យ៉ាងណាក៏ដោយ ការចំណាយលើការរៀបចំមង្គលការនៅកម្ពុជា ត្រូវបានអ្នកជំនាញប៉ាន់ស្មានថា មានរហូតដល់រាប់រយលានដុល្លារក្នុងមួយឆ្នាំៗ ខណៈដែលក្នុងចំណោមប្រជាជនកម្ពុជាជាង ១៥លាននាក់ ប្រជាជនដែលមានអាយុស្ថិតក្នុងវ័យរៀបការមានរហូតដល់មួយភាគបីនៃចំនួនប្រជាជនសរុប។
លោក ទូច រដ្ឋា ប្រធានគ្រប់គ្រងទូទៅនៃអាជីវកម្ម សេងហុក ហេង ដែលមានបម្រើអាហារសម្រាប់កម្មវិធីអាពាហ៍ពិពាហ៍និងកម្មវិធីផ្សេងៗទៀត បានលើកឡើងថា កំណើននៃការចំណាយលើការរៀបចំអាពាហ៍ពិពាហ៍នៅកម្ពុជាហាក់មានសន្ទុះជាវិជ្ជមានពីមួយឆ្នាំទៅមួយឆ្នាំ ដែលវាក៏បានឆ្លុះបង្ហាញឲ្យឃើញពីកំណើនប្រជាជន ក៏ដូចជាជីវភាពរស់នៅកាន់តែល្អប្រសើរជាងមុន។
ម្ចាស់អាជីវកម្មផ្នែកសេវារៀបចំអាហារនិងតុការរូបនេះ បានប៉ាន់ស្មានថា ការចំណាយសម្រាប់ការរៀបចំកម្មវិធីមង្គលការនៅរាជធានីភ្នំពេញនាពេលបច្ចុប្បន្ននេះ ជាមធ្យមមានចន្លោះពី ១៥.០០០ដុល្លារ ទៅ ២០.០០០ដុល្លារ ដោយការចំណាយនេះត្រូវបានបូករួមជាកញ្ចប់តែម្ដង រួមមានដូចជា ថ្លៃអាហារហូបចុក សម្អាងការ ភ្លេងបុរាណនិងសម័យ ការរៀបចំតុបតែងរោងការ និងការជួលទីតាំងជាដើម។
លោក ទូច រដ្ឋា អ្នកគ្រប់គ្រងអាជីវកម្មធ្វើម្ហូបការ សេងហុក ហេង។
លោកបានគូសបញ្ជាក់ទៀតថា សម្រាប់អ្នកមានទ្រព្យធនច្រើន ឬហៅថា អភិជន បច្ចុប្បន្ននេះ អាចមានចំណាយលើការរៀបចំពិធីមង្គលការនេះ រហូតដល់រាប់សែន ឬលានដុល្លារក៏មានដែរ។
លោក ទូច រដ្ឋា បានបន្ថែមទៀតថា សម្រាប់ឆ្នាំនេះ លោកទទួលបានអតិថិជនជាមធ្យមមិនក្រោម ៣០រោងការនោះទេ ក្នុងមួយខែៗ។ ស្របពេលដែលតម្រូវការនៃសេវាកម្មរៀបចំមង្គលការមានកំណើនឥតឈប់ឈរ ក៏បានធ្វើឲ្យអ្នកប្រកបអាជីវកម្មក្នុងវិស័យនេះ ក៏មានសន្ទុះកើនឡើងគួរឲ្យកត់សម្គាល់ផងដែរ។
តួយ៉ាង ប្រធានគ្រប់គ្រងទូទៅអាជីវកម្ម សេងហុក ហេង ដដែលនេះ បានលើកឡើងថា បច្ចុប្បន្ន ក្រៅពីអាជីវកម្មផ្ដល់សេវាលើម្ហូបអាហារសម្រាប់ពិធីមង្គលការ ក៏មានអាជីវកម្មមួយចំនួនទៀតក្នុងវិស័យនេះ កំពុងតែមានសក្ដានុពលខ្លាំងផងដែរ ដូចជា ការជួលទីតាំងសម្រាប់រៀងចំពិធីមង្គលការ សេវាសម្អាងការ និងសេវារៀបចំតុបតែងរោងការដោយប្រើផ្កាស្រស់ជាដើម។
ជាមួយគ្នានេះដែរ ម្ចាស់ហាងលក់ផ្កាស្រស់មួយកន្លែងនៅរាជធានីភ្នំពេញ យីហោនីនី ផ្កាស្រស់១៦៨ បានលើកឡើងដែរថា សម្រាប់ការជ្រើសរើសផ្កាស្រស់យកទៅតុបតែងក្នុងកម្មវិធីមង្គលការនាពេលបច្ចុប្បន្ននេះ ជាមធ្យមអាចចំណាយពី ២ពាន់ដុល្លារ ទៅ៥ពាន់ដុល្លារ ខណៈដែលពិធីមង្គលការធំៗ អាចឈានដល់ចំណាយរាប់ម៉ឺនដុល្លារឯណោះ។
ម្ចាស់ហាងលក់ផ្កាស្រស់រូបនេះ បានបន្ថែមថា ផ្កាស្រស់ភាគច្រើន គឺត្រូវបាននាំចូលមកពីប្រទេសចិននិងថៃ ហើយមានចំនួនតិចតួចបំផុតដែលមានដាំដុះនៅក្នុងស្រុក។ មិនតែប៉ុណ្ណោះ ពេលបច្ចុប្បន្ននេះ ផ្កាស្រស់ហាក់មានភាពពេញនិយមសម្រាប់ការតុបតែងរោងការ បើធៀបនឹងផ្កាក្រដាស ឬផ្កាជ័រ។
ដ្បិតថា ការរៀបចំមង្គលការនៅកម្ពុជាត្រូវបានចំណាយច្រើនក៏ពិតមែន ប៉ុន្ដែ វាក៏បានចូលរួមចំណែកក្នុងការបង្កើតឱកាសការងារជាច្រើនសម្រាប់ប្រជាជនកម្ពុជា ក៏ដូចជាការផ្សារភ្ជាប់ទៅនឹងទំនាក់ទំនងផ្នែកវប្បធម៌ និងប្រពៃណីទំនៀមទម្លាប់ផងដែរ៕
None
