កិច្ចប្រជុំថ្នាក់រដ្ឋមន្ត្រីការបរទេសនៃក្រុមប្រទេសជឿនលឿនបំផុតរបស់ពិភពលោក រយៈពេល ៣ ថ្ងៃ នៅទីក្រុង ការូអ៊ីហ្សាវ៉ា ប្រទេសជប៉ុន ត្រូវបានគេសង្កេតឃើញថាស្ទើរតែគ្របដណ្តប់ទាំងស្រុងដោយបញ្ហាសង្គ្រាមរុស្ស៊ីនៅអ៊ុយក្រែន។ តាមរយៈសេចក្តីថ្លែងការណ៍ក្រោយកិច្ចប្រជុំនោះ ក្រុមប្រទេសទាំង ៧ បន្តប្តេជ្ញាពង្រឹងការដាក់ទណ្ឌកម្មប្រឆាំងនឹងរុស្ស៊ី ដោយមានការសម្របសម្រួល និងការអនុវត្តទណ្ឌកម្មនានាឱ្យបានពេញលេញ ស្របគ្នានឹងការគាំទ្រអ៊ុយក្រែនជាដរាប ក្នុងការតស៊ូការពារខ្លួន។
សេចក្ដីប្រកាសព័ត៌មានរបស់រដ្ឋមន្ត្រីការបរទេសទាំងនោះ ត្រូវបានរៀបចំឡើង ទុកជាគំរូឯកសារសម្រាប់ឱ្យមេដឹកនាំកំពូលនៃប្រទេសជឿនលឿនបំផុតទាំង ៧ ប្រើប្រាស់នៅក្នុងកិច្ចប្រជុំកំពូលរបស់ពួកគេ ដែលនឹងប្រព្រឹត្តទៅនៅទីក្រុងហ៊ីរ៉ូស៊ីម៉ានាខែក្រោយ ហើយបានរួមបញ្ចូលទាំងបញ្ហាប្រទេសអ៊ីរ៉ង់ មីយ៉ាន់ម៉ា ការរីកសាយអាវុធនុយក្លេអ៊ែរ និង«ការគំរាមធំៗ»ផ្សេងៗទៀត។
រដ្ឋមន្ត្រីការបរទេសនៃប្រទេសដែលមានឧស្សាហកម្មជឿនលឿនបំផុតទាំង ៧ ប្រទេស ពោលគឺជប៉ុន សហរដ្ឋអាមេរិក ចក្រភពអង់គ្លេស បារាំង អាល្លឺម៉ង់ កាណាដា អ៊ីតាលី និងសហភាពអឺរ៉ុប បានគូសបញ្ជាក់ថា កិច្ចប្រជុំរបស់ពួកគេនៅទីក្រុង ការូអ៊ីហ្សាវ៉ា ជាពេលវេលាដ៏សំខាន់មួយក្នុងការឆ្លើយតបរបស់ពិភពលោក ចំពោះវិបត្តិនៅអ៊ុយក្រែន និងនៅតៃវ៉ាន់ ដែលត្រូវបានគេមើលឃើញថាជា បញ្ហាប្រឈមចំពោះសណ្តាប់ធ្នាប់អន្តរជាតិនៅក្រោយសង្គ្រាមលោកលើកទី ២។
អត្ថបទគួរអាន
លើសពីនោះ រដ្ឋមន្ត្រីការបរទេសនៃប្រទេសទាំង ៧ បានលើកឡើងដែរថា សន្តិភាព និងស្ថិរភាព រវាងចិន និងតៃវ៉ាន់ នៅច្រកសមុទ្រតៃវ៉ាន់ គឺជា«ធាតុដែលមិនអាចខ្វះបានក្នុងសន្តិសុខ និងវិបុលភាព នៃសហគមន៍អន្តរជាតិ» ហើយពួកគេបានអំពាវនាវឱ្យមាន«ដំណោះស្រាយដោយសន្តិវិធីចំពោះបញ្ហានៅច្រកសមុទ្រតៃវ៉ាន់»។
សេចក្តីថ្លែងការណ៍បានជំរុញឱ្យប្រទេសចិនជៀសវាង«ការគំរាមកំហែង ការបង្ខិតបង្ខំ ការបំភិតបំភ័យ ឬការប្រើប្រាស់កម្លាំង» លើដែនកោះប្រជាធិបតេយ្យមួយនេះផងដែរ ហើយបានបង្ហាញ«ការព្រួយបារម្ភយ៉ាងខ្លាំង» អំពីស្ថានភាពនៅសមុទ្រចិនខាងកើតនិងខាងត្បូង។ បណ្ដារដ្ឋមន្ត្រីការបរទេសទាំងនោះយល់ឃើញថា មិនមានមូលដ្ឋានផ្លូវច្បាប់ណាមួយសម្រាប់ការទាមទារដែនសមុទ្រដ៏ទូលំទូលាយដោយប្រទេសចិន នៅក្នុងសមុទ្រចិនខាងត្បូងទេ ហើយថា ពួកគេប្រឆាំងនឹងសកម្មភាពយោធារបស់ចិននៅក្នុងតំបន់៕
