វៀតណាម ធ្វើ​កំណែទម្រង់ទ្រង់ទ្រាយធំ ដើម្បីកៀរគរដើមទុនពីផ្សារភាគហ៊ុនឱ្យបាន៧៦ពាន់លានដុល្លារអាម៉េរិកក្នុងមួយឆ្នាំ

ឧបនាយករដ្ឋមន្ត្រីវៀតណាម លោក ង្វៀន វ៉ាន់ ថាង (Nguyen Van Thang) បានអនុម័តផែនការកំណែទម្រង់ហិរញ្ញវត្ថុរយៈពេលវែង ដែលនឹងធ្វើទំនើបកម្មប្រព័ន្ធធនាគារ ទីផ្សារភាគហ៊ុន ទីផ្សារមូលបត្របំណុល វិស័យធានារ៉ាប់រង និងផលិតផលហិរញ្ញវត្ថុថ្មីៗក្រោមយុទ្ធសាស្ត្រជាតិតែមួយ។ តាមផែនការនេះនៅឆ្នាំ២០៣០ វៀតណាម មានគោលដៅកៀរគរដើមទុនពីទីផ្សារមូលធនឱ្យបានរហូតដល់ទៅប្រមាណ៧៦ពាន់លានដុល្លារអាម៉េរិកក្នុងមួយឆ្នាំ។ ចាប់ពីឆ្នាំ២០៣១ ដល់ឆ្នាំ២០៤៥ ទីផ្សារមូលធនត្រូវបានរំពឹងថា នឹងអាចផ្ដល់ហិរញ្ញប្បទានបានចន្លោះពី៣០% ទៅ៣៥% នៃការវិនិយោគសរុបរបស់ប្រទេសនេះ។
វិធានការនេះកើតឡើងដោយសារវៀតណាម ពឹងផ្អែកខ្លាំងពេកលើកម្ចីឥណទានរបស់ធនាគារអស់រយៈពេលជាច្រើនឆ្នាំមកហើយ។ ជាក់ស្ដែងនៅអំឡុងឆ្នាំ២០២៥ អនុបាតឥណទានធៀបនឹង GDP បានកើនដល់១៤៥% ដែលជាកម្រិតខ្ពស់បំផុតនៅអាស៊ីអាគ្នេយ៍ និងបានដាក់សម្ពាធយ៉ាងខ្លាំងលើប្រព័ន្ធធនាគារក្នុងការផ្តល់ហិរញ្ញប្បទានដល់អាជីវកម្ម និងគម្រោងហេដ្ឋារចនាសម្ព័ន្ធធំៗ។

ដើម្បីទាក់ទាញវិនិយោគិនឱ្យបានកាន់តែច្រើន វៀតណាម គ្រោងពង្រីកទីផ្សារភាគហ៊ុន និងមូលបត្របំណុល បង្កើតទីផ្សារសាកល្បងសម្រាប់ទ្រព្យសកម្មគ្រីបតូ និងឥណទានកាបូន បង្កើតវេទិកា ឬ Platform ជួញដូរសម្រាប់ក្រុមហ៊ុន Startup កែលម្អអភិបាលកិច្ចសាជីវកម្ម និងបង្កើនតម្លាភាពហិរញ្ញវត្ថុ ព្រមទាំងសម្រួលនីតិវិធីឱ្យវិនិយោគិនបរទេសងាយស្រួលវិនិយោគ និងងាយស្រួលផ្ទេរប្រាក់ចេញ-ចូលប្រទេសនេះ។ លើសពីនេះ រដ្ឋាភិបាលវៀតណាមក៏មានផែនការបង្កើនទំហំទីផ្សារមូលបត្របំណុលឱ្យស្មើ៦០% នៃ GDP នៅឆ្នាំ២០៣០ និងជំរុញឱ្យតម្លៃទីផ្សារភាគហ៊ុនកើនដល់១២០% នៃ GDP នៅឆ្នាំ២០៤៥។
ក្រុមអ្នកវិភាគមើលឃើញថា កំណែទម្រង់នេះបង្ហាញថា ការអភិវឌ្ឍទីផ្សារមូលធនបានក្លាយជាគោលនយោបាយអាទិភាពជាតិរបស់វៀតណាម។ ទោះជាយ៉ាងណា ពួកគេព្រមានថា ភាពជោគជ័យនៃផែនការដ៏មហិច្ឆតានេះនឹងអាស្រ័យលើល្បឿន នៃការអនុវត្តគោលនយោបាយ និងការប្រែក្លាយការសន្យាទៅជាសកម្មភាពជាក់ស្តែង៕

ដោយ: តែម សុខុម