អង្គការសុខភាពពិភពលោក បានលើកឡើងថា បន្ទាប់ពីការធ្លាក់ចុះជាងមួយខែ គេសង្កេតឃើញថា ករណីឆ្លងកូវីដ១៩ បានចាប់ផ្តើមកើនឡើងនៅជុំវិញពិភពលោកកាលពីសប្តាហ៍មុន ជាមួយនឹងការបិទខ្ទប់នៅក្នុងតំបន់អាស៊ី និងខេត្ត ជីលីងប្រទេសចិន ខណៈដែលចិនកំពុងប្រយុទ្ធប្រឆាំងដើម្បីទប់ស្កាត់ការផ្ទុះឡើងយ៉ាងឆាប់រហ័សនៃមេរោគនេះ។
អង្គការ សុខភាពពិភពលោក បានបន្តថា កត្តាបន្ធូរបន្ថយនៃការចាត់វិធានការគ្រប់គ្រង កូវីត ១៩ បានបណ្តាលឱ្យករណីឆ្លងថ្មីៗមានការកើនឡើង ស្របពេល មេរោគបំប្លែងថ្មី អូមីក្រុង ប្រភេទ BA.2 គឺមានមានការឆ្លងយ៉ាងឆាប់រហ័ស។
ប្រធានអង្គការសុខភាពពិភពលោក Tedros បានអះអាងថា ការកើនឡើង គឺនៅតែបន្តកើតឡើង ទោះបីជា មានការថយចុះនៃការធ្វើតេស្ដនៅតាមប្រទេសមួយចំនួនក៏ដោយ។ មន្ត្រីអង្គការសុខភាពពិភពលោកបាននិយាយថា អត្រានៃការចាក់វ៉ាក់សាំងទាបនៅក្នុងប្រទេសមួយចំនួននៅតែមាន ដោយសារ ការបំផុសបំផុតនៃព័ត៌មានមិនពិត ទៅលើប្រសិទ្ធភាពវ៉ាក់សាំង។
អត្ថបទគួរអាន
ការឆ្លងថ្មីបានកើនឡើង ៨% នៅទូទាំងពិភពលោក បើធៀបនឹងសប្តាហ៍មុន ដោយមានករណីថ្មីចំនួន ១១ លាននាក់ និងមានអ្នកស្លាប់ថ្មីជាង ៤ ម៉ឺននាក់ប៉ុណ្ណោះ គិតត្រឹមថ្ងៃទី ៧ ដល់ថ្ងៃទី ១៣ ខែមីនា។
គួរកត់សម្គាល់ថា អត្រាកើនឡើងករណីឆ្លងច្រើនជាងគេបំផុត គឺមាននៅក្នុងតំបន់ប៉ាស៊ីហ្វិក ដែលរួមមានកូរ៉េខាងត្បូង និងចិន ដែលករណីបានកើនឡើង ២៥% និងការស្លាប់កើនឡើង ២៧ %។
ក្នុងនោះ អាហ្វ្រិកក៏បានឃើញការកើនឡើង ១២% នៃករណីឆ្លងថ្មី និង១៤% បានស្លាប់ ខណៈនៅអឺរ៉ុបវិញមានករណីឆ្លងថ្មីកើនឡើង ២% ប៉ុន្តែមិនមានការកើនឡើងនៃការស្លាប់នោះទេ។
គួរជម្រាបថា អ្នកជំនាញមួយចំនួនបានលើកឡើងពីការព្រួយបារម្ភថា អឺរ៉ុបអាចប្រឈមមុខនឹងរលកនៃមេរោគឆ្លងថ្មីមួយទៀត ដោយសារករណីឆ្លងថ្មីកំពុងកើនឡើងចាប់តាំងពីដើមខែមីនាមកពិសេស នៅក្នុងប្រទេសអូទ្រីស អាល្លឺម៉ង់ ស្វីស ហូឡង់ និងចក្រភពអង់គ្លេស។
បច្ចុប្បន្ន ករណីឆ្លងកូវីដ១៩សរុបនៅទូទាំងពិភពលោកបានកើនឡើងដល់ ជាង ៤៦៤លាននាក់ហើយ ខណៈអ្នកស្លាប់មានជាង៦លាននាក់៕
អត្ថបទ វ៉ាន់ ស្រីរ័ត្ន
None
