ប្រទេសអង់គ្លេស គឺជាប្រទេសដំបូងគេនៅអឺរ៉ុប ដែលនឹងអនុញ្ញាតឲ្យពលរដ្ឋរបស់ខ្លួន ដែលមានវិជ្ជមានកូវីដ១៩ អាចដើរហើរបានដោយសេរីនៅក្នុងប្រទេស បើទោះបីជា អ្នកជំនាញផ្នែកសុខាភិបាលជាច្រើននិយាយថា នេះគឺជាហានិភ័យខ្ពស់ក៏ដោយ។
លោកបូរីស ចនសុន បាននិយាយនៅក្នុងសេចក្ដីថ្លែងការណ៍ថា កូវីដ១៩ នឹងមិនរលាយបាត់ពីភពផែនដីឆាប់ៗនេះនោះទេ ហើយអង់គ្លេសត្រូវការរៀនរស់នៅជាមួយនឹងមេរោគនេះ និងបន្ដការពារខ្លួនឯងឲ្យបានល្អ ដោយមិនមានការរិតត្បិតសិទ្ធិសេរីភាពនោះឡើយ។
បច្ចុប្បន្ន ប្រជាជននៅអង់គ្លេស នៅមានការតម្រូវតាមច្បាប់ឲ្យធ្វើចត្តាឡីស័កតែត្រឹមរយៈពេល ៥ថ្ងៃប៉ុណ្ណោះ ប្រសិនបើមានការណែនាំដោយមន្ត្រីសុខភាពសាធារណៈ ហើយពួកគេត្រូវបានណែនាំឲ្យធ្វើចត្តាឡីស័ក ដោយគ្មានបទបញ្ជាជាក់លាក់នោះទេ បើទោះបីជា មានចេញរោគសញ្ញា ឬតេស្ដឃើញវិជ្ជមានកូវីដ១៩ក៏ដោយ។
អត្ថបទគួរអាន
បច្ចុប្បន្ន មានប្រជាជនអង់គ្លេសចាប់ពីអាយុ១២ឆ្នាំឡើងទៅ ប្រហែល៨៥%ហើយ បានទទួលការចាក់វ៉ាក់សាំងចំនួន២ដូស គឺមានប្រហែល២ភាគ៣ នៃចំនួនប្រជាជនសរុប ខណៈដែលអ្នកប្រឈមនឹងការឆ្លងខ្ពស់ក៏បានទទួលការចាក់ដូសទី៣ផងដែរ។ អង់គ្លេសមានអ្នកឆ្លងកូវីដ១៩សរុបគិតមកទល់ពេលនេះមានជង ១៨លាននាក់ និងមានអ្នកស្លាប់សរុបជាង ១៦ម៉ឺននាក់ ដែលជាចំនួនខ្ពស់បំផុតលំដាប់ទី២ នៅអឺរ៉ុប ហើយនៅប៉ុន្មានថ្ងៃចុងក្រោយនេះ ប្រទេសនេះ មានករណីឆ្លងថ្មីប្រចាំថ្ងៃចន្លោះពី ៣ ទៅ៥ម៉ឺននាក់ក្នុងមួយថ្ងៃ។
គួរបញ្ជាក់ថា បច្ចុប្បន្ន ប្រទេសជាច្រើនបានចាប់ផ្ដើមរៀនរស់នៅជាមួយកូវីដ១៩ និងបន្ធូរបន្ថយការរឹតត្បិតជាបន្ដបន្ទាប់ លែងមានការបិទខ្ទប់តឹងរ៉ឹងតតទៅ ដើម្បីជំរុញសកម្មភាពសេដ្ឋកិច្ច និងសង្គម ប៉ុន្ដែ លើកលែងតែប្រទេសចិនប៉ុណ្ណោះ ដែលបច្ចុប្បន្ន កំពុងបន្ដគោលនយោបាយគ្មានកូវីដ ដ៏តឹងរ៉ឹងរបស់ខ្លួន មិនមានការលើកលែងនោះឡើយ។ ទោះយ៉ាងណា ចិននៅតែបន្ដមានរកឃើញអ្នកឆ្លងកូវីដ១៩ប្រចាំថ្ងៃ បើទោះបីជាក្នុងចំនួនតិចតួចជាងគេក៏ដោយ៕
None
