ហេតុអ្វីជប៉ុនហាក់នៅស្ទាក់ស្ទើរដាក់ប្រទេសក្នុងភាពអាសន្ន?

ប្រភពដដែលបានប្រាប់ Reuters ថា បន្ទាប់ពីថ្ងៃទី១១ឧសភាទៅ អាជ្ញាធរគ្រោងនឹងបន្តដាក់តែទីក្រុង៣ និងខេត្ត១ប៉ុណ្ណោះ ក្នុងគ្រាអាសន្ន មានដូចមាន ក្រុងតូក្យូ អូសាកា ក្យូតូ និងខេត្តយូហ្គោ។ ការបន្តដាក់ប្រទេសក្នុងគ្រាអាសន្ននេះ ត្រូវបានគេជឿថា ដោយសារជប៉ុននៅមិនទាន់អាចគ្រប់គ្រងការាលដាលកូវីដ-១៩បានល្អនៅឡើយ ខណៈដែលករណីឆ្លងចេះតែកើនឡើងពីមួយថ្ងៃទៅមួយថ្ងៃ។

បន្ថែមពីលើនេះ កាសែតក្នុងស្រុករបស់ជប៉ុនឈ្មោះ Yomiri Newspaper ក៏បានចុះផ្សាយដែរថា ការពន្យារពេលដាក់ប្រទេសក្នុងគ្រាមានអាសន្នអាចនឹងត្រូវធ្វើឡើង។

ទោះយ៉ាងណា ការប្រកាសផ្លូវការចេញពីរាជរដ្ឋាភិបាលជប៉ុនអំពីការដាក់ប្រទេសនៅក្នុងគ្រាមានអាសន្ននេះ គឺមិនទាន់ធ្វើឡើងនោះទេ ប៉ុន្ដែ គេជឿថា លទ្ធផលព័ត៌មានផ្លូវការពីខាងរដ្ឋាភិបាល នឹងត្រូវបានគេជឿថា នឹងចេញផ្សាយនៅថ្ងៃសុក្រសប្តាហ៍នេះ។

រដ្ឋាភិបាលជប៉ុនហាក់នៅស្ទាក់ស្ទើរក្នុងការប្រកាសដាក់ប្រទសនៅក្នុងគ្រាអាសន្ននេះ ក៏ដោយសារតែខ្លួនបារម្ភថា អាចនឹងជះឥទ្ធិពលដល់ព្រឹត្តិការណ៍កីឡាអូឡាំពិក ដែលគ្រោងនឹងចាប់ផ្តើមនៅថ្ងៃទី២៣ខែកក្កដាឆ្នាំនេះ។

តើភាពមិនប្រាកដប្រជានៃកូវីដ១៩ ជះឥទ្ធិពលមិនល្អដល់ព្រឹត្តិការណ៍កីឡាអូឡាំពិកអ្វីខ្លះ?

ព្រឹត្តិការណ៍កីឡាអូឡាំពិកជាព្រឹត្តិការណ៍កីឡាដ៏ធំ ដែលធ្វើឡើងរាល់៤ឆ្នាំម្តង។ មែនទែនទៅ ប្រទេសជប៉ុនបានទទួលសិទ្ធិជាម្ចាស់ផ្ទះ ដោយត្រូវរៀបចំព្រឹត្តិការណ៍កីឡាអូឡាំពិកលើកនេះកាលពី២០២០ម្ល៉េះ។ ប៉ុន្តែជប៉ុន បានសម្រេចលើកពេលម្តងហើយម្តងទៀត រហូតមកដល់ពេលនេះ ដោយសារតែភាពមិនស្រាកស្រាន្ដ និងមិនប្រាកដប្រជានៃកូវីដ-១៩នៅក្នុងប្រទេសជប៉ុន។ 

បើតាមកម្រោង គណៈកម្មាធិការអូឡាំពិករបស់ជប៉ុន នឹងត្រូវចេញសេចក្តីសម្រេចនៅក្នុងខែនេះ នឹងអនុញ្ញាតឲ្យអ្នកនៅក្នុងស្រុក បានចូលទស្សនាព្រឹត្តិការណ៍នេះ ឬយ៉ាងណា។ ប៉ុន្តែបើយោងតាមសារព័ត៌មាន Nikkei បានរាយការណ៍ថា ផែនការនេះទំនងត្រូវបានពន្យាពេលក្នុងការសម្រេចចិត្តសិន។

យ៉ាងណាក៏ដោយចុះ អត្តពលិកនិងមន្ត្រីប្រហែល ៣០.០០០ នាក់ត្រូវបានគេរំពឹងថា នឹងចូលរួមព្រឹត្តិការណ៍កីឡាអូឡាំពិកលើកនេះ ខណៈដែលគណៈកម្មការអូឡាំពិកជប៉ុន មិនបានទាមទារឲ្យអ្នកចូលរួមទាំងអស់ត្រូវចាក់វ៉ាក់សាំងជាមុននោះទេ។

សូមបញ្ជាក់ថា ប្រទេសជប៉ុនមានអ្នកឆ្លងកូវីដ-១៩សរុបជាង៦០ម៉ឺននាក់ហើយ ខណៈអ្នកស្លាប់ដោយសារជំងឺដ៏កាចសាហាវមួយនេះមានជាង ១ម៉ឺននាក់៕