តើការបិទខេត្តព្រះសីហនុនឹងធ្វើឲ្យប៉ះពាល់ដល់សកម្មភាពសេដ្ឋកិច្ចក្នុងខេត្តនេះ កម្រិតណា?
ឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានលើកឡើងថា ការបិទការចេញ-ចូលខេត្តព្រះសីហនុលើការធ្វើដំណើររបស់ប្រជាពលរដ្ឋ ពិតណាស់ ចង់ឬមិនចង់វាត្រូវតែរងផលប៉ះពាល់តិចតួច ប៉ុន្ដែមិនប៉ះពាល់ខ្លាំងដល់ការធ្វើអាជីវកម្ម ឬការដឹកទំនិញទ្រង់ទ្រាយធំនោះទេ។ ប៉ុន្តែ វាអាចជះឥទ្ធិពលមិនល្អខ្លះៗដល់ការប្រកបរបរ ឬធ្វើអាជីវកម្មលក្ខណៈតូចតាចរបស់ប្រជាពលរដ្ឋ ជាពិសេសអ្នកប្រកបរបរលើវិស័យទេសចរណ៍តែម្ដង។
យ៉ាងណាក៏ដោយចុះ លោក ឃាង ភារម្យ អ្នកនាំពាក្យខេត្តព្រះសីហនុបានអះអាងថា សកម្មភាពធ្វើចរាចរណ៍ក្នុងមូលដ្ឋាន និងការធ្វើអាជីវកម្មក្នុងខេត្តព្រះសីហនុ នៅដំណើរការធម្មតា។ ប៉ុន្តែជារួម លោកបានកត់សម្គាល់ឃើញថា ខេត្តព្រះសីហនុ ហាក់បីដូចជាមានសភាពស្ងប់ស្ងាត់ក្នុងរយៈពេលប៉ុន្មានថ្ងៃចុងក្រោយនេះ បើប្រៀបធៀបនឹងថ្ងៃធម្មតាមិនទាន់ប្រកាសបិទចេញចូល។
អត្ថបទទាក់ទង!
ទោះជាបែបនេះក្ដី អ្នកនាំពាក្យខេត្តព្រះសីហនុរូបនេះ បានចាត់ទុក ភាពស្ងប់ស្ងាត់ ជាកត្តាមួយដ៏ល្អ សម្រាប់រដ្ឋបាលខេត្តព្រះសីហនុក្នុងការប្រយុទ្ធប្រឆាំងនឹងជំងឺកូវីដ-១៩ ដែលកំពុងរាតត្បាតក្នុងខេត្តជាប់មាត់សមុទ្រមួយនេះ។ ទន្ទឹមនឹងបិទការចេញចូល រដ្ឋបាលខេត្តព្រះសីហនុ បន្តស្នើពលរដ្ឋឲ្យបន្តអនុវត្តវិធានការការពាររបស់ក្រសួងសុខាភិបាលឲ្យបានម៉ឺងម៉ាត់បំផុត។
ខេត្តព្រះសីហនុ បានក្លាយជាតំបន់ឆ្លងខ្លាំងជាងគេមួយនៅក្នុងព្រឹត្តិការណ៍សហគមន៍២០កុម្ភៈនេះ បន្ទាប់ពីរាជធានីភ្នំពេញ ខណៈដែលចំនួនអ្នកឆ្លងថ្មីៗត្រូវបានរកឃើញនៅក្នុងខេត្តនេះជាបន្ដបន្ទាប់ ហើយអាជ្ញាធរខេត្តក៏បានបិទជាបណ្ដោះអាសន្ននូវទីតាំងពាក់ព័ន្ធជាច្រើនកន្លែងផងដែរ។
គិតមកទល់ព្រឹកថ្ងៃទី ៨ ខែមីនា ឆ្នាំ២០២១ ចំនួនអ្នកឆ្លងក្នុងព្រឹត្តិការណ៍សហគមន៍២០កុម្ភៈសរុបមានចំនួន៥០១នាក់ ក្នុងនោះខេត្តព្រះសីហនុមានចំនួន១១៧នាក់ នៃចំនួនអ្នកឆ្លងសរុបដែលកម្ពុជាបានរកឃើញចំនួន១០១១នាក់ ក្នុងនោះ អ្នកជាសះស្បើយមានចំនួន៥១៧នាក់។
ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា រំពឹងថា សេដ្ឋកិច្ចកម្ពុជាអាចនឹងវិលមករកស្ថានភាពដើមវិញនៅចុងឆ្នាំ២០២១។ ការវាយតម្លៃបែបនេះ ក្រោយពី ឧកញ៉ា លឹម ហេង សង្កេតឃើញថា កម្ពុជាបានចាប់ផ្តើមយុទ្ធនាការចាក់វ៉ាក់សាំងកូវីដ-១៩ ដល់ប្រជាពលរដ្ឋជាបន្តបន្ទាប់កាន់តែច្រើនឡើង ចាប់ពីដើមឆ្នាំនេះតទៅហើយ៕
None
