យោងតាមការស្ទង់មតិរបស់ បណ្តាញសារព័ត៌មានជប៉ុនដ៏ធំមួយ បានគូសបញ្ជាក់ថា ប្រទេសវៀតណាម ត្រូវបានក្រុមហ៊ុនវិនិយោគជប៉ុន ចាត់ទុកជា គោលដៅដ៏មានសក្តានុពល និងទាក់ទាញបំផុត សម្រាប់ឆ្នាំ ២០២០នេះ ដោយសារតែប្រទេសវៀតណាម នៅមានសក្តានុពលសម្រាប់ការលូតលាស់ខ្ពស់ និងមានកម្លាំងពលកម្មដែលមានជំនាញ និងតម្លៃប្រាក់ឈ្នួលទាប។
លើសពីនេះទៅទៀត អ្នកវិនិយោគ ក៏មើលឃើញពីភាពជិតស្និទ្ធនៃទំនាក់ទំនងរវាង វៀតណាម និងប្រទេសចិន ដែលជាសេដ្ឋកិច្ចយក្សទី ២ លើពិភពលោក ហើយវាក៏ជាគន្លឹំះសំខាន់មួយ ដែលទាក់ទាញការវិនិយោគពីក្រៅប្រទេស មកកាន់វៀតណាមផងដែរ។
អត្ថបទទាក់ទង!
យ៉ាងណាក៏ដោយ ប្រទេសវៀតណាម នៅតែរំពឹងថា នឹងអាចទទួលបានការវិនិយោគផ្ទាល់ពីក្រៅប្រទេសបន្ថែមទៀត ជាពិសេសគឺ មកពី ប្រទេសជប៉ុន ដែលជាការវិនិយោគប្រកបដោយគុណភាពខ្ពស់ ទៅលើគម្រោងអភិវឌ្ឍន៍ហេដ្ឋារចនាសម្ព័ន្ធជាច្រើន។
បើតាមក្រសួងផែនការ និងវិនិយោគវៀតណាមបានឲ្យដឹងថា ប្រទេសវៀតណាម ពិតជាមានតម្រូវការធំណាស់លើការសាងសង់ហេដ្ឋារចនាសម្ព័ន្ធ ដែលជាសសៃឈាមដ៏សំខាន់ សម្រាប់សេដ្ឋកិច្ចជាតិ ហើយរដ្ឋាភិបាល ក៏កំពុងតែប្រមូលថវិកាជាតិ ភាពជាដៃគូរដ្ឋ-ឯកជន និងជំនួយអភិវឌ្ឍន៍ផ្លូវការពីដៃគូបរទេសផងដែរ។
ទីភ្នាក់ងារវិនិយោគបរទេសស្ថិតក្រោមក្រសួងផែនការ និងវិនិយោគវៀតណាម ក៏បានបង្ហាញនៅក្នុងរបាយការណ៍ឲ្យដឹងដែរថា នៅក្នុងឆ្នាំ ២០១៩ ប្រទេសវៀតណាម ទទួលបានការវិនិយោគដោយផ្ទាល់ពីបរទេស ប្រមាណ ៣៨ពាន់លានដុល្លារអាមេរិក ដែលកើនឡើង ៧% ធៀបនឹងឆ្នាំ ២០១៨ ហើយតួលេខនេះ គឺកើនខ្ពស់បំផុតមិនធ្លាប់មាន ក្នុងរយៈពេល ១០ឆ្នាំចុងក្រោយនេះ។
ក្នុងចំណោម ១២៥ប្រទេស ដែលវិនិយោគនៅក្នុងប្រទេសវៀតណាម គឺប្រទេសកូរ៉េខាងត្បូង ឈរលើកំពូលតារាង ហើយហុងកុង ឈរលេខ ២ និងសិង្ហបុរី ឈរលេខ ៣ ខណៈដែរ ជប៉ុន ឈរនៅលេខរៀងទី ៤៕
None
