ការអះអាងរបស់សម្តេចតេជោ ហ៊ុន សែន បែបនេះបានធ្វើឡើង នៅក្រោយពេលដែលថ្មីៗនេះ មានអ្នកជំនួញក្នុងវិស័យអចលទ្រព្យខ្លះបាននិយាយរិះគន់អំពីដំណើរការអភិវឌ្ឍនៅក្នុងខេត្តសៀមរាប ដោយសារតែបញ្ហាការកំណត់កម្ពស់អគារសាងសង់ ដែលវាជាពិបាកសម្រាប់អ្នកវិនិយោគក្នុងការសម្រេចចិត្តបោះទុនវិនិយោគក្នុងខេត្តនេះ។
ថ្លែងនាឱកាសសម្ពោធដាក់ឲ្យប្រើប្រាស់ផ្លូវ ចំនួន៣៨ខ្សែ នៅក្នុងក្រុងសៀមរាប នៅថ្ងៃទី៤ ខែមេសា សម្ដេចតេជោ ហ៊ុន សែន បានពន្យល់ពីមូលហេតុមួយចំនួន ដែលរាជរដ្ឋាភិបាលកម្ពុជា មិនអនុញ្ញាតឲ្យមានការសាងសង់អគារខ្ពស់ៗ នៅខេត្តសៀមរាប បន្ទាប់ពីមានអ្នកជំនួញដីធ្លីខ្លះ បានរិះគន់ទៅលើអាជ្ញាធរ ខេត្តសៀមរាប ដែលបានរឹតបន្តឹងការសាងសង់អគារខ្ពស់ៗ នៅក្នុងខេត្តសៀមរាបនេះ។
សម្ដេចបានសង្កត់ធ្ងន់ដូច្នេះថា ខេត្តសៀមរាប ជាតំបន់អភិរក្ស ដែលត្រូវគោរពនូវលក្ខខណ្ឌទាំងឡាយនៃផ្នែកបេតិកភណ្ឌវប្បធម៌ ដែលមានការចូលរួម របស់បារាំង ជប៉ុន និងអង្គការយូណេស្កូ ក្នុងកិច្ចការអភិរក្សតំបន់អង្គរ។ ក្នុងន័យនេះ សម្ដេចចង់បញ្ជាក់ថា រាល់កិច្ចការអភិវឌ្ឍន៍ទាំងអស់មិនមែនកម្ពុជា ចេះតែអាចធ្វើទៅបាននោះទេ ហើយការអភិវឌ្ឍអចលនទ្រព្យ ដោយការសាងសង់អគារខ្ពស់ៗ នៅខេត្តសៀមរាប ត្រូវគោរពតាមលក្ខខណ្ឌបច្ចេកទេស របស់អង្គការយូណេស្កូ ដោយមិនចេះតែធ្វើបំពានស្រេចតែចិត្តនោះទេ។
អត្ថបទគួរអាន
បន្ថែមលើនោះ សម្ដេចតេជោ ហ៊ុន សែន ក៏បានអំពាវនាវដល់ប្រជាពលរដ្ឋរស់នៅក្នុងខេត្តសៀមរាប បន្តរក្សានូវរបៀបរៀបរយគោរពទៅតាមគោលការណ៍ ដែលការពារបាននូវបេតិកភណ្ឌប្រវត្តិសាស្ត្រ ដោយសម្ដេចបន្តថា ទឹកដីខេត្តសៀមរាប ពិតជាមានប្រាង្គប្រាសាទច្រើន ដែលត្រូវគោរព និងថែរក្សា។ ជាមួយគ្នានោះ សម្ដេចក៏បានថ្លែងបញ្ជាក់ទៀតថា ទម្រាំរាជរដ្ឋាភិបាល អាចរកកន្លែងសាងសង់អាកាសយានដ្ឋានអន្តរជាតិសៀមរាប-អង្គរ ថ្មី មិនមែនជារឿងងាយស្រួលនោះទេ ដើម្បីធានាថា មិនឲ្យប៉ះពាល់ដល់តំបន់បេតិកភណ្ឌ។ ដោយឡែក សម្តេចបញ្ជាក់ទៀតថា ប្រសិនបើកម្ពុជា សាងសង់អគារខ្ពស់ៗ បំពានលក្ខខណ្ឌបច្ចេកទេស របស់អង្គការយូណេស្កូនោះ អង្គរវត្តរបស់កម្ពុជា នឹងត្រូវចេញពីបញ្ជីបេតិកភណ្ឌពិភពលោក ដែលអាចធ្វើឲ្យកម្ពុជាខាតបង់ធំធេង។
របាយការណ៍ពីធនាគារជាតិនៃគម្ពុជាបង្ហាញថា វិស័យសំណង់នៅឆ្នាំ២០២១កន្លងទៅនេះ ត្រូវបានប៉ាន់ស្មានថា មានកំណើន១,៤% ធៀបនឹងឆ្នាំ២០២០ ដែលគាំទ្រដោយគម្រោងសំណង់កំពុងដំណើរការ ក៏ប៉ុន្ដែ ចំនួនគម្រោងសំណង់ថ្មីៗបានធ្លាក់ចុះ ៧% និងតម្លៃទុនវិនិយោគនៅក្នុងវិស័យនេះវិញ ធ្លាក់ចុះជិត២៦%។
អ្នកជំនាញនៅតែជឿជាក់ថា នៅឆ្នាំ២០២២នេះ វិស័យសំណង់ និងអចលនទ្រព្យ នឹងស្ទុះងើបឡើងកាន់តែប្រសើរជាងមុន ដ្បិតថា រាជរដ្ឋាភិបាលនៅមួយរយៈកន្លងមកនេះ បានដកចេញនូវវិធានការទប់ស្កាត់កូវីដ១៩កាន់តែច្រើន ដែលជំរុញដល់សកម្មភាពសេដ្ឋកិច្ចកាន់តែទូលំទូលាយជាងមុន៕
None
