នាយកដ្ឋានពន្ធដារក្រុងហាណូយ កាលពីពេលថ្មីៗនេះបានលាតត្រដាងពីបុគ្គលចំនួន២រូប ដែលបានបំពេញបែបបទប្រកាសពន្ធលើប្រាក់ចំណូលរបស់ពួកគេដែលរកបានរាប់លានដុល្លារអាមេរិក។
ទី១ គឺស្ត្រីវ័យក្មេងអាយុ ២៨ឆ្នាំ មួយរូបដែលរស់នៅក្នុងសង្កាត់ Cau Giay បានប្រកាសពីប្រាក់ចំណូលរបស់គាត់ប្រមាណជាង១៤លានដុល្លារអាមេរិក នៅក្នុងឆ្នាំ២០២០ ដែលរកបានពីការសរសេរកម្មវិធីសម្រាប់ប្រើលើទូរស័ព្ទស្មាតហ្វូន និងលក់ទៅឲ្យ Google Play និង App Store ហើយនាងក៏បានបង់ពន្ធប្រមាណ ១លានដុល្លារចូលរដ្ឋផងដែរ។
បុរសវ័យ៣០ឆ្នាំម្នាក់ទៀត រស់នៅសង្កាត់ជាមួយគ្នានឹងស្ត្រីខាងលើនេះដែរ បានប្រកាសពីប្រាក់ចំណូលរបស់ខ្លួនជាង ១១លានដុល្លារអាមេរិក ពីការលក់កម្មវិធីកុំព្យូទ័រ ទៅឲ្យអតិថិជននៅទូទាំងពិភពលោក ដោយបុរសម្នាក់នេះ បានបង់ពន្ធចូលរដ្ឋប្រមាណ ៧៨ម៉ឺនដុល្លារអាមេរិក។
អត្ថបទទាក់ទង!
ពួកគាត់ទាំងពីរនាក់នេះ បានបង់ពន្ធអត្រាអប្បរមា ៧% នៃប្រាក់ចំណូលដុលដែលរកបាន VAT ៥% និង ២% ពន្ធលើប្រាក់ចំណូលផ្ទាល់ខ្លួន។
បើតាមការប្រធានការិយាល័យពន្ធដារសង្កាត់ Cau Gaiy បានឲ្យដឹងថា នៅក្នុងសង្កាត់នេះ មានអ្នកដែលកំពុងរកចំណូលពីការធ្វើអាជីវកម្មបែបអនឡាញនេះ ចំនួន ៦៥នាក់ នឹងបានបង់ពន្ធប្រមាណជាង ២,៣លានដុល្លារនៅឆ្នាំ២០២០។
មិនមែនមានតែប្រភពចំណូលអនឡាញពី Google, Facebook និង Youtube នោះទេ ដែលជាប្រភពចំណូលធំ គេសង្កេតឃើញថា ការផលិតហ្គេមក៏ជាប្រភពចំណូលធំមួយដែរ។ អ្នកអភិវឌ្ឍហ្គេមម្នាក់ គឺលោក Nguyen Ha Dong ដែលផលិតហ្គេម Flappy Bird មានអ្នកទាញយកហ្គេមនេះទៅលេងរហូតដល់ ៥០លានដង នៅលើទូរស័ព្ទ នៅក្នុងរយៈពេលត្រឹមតែ៧ខែប៉ុណ្ណោះបន្ទាប់ពីហ្គេមនេះបានចេញ។
អត្ថបទគួរអាន!
លោក Dong និយាយថា បានរកចំណូលប្រមាណ៥ម៉ឺនដុល្លារអាមេរិកក្នុងមួយថ្ងៃ ចន្លោះពីខែឧសភា ឆ្នាំ២០១៣ ដល់ខែ មករា ឆ្នាំ២០១៤ ពីការផ្សាយពាណិជ្ជកម្ម ដែលចំណូលនេះស្មើនឹងប្រមាណ ១៣លានដុល្លារក្នុងមួយឆ្នាំ។
តំណាងក្រុមហ៊ុន Facebook នៅវៀតណាម លោក Huynh Kim Tuoc ធ្លាប់បាននិយាយនៅក្នុងវេទិកាមួយកាលពីឆ្នាំ២០១៧ថា នៅវៀតណាមមានសេដ្ឋីប្រាក់លានដុល្លារប្រមាណ៥០នាក់ កំពុងប្រតិបត្តិការរកចំណូលតាមហ្វេសប៊ុក ដោយពួកគេមានវ័យពី១៩ ទៅ ២០ឆ្នាំ។ ហើយចំនួននេះ ត្រូវបានគេរំពឹងថា អាចនឹងកើនឡើងទ្វេដងបើគិតមកទល់បច្ចុប្បន្ន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
