លោក ហេង សេងលី ប្រធានក្រុមនាយកប្រតិបត្តិក្រុមហ៊ុន យូណាយធីត ហ្វូតគ្រុប បានគូសបញ្ជាក់ថា អំឡុងមានការរាតត្បាតនៃជំងឺកូវីដ១៩ បានធ្វើឲ្យប៉ះពាល់ជាខ្លាំងដល់វិស័យទេសចរណ៍កម្ពុជា រួមទាំងវិស័យភោជនីយដ្ឋានតែម្ដង ហើយរហូតមកដល់ពេលនេះ វិស័យភោជនីយដ្ឋាន ក៏នៅរងផលប៉ះពាល់ខ្លះៗ ដែរ ដោយសារតែចរន្តភ្ញៀវទេសចរ ហាក់មិនទាន់វិលរកសភាពធម្មតានៅឡើយ។ ក៏ប៉ុន្តែ អ្នកជំនាញក្នុងវិស័យភោជនីយដ្ឋានរូបនេះ ក៏បានសង្កត់ធ្ងន់ដែរថា ដ្បិតអំឡុងកូវីដ១៩ បានធ្វើឲ្យវិស័យភោជនីយដ្ឋានរងការរង្គោះរង្គើលក្ដី តែវាក៏ក្លាយជាឱកាសមួយដែរសម្រាប់វិស័យនេះ អាចពង្រឹងខ្លួន និងពង្រីកនូវវិសាលភាពរបស់ខ្លួន បន្ថែមទៀត។
ដោយឡែក ទាក់ទងនឹងវឌ្ឍនភាពនៃវិស័យភោជនីយដ្ឋានកម្ពុជាវិញ លោក ហេង សេងលី នៅតែមើលឃើញពីភាពវិជ្ជមាន និងការលូតលាស់យ៉ាងរហ័សគួរឲ្យកត់សម្គាល់ នៅរយៈពេល ៥ឆ្នាំចុងក្រោយនេះ ថែមទាំងមានភាពប្រកួតប្រជែងខ្ពស់ ជាមួយបណ្ដាប្រទេស ក្នុងតំបន់ទៀតផងទាំងផ្នែក គុណភាព និងអនាម័យ។
អត្ថបទគួរអាន
បើទោះបី បច្ចុប្បន្ន ចរន្តភ្ញៀវទេសចរបរទេសនៅកម្ពុជា ហាក់មិនទាន់មានសន្ទុះខ្លាំងឡើងវិញ ដូចពេលមិនទាន់មានកូវីដ១៩ តែលោក ហេង សេងលី បានបង្ហាញនូវសុទិដ្ឋិយមខ្ពស់ចំពោះវិស័យនេះ ដោយសារចរន្តភ្ញៀវទេសចរផ្ទៃក្នុង មានសន្ទុះយ៉ាងខ្លាំងគួរឲ្យកត់សម្គាល់។ លើសពីនេះ ការបន្ធូរបន្ថយវិធានការជាបន្តបន្ទាប់របស់រាជរដ្ឋាភិបាលកម្ពុជា ដល់អ្នកដំណើរបរទេសដែលចូលមកកម្ពុជា ក៏ជាឱកាសបន្ថែមដែលធ្វើឲ្យវិស័យទេសចរណ៍ឆាប់វិលទៅភាពធម្មតាវិញ ក៏ដូចជា ជំរុញដល់វិស័យភោជនីយដ្ឋានឲ្យកាន់តែប្រសើរ ផងដែរ។
សូមបញ្ជាក់ថា ដើម្បីជំរុញនិងស្តារវិស័យទេសចរណ៍ឡើងវិញ រាជរដ្ឋាភិបាលបានដាក់ចេញនូវវិធានការអន្តរាគមន៍ជាបន្តបន្ទាប់ ដូចជា ការលុបចោលវិធានការធ្វើចត្តាឡីស័កសម្រាប់អ្នកដំណើរចូលមកប្រទេសកម្ពុជា។ ការប្រកាសដាក់ឲ្យប្រើប្រាស់ជាផ្លូវការនូវក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី ឆ្នាំ២០២១-២០២៣។ លើសពីនេះ ដើម្បីគាំទ្រដល់ការអនុវត្តនូវក្របខណ្ឌខាងលើ រាជរដ្ឋាភិបាលបានអនុម័តកញ្ចប់ថវិកាបដិភាគចំនួន ៧៥ លានដុល្លារអាមេរិក សម្រាប់ផ្តល់ហិរញ្ញប្បទាន ដែលមានលក្ខខណ្ឌអនុគ្រោះ សម្រាប់ជួយម្ចាស់អាជីវកម្មដែលស្ថិតក្នុងវិស័យនេះ ខណៈដែលខាងវិស័យឯកជនចូលរួម៧៥លានដុល្លារ សរុបជារួមមានទឹកប្រាក់ដល់ទៅ១៥០លានដុល្លារ ក្នុងការជួយជំរុញ និងស្ដារវិស័យទេសចរណ៍ឲ្យមានភាពប្រសើរឡើងវិញ៕
