ដើម្បីឆ្លើយតបទៅនឹង ការកើនឡើងដ៏សម្បើមនេះ កម្ពុជា ត្រូវធ្វើការវិនិយោគបន្ថែមលើ ការពង្រីកខ្សែបណ្តាញបញ្ជូនអគ្គិសនី និងពង្រឹងសមត្ថភាពផលិតថាមពលបន្ថែម ជាពិសេសគឺ ការផ្លាស់ប្តូររបៀបរបបគ្រប់គ្រងថាមពលទាំងអស់នោះ។
លោកស្រី ខត់នី វ៉េតធើប៊ី អ្នកឯកទេសសិក្សាស្រាវជ្រាវវិស័យថាមពលក្នុងតំបន់អាស៊ីអាគ្នេយ៍នៃមជ្ឍមណ្ឌល ស្ទីមសាន់ ដែលមានមូលដ្ឋាននៅទីក្រុងវ៉ាស៊ីនតោន ឌី ស៊ី សហរដ្ឋអាមេរិក បានពន្យល់ឲ្យដឹងថា ដោយសារតែ ប្រទេសកម្ពុជា កាន់តែអភិវឌ្ឍន៍ទៅមុខ ចំនួនប្រជាជន ចាប់ផ្តើមចូលមករស់នៅក្នុងទីក្រុង ហើយពួកគេប្រើប្រាស់ឧបករណ៍ទំនើបៗ ដូចជាម៉ាស៊ីនត្រជាក់ ទូរទឹកកក ដែលត្រូវការថាមពលបន្ថែម ដូច្នេះហើយ វាបានធ្វើឲ្យ កម្ពុជា ត្រូវការថាមពលបន្ថែមខ្ពស់ លើសពី តម្រូវការជាមធ្យមរបស់បណ្តាប្រទេសក្នុងតំបន់ បើសិនគិតពី កំណើននៃតម្រូវការថាមពលរបស់កម្ពុជា គឺមានការកើនឡើងប្រមាណ ១០% ទៅ ២០% ជារៀងរាល់ឆ្នាំ។
អត្ថបទទាក់ទង!
លោកស្រី ខត់នី វ៉េតធើប៊ី បន្តថា ដើម្បីឆ្លើយតបទៅនឹង តម្រូវការថាមពលបន្ថែមដ៏ច្រើននេះ ប្រទេសកម្ពុជា ត្រូវការធ្វើពិពិធកម្មនៃប្រភពថាមពល មានន័យថា កម្ពុជា ត្រូវការទាញយកថាមពលពី ប្រភពផ្សេងៗចម្រុះគ្នា ពីព្រោះបច្ចុប្បន្ន កម្ពុជា ពឹងផ្អែកខ្លាំងទៅលើ ប្រភពវារីអគ្គិសនី រហូតដល់ទៅ ៦៦% ឯណោះ ដែលមានហានិភ័យខ្ពស់ណាស់។
លោកស្រី ខត់នី វ៉េតធើប៊ី បង្ហាញការយល់ឃើញថា ការវិនិយោគលើ ថាមពលសូឡា នៅកម្ពុជា គឺជាជម្រើសល្អបំផុត ផ្អែកលើ ហេតុផលសំខាន់ ៣ ដូចជា ភូមិសាស្រ្តដ៏មានសក្តានុពលរបស់កម្ពុជា ការចំណាយទុន និងការចំណាយពេលដំឡើងប្រព័ន្ធសូឡា គឺមានលក្ខណៈប្រសើរជាង ជម្រើសដទៃ។
សូមបញ្ជាក់ផងដែរថា បើតាមការអះអាងរបស់អ្នកជំនាញរូបនេះ គឺថា ប្រទេសកម្ពុជា មានសក្តានុពលខ្ពស់ណាស់ ក្នុងការបង្កើតថាមពលកកើតឡើងវិញ ពីព្រោះ កម្ពុជា អាចបង្កើតវាបាន ដោយមិនចាំបាច់ប្រើប្រាស់បច្ចេកវិទ្យាទំនើបពេកនោះទេ ហើយ កម្ពុជា អាចមានសមត្ថភាពបង្កើតថាមពលទាំង ២ប្រភេទ ដែលរួមមាន ថាមពលប្រើប្រាស់ជាប្រចាំ ដូចជា ថាមពលមកពី ធ្យូងថ្ម ឧស្ម័នធម្មជាតិ វារីអគ្គិសនី និងថាមពលប្រើប្រាស់ចាំបាច់ ដូចជា ថាមពលសូឡា និងខ្យល់ ដែលអាចបើកឲ្យដំណើរការបាន នៅពេលដែលមានតម្រូវការប្រើប្រាស់អគ្គិសនីខ្ពស់ នៅទូទាំងប្រទេស៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
