ការថ្លែងរបស់ប្រមុខដឹកនាំកម្ពុជា បែបនេះ បានធ្វើឡើងនាឱកាសសម្ដេចអញ្ជើញចូលរួមសម្ពោធដាក់ឱ្យប្រើប្រាស់កំណាត់ផ្លូវជាតិលេខ៥ ពីខេត្តបាត់ដំបង ទៅខេត្តបន្ទាយមានជ័យ នៅថ្ងៃទី១០ ខែមករា ឆ្នាំ២០២២។
យ៉ាងណាមិញ បើតាមការបញ្ជាក់របស់សម្ដេចតេជោ ហ៊ុន សែននៅក្នុងសារសំឡេង នៅថ្ងៃទី ១១ ខែមករា កម្ពុជា បានរកឃើញមេរោគបំប្លែងថ្មី«អូមីក្រុង» ១០ករណីបន្ថែមឆ្លងចូលក្នុងសហគមន៍ ដែលធ្វើឱ្យករណីអូមីក្រុងក្នុងសហគមន៍កើនដល់១៤ករណីហើយ។
បើតាមសម្ដេចបានសង្កត់ធ្ងន់ថា ការពន្លឿនការចាក់វ៉ាក់សាំងដូសទី៣ ឬដូសជំរុញ នៅតាមបណ្ដាខេត្តទាំងអស់គឺជាអាទិភាពចម្បងបំផុត ក្នុងការទប់ស្កាត់ការឆ្លងរាលដាលជំងឺកូវីដ-១៩។ ក៏ប៉ុន្តែ យ៉ាងណាក៏ដោយ សម្ដេច ហ៊ុន សែន ក៏បានក្រើនរំលឹកឱ្យប្រជាពលរដ្ឋទាំងអស់ប្រកាន់ឲ្យបានខ្ជាប់ខ្ជួននូវវិធានការរបស់ក្រសួងសុខាភិបាល ពិសេសចាប់ផ្ដើមយុទ្ធនាការចាក់វ៉ាក់សាំងដូសទី៤ ដោយក្រសួងសុខាភិបាល បានជ្រើសយកវ៉ាក់សាំងប្រទេស Pfizer សម្រាប់ចាក់ដូសទី៤ និងបានកំណត់ រាជធានីភ្នំពេញ គឺជាគោលដៅដំបូងគេ។
អត្ថបទគួរអាន
បើតាមសម្ដេច ហ៊ុន សែន បច្ចុប្បន្ន កម្ពុជា នៅមានវ៉ាក់សាំងក្នុងស្តុកចំនួន១០លានដូស ក៏ពិតមែន ប៉ុន្តែ ដើម្បីបំពេញតម្រូវការ ក៏ដូចជាជំរុញការចាក់វ៉ាក់សាំងជូនពលរដ្ឋ ជាបន្តបន្ទាប់ សម្ដេចក៏បានបញ្ជាឱ្យទិញវ៉ាក់សាំងកូវីដ-១៩ ចំនួន៥លានដូសបន្ថែម ក្នុងគោលបំណងឱ្យពលរដ្ឋកម្ពុជា មានសិទ្ធិទទួលបានវ៉ាក់សាំងដូសទី៣ ឬដូសជំរុញ គ្រប់ៗគ្នា។ នាយករដ្ឋមន្ត្រីនៃកម្ពុជា ក៏បានស្នើឱ្យគ្រប់បណ្ដាខេត្តទាំងអស់ ខិតខំជំរុញល្បឿននៃការចាក់វ៉ាក់សាំងដូសទី៣ ឱ្យបានលឿនតាមដែលអាចធ្វើទៅបាន ខណៈដែលកម្ពុជា បាននិងកំពុងមានការវាយលុកដោយមេរោគបំលែងថ្មី អូមីក្រុង។ សរុបមកទល់ថ្ងៃទី១០ខែមករា កម្ពុជារកឃើញករណីឆ្លងកូវីដ១៩បំប្លែងថ្មីអូមីក្រុងប្រមាណ ២០០ករណីហើយ ក្នុងនោះ ដែលភាគច្រើនជាករណីនាំចូល និងមាន៤ករណី ជាករណីឆ្លងចូលសហគមន៍។
បើតាមរបាយការណ៍របស់ក្រសួងសុខាភិបាល បច្ចុប្បន្ន មានប្រជាជនកម្ពុជាទូទៅ ជាង ១៤លាននាក់ហើយ ដែលបានចាក់វ៉ាក់សាំងកូវីដ-១៩ ក្នុងចំណោមប្រជាជនសរុប ១៦លាននាក់។ ដោយឡែក គិតត្រឹមថ្ងៃទី១០ ខែមករា កម្ពុជា បានរកឃើញអ្នកឆ្លងកូវីដ-១៩ សរុបប្រមាណ ១២ម៉ឺននាក់ ខណៈអ្នកស្លាប់មានប្រមាណ ៣ពាន់នាក់៕
None
