ទីផ្សារអចលនទ្រព្យវៀតណាម កំពុងមានសេចក្តីសង្ឃឹមឡើងវិញ ក្រោយធនាគារកណ្ដាលបន្ថយអត្រាការប្រាក់

តើធនាគារកណ្តាលវៀតណាម ធ្វើការកែសម្រួលអាត្រាការប្រាក់ដើម្បីគំាទ្រទីផ្សារអចលនទ្រព្យនៅក្នុងប្រទេស ដែលមានប្រជាពលរដ្ឋជិត ១០០ លាននាក់នេះដោយរបៀបណា?

តាមសេចក្តីរាយការណ៍របស់សារព័ត៌មាន Vietnam News ដែលបានចេញផ្សាយកាលពីថ្ងៃទី ២៥ ខែ មីនា ឆ្នាំ២០២៣ នេះបានបង្ហាញថា ធនាគារកណ្តាលវៀតណាមបានសម្រេចកាត់បន្ថយអត្រាការប្រាក់១% ពោលគឺពី អត្រា៤,៥ % មកនៅត្រឹម ៣,៥% នៅក្នុងមួយឆ្នាំ ស្របពេលដែលអត្រាការប្រាក់កម្ចីដែលផ្ដល់ពីធនាគារមួយទៅកាន់ធនាគារមួយទៀត ក៏បានបញ្ចុះពីអត្រា ៧% មកនៅត្រឹម ៦%ផងដែរ។

ជុំវិញការសម្រេចចិត្តនេះ អ្នកជំនាញ និងសេដ្ឋវិទូវៀតណាមបាននិយាយថា នេះគឺជាសញ្ញាវិជ្ជមានសម្រាប់ការងើបឡើងវិញនៃទីផ្សារអចលនទ្រព្យនៅក្នុងប្រទេស ក្រោយពេលដែល វាបានរងសំពាធប្រមាណជា ២ ឆ្នាំចុងក្រោយនេះ។

លោក Can Van Luc សមាជិកនៃក្រុមប្រឹក្សាហិរញ្ញវត្ថុ និងរូបិយវត្ថុជាតិបាននិយាយថា ការទម្លាក់អត្រាការប្រាក់នេះ ទំនងជានឹងនាំឱ្យមានការកែលម្អនូវតម្រូវការសាច់ប្រាក់ដែលត្រូវការច្រើននៅក្នុងទីផ្សារអចលនទ្រព្យ។

លោក បាននិយាយថា ការសម្រេចនេះក៏អាចនឹងកែសម្រួលតម្លៃនៃទីផ្សារអចលនទ្រព្យ ពោលគឺ អាចផ្តល់ឱកាសទទួលបានការគាំទ្រហិរញ្ញវត្ថុ ដើម្បីបញ្ចប់គម្រោង ដែលកំពុងដំណើរការ ឫ ក៏ត្រួសត្រាយឲ្យមានការគិតគូរៀបចំចាប់ផ្តើមគម្រោងថ្មីៗបន្តទៀត ប៉ុន្តែទោះបីជាយ៉ាង ណាក៏ដោយ ក៏អ្នកវិនិយោគភាគច្រើននៅមានការប្រុងប្រយ័ត្នបំផុតនៅក្នុងស្ថានភាព សេដ្ឋកិច្ច បច្ចុប្បន្ននេះ ។

ពាក់ព័ន្ធនឹងបញ្ហាទីផ្សារអចលនទ្រព្យនៅវៀតណាមនេះ ក្រុមហ៊ុនជួញដូមូលបត្រនៅផ្សារហ៊ុន វៀតណាម គឺ VNDirect បានអះអាងថា មូលបត្របំណុលសាជីវកម្មរបស់អ្នកអភិវឌ្ឍន៍អចលនទ្រព្យកាលពីឆ្នាំ២០២២ មានតម្លៃប្រមាណជា ៦២ ទ្រីលាន ដុង ឫ ប្រមាណជាង ២ ពាន់៦រយលានដុល្លារ ពោលគឺធ្លាក់ចុះ ៧៩ ភាគរយបើធៀបនឹងឆ្នាំមុន៕