យោងតាមអ្នកតំណាងមកពីសហគមន៍ម្រេចអន្តរជាតិ (IPC) បានឱ្យដឹងថា អ្នកផលិតកែច្នៃវៀតណាមទំនងជាប្រឈមនឹងកង្វះខាតម្រេចសម្រាប់ការកែច្នៃ និងនាំចេញនៅឆ្នាំ ២០២២ ខណៈតម្រូវការម្រេចកំពុងតែមានការកើនឡើងយ៉ាងច្រើនឡើងវិញនៅជុំវិញពិភពលោក។ ដោយសារភោជនីយដ្ឋាន និងសេវាកម្មអាហារត្រូវបានអនុញ្ញាតឱ្យបើកដំណើរការឡើងវិញនៅតាមបណ្ដាប្រទេសជាច្រើន។
យ៉ាងណាមិញ យោងតាមប្រធានសមាគមម្រេចវៀតណាមបានឱ្យដឹងថា វៀតណាមកំពុងពិចារណានាំចូលម្រេចពីប្រទេសជិតខាង ពិសេសពីប្រទេសកម្ពុជាតែម្ដង ដើម្បីធានាការផ្គត់ផ្គង់គ្រប់គ្រាន់សម្រាប់ដំណើរការក្នុងស្រុក។ លោកបន្តថា កាលពី ឆ្នាំមុន ការនាំចូលម្រេចរបស់វៀតណាមពីកម្ពុជាបានកើនឡើងដល់ទៅ ១១១% ធៀបនឹងឆ្នាំ ២០២០។
ប្រធានសមាគមម្រេចវៀតណាម អះអាងថា ទិន្នផលបម្រេចនៅតាមខេត្តនៃប្រទេសកម្ពុជា ដែលជាប់នឹងព្រំដែនវៀតណាម អាចនឹងមានដល់៣ម៉ឺនតោនក្នុងមួយឆ្នាំ។ បើទោះបីជា ចំនួនទិន្នផលនេះ មានប្រហែលត្រឹមតែ ១ភាគ១០ នៃទិន្នផលម្រេចរបស់វៀតណាមក្ដី ប៉ុន្ដែ វៀតណាមរំពឹងថា ម្រេចពីកម្ពុជាទាំងនេះ នឹងជួយបំពេញតម្រូវការម្រេចដែលកំពុងខ្វះខាត។អត្ថបទគួរអាន
ទិន្នន័យពីសមាគមម្រេចវៀតណាម បង្ហាញថា ម្រេចត្រូវបានលក់ក្នុងតម្លៃជិត ៤ ដុល្លារក្នុងមួយគីឡូក្រាមកាលពីឆ្នាំមុន ដែលកើនឡើងស្ទើរតែទ្វេដងធៀបនឹងឆ្នាំមុន ដែលមានតម្លៃតែជាង ២ដុល្លារក្នុងមួយគីឡូក្រាមប៉ុណ្ណោះ បន្ទាប់ពីការដំណាំម្រេចនៅក្នុងប្រទេសវៀតណាមបានថយចុះជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ។
ទន្ទឹមនេះប្រធានសមាគមម្រេច គូសបញ្ជាក់ទៀតថា ដើម្បីអភិវឌ្ឍឧស្សាហកម្មម្រេចប្រកបដោយនិរន្តរភាព រដ្ឋាភិបាល និងក្រសួងស្ថាប័នពាក់ព័ន្ធត្រូវតែផ្តល់ព័ត៌មានថ្មីៗត្រឹមត្រូវ និងទាន់ពេលវេលាអំពីតំបន់ដែលជាទីផ្សារគ្រឿងទេសរបស់វៀតណាម និងពិភពលោក ក៏ដូចជាព័ត៌មានផ្សេងទៀតទាក់ទងនឹងការកែច្នៃ ការចែកចាយ និងការប្រើប្រាស់ ដើម្បីជួយអ្នកផលិតបង្កើតយុទ្ធសាស្ត្រសមស្រប។
សូមជម្រាបថា ក្នុងឆ្នាំ ២០២១ វៀតណាមបាននាំចេញម្រេចចំនួន ២៦ម៉ឺនតោនថយចុះ ៩% និងមានតម្លៃទឹកប្រាក់ប្រហែល ៩៥០ លានដុល្លារអាមេរិក កើនឡើង ៤៤ ភាគរយនៅក្នុងតម្លៃធៀបនឹងឆ្នាំ ២០២០ ៕
None
