តើទីផ្សារអចលនទ្រព្យវៀតណាម នឹងងើបឡើងវិញនៅពាក់កណ្តាលឆ្នាំ២០២៤ មែនទេ?

ក្រុមអ្នកជំនាញវៀតណាមបាននិយាយថា ទីផ្សារអចលនទ្រព្យនៅវៀតណាម ដែលជាប្រទេសសង្គមនិយម តែមានសេដ្ឋកិច្ចទីផ្សារសេរី ត្រូវបានរំពឹងថា នឹងចាប់ផ្តើមស្ទុះងើបឡើងវិញនៅអំឡុងពាក់កណ្តាលឆ្នាំ២០២៤។ ប៉ុន្តែសន្ទុះដ៏រឹងមាំ និងប្រកបដោយនិរន្តរភាព នឹងមិនអាចសម្រេចបានរហូតដល់ត្រីមាសទី៣ក្នុងឆ្នាំ២០២៥ ឡើយ។

នៅក្នុងរបាយការណ៍ចុងក្រោយរបស់ខ្លួនស្ដីពីទីផ្សារអចលនទ្រព្យវៀតណាម ក្រុមហ៊ុនបាតដុងសាន (Batdongsan) ដែលជាក្រុមហ៊ុនស្រាវជ្រាវអចលនទ្រព្យ និងវេទិកាទិញ-លក់អចលនទ្រព្យបាននិយាយថា "ចំណុចរបត់" សម្រាប់ទីផ្សារនេះនឹងកើតមានឡើងអំឡុងត្រីមាសទី៣ ឆ្នាំ២០២៤ គឺមិនមែននៅក្នុងត្រីមាសទី២ ដូចដែលបានព្យាករមុននេះឡើយ។

លោក ង្វៀន កុក អាញ់ ( Nguyen Quoc Anh ) អគ្គនាយករងក្រុមហ៊ុននេះបានប្រាប់សារព័ត៌មាន VnExpress ថា ការព្យាករនេះ គឺផ្អែកលើកត្តាជាច្រើនរួមទាំងច្បាប់ថ្មី ដែលទើបចូលជាធរមាន កំណើនសេដ្ឋកិច្ចដែលរំពឹងទុកនៅឆ្នាំក្រោយ និងអារម្មណ៍ផ្ទាល់របស់ពលរដ្ឋផងដែរ។

ដោយឡែក លោក ម៉ៃឃើល កូកាឡារី (Michael Kokalari) អ្នកជំនាញសេដ្ឋកិច្ចនៅក្រុមហ៊ុនគ្រប់គ្រងការវិនិយោគ Vina Capital ក៏ជឿដែរថា ស្ថានភាពនៃវិស័យអចលនទ្រព្យវៀតណាម នឹងប្រសើរឡើងនៅពាក់កណ្តាលឆ្នាំនេះ ។

យ៉ាងណាក៏ដោយបើយោងតាមការិយាល័យស្ថិតិទូទៅរបស់វៀតណាម មានក្រុមហ៊ុនអចលនទ្រព្យប្រមាណ១ពាន់៣រយក្រុមហ៊ុន ត្រូវបានក្ស័យធននៅឆ្នាំ២០២៣ កន្លងទៅ កើនឡើង៨% បើធៀបនឹងឆ្នាំ២០២២។

លោក កាន វ៉ាន់ឡឹក (Can Van Luc) អ្នកជំនាញសេដ្ឋកិច្ចនៅធនាគារ BIDV ក៏បាននិយាយដែរថា ឆ្នាំ២០២៤ នេះនឹងនាំមកនូវឱកាសសម្រាប់ទីផ្សារអចលនទ្រព្យឡើងវិញ។ សម្រាប់អ្នកជំនាញរូបនេះ ការបើកច្រកព្រំដែនរបស់ប្រទេសចិនឡើងវិញ ការផ្លាស់ប្តូរខ្សែសង្វាក់ផ្គត់ផ្គង់ពិភពលោក រំហូរមូលធន និងការជំរុញឱ្យមានហេដ្ឋារចនាសម្ព័ន្ធ និងកម្មវិធីស្តារសេដ្ឋកិច្ចសង្គមក៏ដូចជាកម្មវិធីអភិវឌ្ឍន៍បន្ថែមទៀត វានឹងជួយជំរុញកំណើនសេដ្ឋកិច្ចរបស់ប្រទេសវៀតណាមឱ្យមានការកើនឡើង។

អ្នកជំនាញរូបនេះជឿជាក់ថា អតិផរណា និងបំណុលស្អុយ ឬបំណុលពិបាកទារនៅប្រទេសវៀតណាមស្ថិតក្រោមការគ្រប់គ្រងបាន វានឹងជួយទាក់ទាញរំហូរមូលធនចូលទៅក្នុងទីផ្សារលំនៅឋានបន្ថែមទៀត។ ហើយការណ៍នេះ វាក៏កំពុងធ្វើឱ្យប្រសើរឡើងនូវការធ្វើផែនការ និងហេដ្ឋារចនាសម្ព័ន្ធ ព្រមទាំងក្របខ័ណ្ឌច្បាប់សម្រាប់ទីផ្សារផងដែរ៕

ដោយៈ សរ សុជាតិ