ស្របពេលត្រី ដែលល្មមចាប់កំពុងចាល់នៅតាមអាងចិញ្ចឹមត្រី ប្រធានសមាគមវារីវប្បកម្មកម្ពុជា លោក សុខ រ៉ាដែន ទទូចស្នើសុំជាថ្មីទៀតឲ្យក្រសួងកសិកម្ម និងក្រសួងពាណិជ្ជកម្មរឹតបន្តឹង និងកម្រិតចំនួនត្រីក្នុងការនាំចូលពីបរទេស។ សម្រាប់លោក រ៉ាដែន មូលហេតុដែលធ្វើឲ្យត្រីនៅកម្ពុជាចាល់ ដោយសារកម្ពុជាបើកឲ្យមានការនាំចូលត្រីពីក្រៅប្រទេសច្រើនពេក។
ប្រធានសមាគមរូបនេះ អះអាងថា កម្ពុជាមិនត្រឹមតែមានលទ្ធផលក្នុងការផ្គត់ផ្គង់តម្រូវការត្រីក្នុងស្រុកប៉ុណ្ណោះទេ ថែមទាំងអាចនាំចេញទៅកាន់ទីផ្សារអន្តរជាតិទៀតផង។
អត្ថបទទាក់ទង!
បន្ថែមលើការស្នើឲ្យក្រសួងពាក់ព័ន្ធជួយដោះស្រាយជូនកសិករពាក់ព័ន្ធរឿងត្រីចាល់លក់មិនចេញនេះដែរ លោក សុខ រ៉ាដែន អំពាវនាវឲ្យប្រជាពលរដ្ឋ ក៏ដូចជាឈ្មួញទិញត្រីជួយគាំទ្រផលិតផលត្រីក្នុងស្រុក ជាជាងត្រីនាំចូលមកពីក្រៅប្រទេស។ លោកអះអាងថា ការធ្វើបែបនេះមិនត្រឹមតែជួយលើកកម្ពស់វិស័យវារីវប្បកម្មប៉ុណ្ណោះទេ ថែមទាំងជួយលើកកម្ពស់សេដ្ឋកិច្ចកម្ពុជាផងដែរ។
ប្រធានសមាគមរូបនេះ បានបន្ថែមថា មូលហេតុដែលធ្វើឲ្យត្រីនៅកម្ពុជាមិនអាចប្រកួតប្រជែងជាមួយត្រីនាំចូលពីបរទេស ដោយសារតម្លៃថ្លៃដើមនៅកម្ពុជាខ្ពស់ជាងត្រីនាំចូលពីបរទេស។ ថ្លៃដើមខ្ពស់ដោយសារតម្លៃភ្លើង និងប្រេងនៅកម្ពុជាថ្លៃ ម្យ៉ាងទៀតចំណីត្រី ដែលកសិករប្រើប្រាស់ស្ទើរ១០០ភាគរយនាំចូលពីបរទេស។
ទាក់ទងនឹងបញ្ហាទីផ្សារត្រីក្នុងស្រុកនេះដែរ រដ្ឋមន្ត្រីក្រសួងកសិកម្មឯកឧត្តម វេង សាខុន ធ្លាប់បញ្ជាក់ប្រាប់ខេមបូណូមីសតាមតេឡេក្រាមនាពេលថ្មីៗនេះថា ក្រសួងកសិកម្ម ក៏បាននិងកំពុងស្វែងរកយុទ្ធសាស្ត្រ និងរៀបចំយន្តការផ្សេងៗ ដើម្បីពង្រីកទីផ្សារត្រីនៅកម្ពុជាជូនកសិករផងដែរ។
ដោយឡែក ទាក់ទងនឹងការស្នើឲ្យបិទការនាំចូលត្រីវិញ ឯកឧត្តមវេង សាខុន បានគូសបញ្ជាក់ថា «យើងគួរតែស្តាប់ការណែនាំរបស់សម្តេចតេជោ នាយករដ្ឋមន្រ្តី គឺមិនឲ្យយើងទប់ស្កាត់ការនាំចូលបាននោះទេ ទន្ទឹមនឹងនេះ ប្រសិនបើយើងយកជម្រើសកាត់បន្ថយការនាំចូលយ៉ាងណាក៏ដោយ យើងមិនអាចធ្វើបានដែរ ព្រោះក្រសួងមិនអាចឈរជើងនៅព្រំដែនក្នុងការពិនិត្យបរិមាណនាំចូល បានត្រឹមត្រួវដែរ»។
None
