលជីវម៉ាស់ ។ ប្រទេសវៀតណាម ក៏បានកំណត់គោលដៅ ផលិតផលថាមពល ពីប្រភពថាមពលកកើតឡើងវិញឲ្យបានដល់ ៧៥% នៃការផលិតថាមពលសរុបនៅឆ្នាំ២០៤៥ផងដែរ៕None
