ធនាគារកណ្តាលចិន បានបញ្ចេញលុយប្រមូលទិញមាសជាង១៦ម៉ឺនអោនបន្ថែមទៀតសម្រាប់ស្តុកទុកកាលពីខែមីនា កន្លងទៅ ដើម្បីឆ្លើយតបនឹងទស្សនវិស័យរបស់រដ្ឋាភិបាលនៃប្រទេសដែលមានសេដ្ឋកិច្ចធំបំផុតទីពីររបស់ពិភពលោកមួយនេះ។ ការប្រមូលទិញមាសទុករបស់ធនាគារកណ្តាលចិននេះ បានជំរុញឱ្យតម្លៃមាសនៅលើទីផ្សារអន្តរជាតិ ពុះកញ្ជ្រោលឡើងជាង៩% កាលពីខែមីនា ដែលជាកំណើនខ្ពស់បំផុតតាំងពីខែកក្កដា ឆ្នាំ២០២០ បើទោះបីជាប្រាក់ដុល្លារមានតម្លៃរឹងមាំ ហើយសេដ្ឋកិច្ចរបស់សហរដ្ឋអាម៉េរិក បន្តស្ថិតក្នុងភាពវិជ្ជមានក៏ដោយ។ ការបង្កើនបរិមាណមាសជាទុនបម្រុងរបស់ចិន បានធ្វើឲ្យតម្លៃមាសកញ្ជ្រោលឡើងខ្លាំងរហូតដល់២ពាន់៣រយ៥៣ដុល្លារក្នុង១អោន នៅដើមសប្តាហ៍នេះ។
លោក គ្រីសាន ហ្គោប៉ូល (Krishan Gopaul ) អ្នកវិភាគជាន់ខ្ពស់នៅក្រុមប្រឹក្សាមាសពិភពលោកបានលើកឡើងថា ចិនបានបន្ថែមមាសទៅក្នុងទុនបម្រុងរបស់ខ្លួនចំនួន១៧ខែជាប់ៗគ្នា។ ទិន្នន័យផ្លូវការចេញផ្សាយកាលពីសប្តាហ៍មុនបានបង្ហាញថា គិតត្រឹមចុងខែមីនា ឆ្នាំ២០២៤ ប្រទេសចិនមានទុនបម្រុងជាមាសរហូតដល់ទៅជិត៧៣លានអោន។ តម្លៃទុនបម្រុងជាមាសរបស់ចិនបានកើនដល់ជាង១៦១ពាន់លានដុល្លារ។
អត្តបទគួរអាន
លោក ហ្គោប៉ូល បាននិយាយថា តម្រូវការមាសរបស់ធនាគារកណ្តាលពិភពលោក មានការកើនឡើងជាបន្តបន្ទាប់នៅពីរឆ្នាំកន្លងមកនេះ ហើយបណ្តាធនាគារកណ្តាលនានា កំពុងស្ថិតនៅលើផ្លូវនៃការបន្តទិញមាសចូលបន្ថែមទៀតនៅឆ្នាំ២០២៤។ តួកគី ឥណ្ឌា កាហ្សាក់ស្ថាន និងបណ្តាប្រទេសនៅអឺរ៉ុបខាងកើតមួយចំនួន ត្រូវបានគេរាយការណ៍ថា បាននិងកំពុងទិញមាសចូលដូចប្រទេសចិនដែរ។
គិតត្រឹមឆ្នាំ២០២៣ ធនាគាកណ្តាលនានានៅលើពិភពលោកកំពុងស្តុកមាសសរុបជាង១ពាន់៣៧តោន ធ្លាក់ចុះប្រមាណជា៤% បើធៀបនឹងបរិមាណមាស ដែលបម្រុងទុកកាលពីឆ្នាំ២០២២៕
ដោយៈ សរ សុជាតិ
None
