នៅក្នុងរបាយការណ៍ថ្មីៗនេះ Fitch Ratings បានឱ្យដឹងថា ភាពប្រសើរឡើងកម្រិតនៃការចាក់វ៉ាក់សាំងកូវីដ១៩នៅក្នុងប្រទេសវៀតណាមអាចនឹងកាត់បន្ថយហានិភ័យនៃការងើបឡើងវិញនៃសេដ្ឋកិច្ចរបស់ប្រទេសនេះពីវិបត្តិកូវីដ១៩។ តែទោះជាយ៉ាងណាក៏ដោយ ការវិវត្តន៍នៃជំងឺរាតត្បាតនេះ គឺនៅតែស្ថិតក្រោមភាពមិនច្បាស់លាស់ ខណៈដែលករណីឆ្លងប្រចាំថ្ងៃក្នុងប្រទេសនេះនៅតែកើនឡើងខ្ពស់ក្នុងប៉ុន្មានខែថ្មីៗនេះ។
កំណើនសេដ្ឋកិច្ចវៀតណាមនៅឆ្នាំ២០២១ ត្រូវបានប៉ាន់ប្រមាណមានត្រឹមតែ ២,៦ ភាគរយប៉ុណ្ណោះ ពោលគឺទាបជាងអ្វីដែល ស្ថាប័ន Fitch Ratings បានរំពឹងទុក ៧ ភាគរយ កាលពីខែមេសា ឆ្នាំ ២០២១។ ស្ថាប័នអន្តរជាតិនេះគូសបញ្ជាក់ថា មួយផ្នែកនៃដើរយឺតនៃសេដ្ឋកិច្ចវៀតណាមកាលពីឆ្នាំ២០២១ គឺបានឆ្លុះបញ្ចាំងតាមរយៈការធ្លាក់ចុះ ៦ ភាគរយក្នុងផលិតផលក្នុងស្រុកសរុបនៅក្នុងត្រីមាសទី ៣ ខណៈដែលការធ្លាក់ចុះនេះ គឺដោយសារអាជ្ញាធរបានផ្លាស់ប្តូរវិធានការដើម្បីគ្រប់គ្រងការកើនឡើងនៃករណីកូវីដ១៩។អត្ថបទគួរអាន
យ៉ាងណាមិញ សម្រាប់បច្ចុប្បន្ននេះ វាទំនងជាមិនធ្ងន់ធ្ងរនោះទេ ដោយសារតែរដ្ឋាភិបាលបានផ្លាស់ប្តូរពីវិធានការ គ្មានកូវីដ ទៅជាការសម្របខ្លួន ដែលអាចបត់បែនបាន ក្រោយអត្រាការចាក់វ៉ាក់សាំងមានការកើនឡើង។
សូមបញ្ជាក់ថា ការនាំចេញទំនិញរបស់វៀតណាមនៅឆ្នាំ២០២១មានកំណើន១៩% ខណៈដែលការវិនិយោគចូលក្នុងប្រទេសវៀតណាម នៅតែមានរក្សាបានភាពរឹងមាំ ដោយមានតម្លៃទុនវិនិយោគជិត២០ពាន់លានដុល្លារ ថយចុះតិចតួចប៉ុណ្ណោះធៀបនឹងឆ្នាំ២០២០។
ដោយឡែក កម្រិតបំណុលសាធារណៈរបស់វៀតណាម ធៀបនឹង GDP ក៏ត្រូវបានស្ថាប័ន Fitch Ratings ព្យាករថា នឹងនៅមានស្ថិរភាពផងដែរនៅចន្លោះឆ្នាំ២០២២-២០២៣ ក្នុងរង្វង់ប្រមាណ ៤១% នៃ GDP ខណៈដែលរដ្ឋាភិបាលថ្មីៗនេះ ទើបតែ អនុម័តកញ្ចប់ថវិកាជំរុញកំណើនសេដ្ឋកិច្ចប្រហែលជាង ១៥ពាន់លានដុល្លារ ដើម្បីស្ដារសេដ្ឋកិច្ចនៅក្រោយវិបត្តិកូវីដ១៩៕
អត្ថបទ ស៊ើង និមល់
None
