តាមឯកសារប្រវត្តិមិនសូវលម្អិតរបស់លោកឧកញ៉ា លី យ៉ុងផាត់ ដែលចុះផ្សាយនៅលើគេហទំព័រផ្លូវការរបស់ក្រុមហ៊ុន អិល. វ៉ាយ. ភី គ្រុប (L.Y.P Group) លោកឧកញ៉ា លី យ៉ុងផាត់ កើតនៅខេត្តកោះកុង នៅឆ្នាំ១៩៥៨។
ឯកសារដដែល សរសេរថា មហាសេដ្ឋីដ៏មានឥទ្ធិពលរូបនេះ មានដុងខាងរកស៊ីតាំងពីក្មេងវ័យមកម្ល៉េះ និងបានក្លាយខ្លួនជាពាណិជ្ជករនៅក្នុងអំឡុងទសវត្សឆ្នាំ៨០។ ប៉ុន្តែ ឯកសារប្រវត្តិដដែលនេះ មិនបានបញ្ជាក់លម្អិតអំពីថាតើក្នុងអំឡុងពេលចាប់ផ្ដើមដំបូងនេះ លោកឧកញ៉ារកស៊ីអ្វីខ្លះនោះទេ។
ក្រៅពីជាអ្នកជំនួញដ៏ល្បីល្បាញនិងចម្រូងចម្រាសខ្លះដែរនោះ លោកឧកញ៉ា លី យ៉ុងផាត់ ក៏ត្រូវគេមើលឃើញថា បានចូលរួមប្រឡូកក្នុងជីវភាពនយោបាយរបស់ប្រទេសកម្ពុជាយ៉ាងសកម្មផងដែរ។
លោកឧកញ៉ា លី យ៉ុងផាត់ អមដំណើរសម្ដេចតេជោ ហ៊ុន សែន ទស្សនកិច្ចរោងចក្រស្ករស នៅខេត្តកំពង់ស្ពឺ។
(រូបភាព៖ AKP)
ឆ្នាំ២០០០ លោកឧកញ៉ា លី យ៉ុងផាត់ ត្រូវបានរដ្ឋាភិបាលតែងតាំងជាប្រតិភូរាជរដ្ឋាភិបាលទទួលបន្ទុកអភិវឌ្ឍន៍ខេត្តកោះកុង និងជាទីប្រឹក្សាសេដ្ឋកិច្ចពិសេសរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ឆ្នាំ២០០១ លោកឧកញ៉ា លី យ៉ុងផាត់ ជាប់ឆ្នោតជាអនុប្រធានសភាពាណិជ្ជកម្មកម្ពុជា។ ឆ្នាំ២០០៥ លោកត្រូវបានតែងតាំងជាទីប្រឹក្សាជាន់ខ្ពស់នៃសមាគមចិនគ្រួសារត្រកូល លី។ ហើយពីឆ្នាំ២០០៦រហូតដល់បច្ចុប្បន្ន លោកឧកញ៉ា លី យ៉ុងផាត់ ក៏បានក្លាយជាសមាជិកព្រឹទ្ធសភានៃព្រះរាជាណាចក្រកម្ពុជា។
តើឧកញ៉ា លី យ៉ុងផាត់ មានក្រុមហ៊ុនអ្វីខ្លះ ?
ក្នុងអំឡុងដើមទសវត្សឆ្នាំ៩០ លោកឧកញ៉ា លី យ៉ុងផាត់ បានបង្កើតក្រុមហ៊ុនមួយ ឈ្មោះថា អិល. វ៉ាយ. ភី គ្រុប ហើយក្នុងពេលជាង ២០ឆ្នាំមកនេះ ក្រុមហ៊ុនមួយនេះបានកើតកូនកើតចៅក្រុមហ៊ុនយ៉ាងច្រើនស្ទើរតែមិននឹកស្មានដល់។
ក្នុងវិស័យសណ្ឋាគារនិងកម្សាន្ត លោកឧកញ៉ា លី យ៉ុងផាត់ មាន ៦ក្រុមហ៊ុន៖
១) រមណីយដ្ឋានកោះកុង ដែលជាសណ្ឋាគារផ្កាយ ៥ និងកាស៊ីណូ ស្ថិតនៅលើបន្ទាត់ព្រំដែនខ្មែរថៃ ក្បែរច្រកព្រំដែនអន្តរជាតិ ចាំយាម។ ២) សណ្ឋាគារភ្នំពេញ លំដាប់ផ្កាយ៤ ស្ថិតនៅកណ្ដាលរាជធានីភ្នំពេញ។ ៣) សណ្ឋាគារ និងកាស៊ីណូ អូរស្មាច់ ខេត្តឧត្តរមានជ័យ ភាគពាយ័ព្យប្រទេសកម្ពុជា ជាប់នឹងព្រំដែនថៃ។ ៤) សណ្ឋាគារ ហ្គាឌិន ស៊ីធី (Garden City Hotel) នៅភ្នំពញ ចន្លោះផ្លូវជាតិលេខ៥ និងលេខ៦។ ៥) ក្លិបវាយកូនហ្គោល ហ្គាឌិន ស៊ីធី ដែលស្ថិតនៅក្បែរគ្នានឹងសណ្ឋាគារ ហ្គាឌិន ស៊ីធី។ និង ៦) សួនសត្វ សាហ្វារី វើល ភ្នំពេញ ដែលរើយកមកពីខេត្តកោះកុង ដែលគ្រោងនឹងបើកសម្ពោធឲ្យសាធារណជនចូលទស្សនានាចុងឆ្នាំ២០១៧នេះ។
រូបភាពប្លង់នៃទីក្រុងរណប ហ្គាឌិន ស៊ីធី យកចេញពីខិត្តប័ណ្ណក្រុមហ៊ុន LYP។
លើវិស័យហេដ្ឋារចនាសម្ព័ន្ធ និងសេវាទឹកភ្លើង រួមមាន ក្រុមហ៊ុន Koh Kong Infrastructure & Utilities ដែលមានស្ពានកោះកុង និងសេវាផ្គត់ផ្គត់ទឹកភ្លើងនៅក្នុងទូទាំងខេត្តកោះកុង។ ក្រុមហ៊ុន O' Smach Electricity and Water Supply ដែលផ្គត់ផ្គង់ទឹកភ្លើងនៅខេត្តឧត្តរមានជ័យ ជាពិសេស តំបន់អូរស្មាច់។ និងក្រុមហ៊ុន Cambodia Electricity Private (CEP) នៅរាជធានីភ្នំពេញ។
ក្នុងវិស័យកសិកម្ម និងដំណាំកសិឧស្សាហកម្ម លោកឧកញ៉ា លី យ៉ុងផាត់ មានក្រុមហ៊ុន ភ្នំពេញ ស៊ូហ្គើរ ដែលមានចម្ការអំពៅ និងរោងចក្រស្ករតម្លៃរាប់សិបលានដុល្លារ នៅក្នុងខេត្តកំពង់ស្ពឺ។ កន្លងមក ក្រុមហ៊ុនមួយនេះមានភាពចម្រូងចម្រាសអាស្រូវខ្លះ ពាក់ព័ន្ធនឹងបញ្ហាដីធ្លី ជាមួយប្រជាពលរដ្ឋក្នុងមូលដ្ឋាន ប៉ុន្តែ បញ្ហានេះបាននិងកំពុងត្រូវបានដោះស្រាយអូសបន្លាយរហូតមកទល់នឹងបច្ចុប្បន្ន។
ក្នុងវិស័យកសិឧស្សាហកម្មនេះដែរ លោកឧកញ៉ាក៏មានចម្ការកៅស៊ូជប់ នៅខេត្តត្បូងឃ្មុំផងដែរ។
លើវិស័យដោះដូរទំនិញ និងចែកចាយទំនិញ ក្រុមហ៊ុនលោកឧកញ៉ា លី យ៉ុងផាត់ ត្រូវបានគេដឹងថា ជាអ្នកចែកចាយផ្ដាច់មុខនូវទំនិញសំខាន់ៗ ដូចជា បារី ហេរ៉ូ ភេសជ្ជៈគោជល់ រួមទាំងភេសជ្ជៈល្បីៗដទៃទៀត។ លើសពីនេះ ក្រុមហ៊ុន អិលវ៉ាយភី គ្រុប ក៏ជាអ្នកចែកចាយផ្ដាច់មុខរថយន្តម៉ាក Hyundai ផងដែរ។
ថ្មីៗបំផុតនេះ ឧកញ៉ា លី យ៉ុងផាត់ បានចាប់ដៃគូរកស៊ីជាមួយមហាដ្ឋីលំដាប់កំពូលនៅថៃ វិនិយោគលើផ្សារលក់រាយនិងដុំទំនិញដ៏ធំបំផុតមួយ ឈ្មោះផ្សារ Makro នៅរាជធានីភ្នំពេញ។
វិស័យអចលនទ្រព្យ ឧកញ៉ា លី យ៉ុងផាត់ ក៏ល្បីល្បាញខ្លាំងណាស់ដែរ ដោយលោកឧកញ៉ាវិនិយោគលើទីក្រុងរណប ហ្គាឌិន ស៊ីធី ទីក្រុងរណប ពោងពាយ ស៊ីធី តំបន់សេដ្ឋកិច្ចពិសេសកោះកុង តំបន់សេដ្ឋកិច្ចពិសេស គិរីសាគរ កោះកុង ជាដើម។
ផ្សារទំនិញលក់រាយនិងដុំដែលឧកញ៉ា លី យ៉ុងផាត់ វិនិយោគរួមគ្នានឹងមហាសេដ្ឋីមកពីថៃ។
ថ្មីៗចុងក្រោយនេះ ឧកញ៉ា លី យ៉ុងផាត់ ក៏បានហក់ចូលក្នុងវិស័យប្រព័ន្ធផ្សព្វផ្សាយផងដែរ ដោយបានវិនិយោគប្រាក់រាប់សិបលានដុល្លារ បង្កើតស្ថានីយទូរទស្សន៍ PNN ដ៏ទំនើបមួយ ស្ថិតនៅក្នុងទឹកដីនៃទីក្រុងរណប ហ្គាឌិន ស៊ីធី ប្រមាណ ១០គីឡូម៉ែត្រ ពីកណ្ដាលរាជធានីភ្នំពេញ។
ទាំងនេះ គឺជាក្រុមហ៊ុនរបស់លោកឧកញ៉ា លី យ៉ុងផាត់ និងក្រុមគ្រួសារ ដែលគេបានដឹងជាសាធារណៈ ប៉ុន្តែ ក៏អាចនឹងមានក្រុមហ៊ុនជាច្រើនទៀតរបស់លោកឧកញ៉ា ដែលសាធារណជនមិនបានដឹងអស់ផងដែរ៕
None
