វៀតណាមនឹងបន្ដខ្ចីលុយបរទេសបន្ថែម ដើម្បីស្តារ និងជំរុញកំណើនសេដ្ឋកិច្ចជាតិ

រដ្ឋមន្ត្រីក្រសួងអភិវឌ្ឍជាតិវៀតណាម លោក Nguyen Chi Dung បានប្រាប់ទៅរដ្ឋសភាជាតិវៀតណាមនៅថ្ងៃសុក្រសប្តាហ៍នេះថា បើមិនដំឡើងកម្រិតបំណុលសាធារណៈទេ វៀតណាមនឹងមិនមានធនធានគ្រប់គ្រាន់សម្រាប់ការលូតលាស់និងស្តារសេដ្ឋកិច្ចក្រោយវិបត្តិកូវីដ១៩នោះឡើយ។ 

ជាក់ស្តែង ផលិតផលក្នុងស្រុកសរុប ឬGDP របស់វៀតណាមបានធ្លាក់ចុះជាង ៦% នៅត្រីមាសទី៣ ឆ្នាំ២០២១នេះ បើធៀបនឹងរយៈពេលដូចគ្នាកាលពីឆ្នាំមុន។ ការធ្លាក់ចុះនេះ ជាកម្រិតធំបំផុតមួយក្នុងប្រវត្តិសាស្ត្រ ដែលវាបានបង្កឡើងដោយ ការផ្ទុះរាលដាលកូវីដ១៩យ៉ាងខ្លាំង កាលពីអំឡុងខែកក្កដា ដល់ខែកញ្ញា។

យ៉ាងណាមិញ គេមិនទាន់សម្រេចថា គួរដំឡើងដល់កម្រិតបំណុលសាធារណៈប៉ុន្មាននោះទេ ដោយរដ្ឋាភិបាលក្រុងហាណូយ គ្រាន់តែបានអះអាងថានឹងមិនដំឡើងខ្ពស់ពេកនោះទេ ព្រោះវានឹងនាំឲ្យមានអស្ថិរភាពម៉ាក្រូសេដ្ឋកិច្ច។

ប្រទេសក្បែរខាងកម្ពុជាមួយនេះ បានកំណត់គោលដៅកំណើនសេដ្ឋកិច្ច ៦.៥% សម្រាប់ពេញមួយឆ្នាំ២០២១នេះ ប៉ុន្តែបច្ចុប្បន្នវៀតណាមកំពុងប្រឈមនឹងសម្ពាធ កំណើនលើអតិផរណា ពេលខ្លួនបើកចំហប្រទេសឡើងវិញនៅពេលខាងមុខដ៏ខ្លី។ នេះបើតាមការអះអាងពីធនាគារកណ្តាលវៀតណាម។

សូមជម្រាបថា ប្រទេសវៀតណាមកន្លងមក បានគ្រប់គ្រងដោយជោគជ័យនូវការរាលដាល នៃជំងឺកូវីដ១៩ ប៉ុន្តែមកដល់ពាក់កណ្តាលឆ្នាំនេះ រលកឆ្លងបានបោកបក់ខ្លាំងនៅទីក្រុងហូជីមិញ និងតំបន់ឧស្សាហកម្មសំខាន់ៗនៅជុំវិញទីក្រុង ដែលបានបង្ខំចិត្តឲ្យគេដាក់ចេញវិធានការបិទខ្ទប់ជាបន្តបន្ទាប់ ប្រការនេះបានប៉ះពាល់ដល់សេដ្ឋកិច្ចវៀតណាមយ៉ាងខ្លាំង។

ករណីឆ្លងសរុបនៅវៀតណាម បានកើនឡើងដល់១លាននាក់ កាលពីថ្ងៃព្រហស្បតិ៍សប្តាហ៍នេះ ខណៈអ្នកស្លាប់សរុបកើនជិត ២ម៉ឹន៣ពាន់នាកហើយ៕