ក្នុងចំណោមក្រុមហ៊ុនជាង ៥០ នោះ ក៏មានក្រុមហ៊ុនបច្ចេកវិទ្យាធំៗរបស់អាមេរិក ដូចជា Apple, HP និងDell រួមទាំងក្រុមហ៊ុនជប៉ុន Nintedo ផងដែរ កំពុងពន្លឿនការរើចំណែកនៃផលិតកម្មរបស់ខ្លួនចេញពីប្រទេសចិន។ នេះបើតាមការចុះផ្សាយដោយសារព័ត៌មានជប៉ុនធំមួយ គឺ Nikkei Asian Review។
សង្គ្រាមពាណិជ្ជកម្មអាមេរិក និងចិន បានអូសបន្លាយមកជាង ១ឆ្នាំមកហើយ ដោយកន្លងមក អាមេរិកបានដំឡើងពន្ធគយ ២៥%សម្រាប់ទំនិញចិនតម្លៃ២០០ ពាន់លានដុល្លារអាមេរិក។ មកទល់នឹងពេលនេះ នៅមិនទាន់មានកិច្ចព្រមព្រៀងណាមួយត្រូវបានសម្រេចជាផ្លែផ្កាដោយភាគីទាំងពីរ ក្នុងការឆ្ពោះទៅរកការបញ្ចប់សង្គ្រាមជាផ្លូវការ នៅឡើយទេ។ ប៉ុន្ដែ ប្រធានាធិបតីអាមេរិក លោក ដូណាល់ ត្រាំ នៅតែបន្តគំរាមកំហែងជាថ្មី ក្នុងការដំឡើងពន្ធគយលើមុខទំនិញចិនប្រមាណ ៣២៥ ពាន់លានដុល្លារអាមេរិកបន្ថែមទៀត។
អត្ថបទទាក់ទង!
ដោយសារតែស្ថានការណ៍ នៃសង្គ្រាមនៅតែមានកម្ដៅ និងអាចឆេះឆួលខ្លាំងឡើង ពិបាកប៉ាន់ស្មានទុកមុននោះ មានក្រុមហ៊ុនកាន់តែច្រើនឡើងនៅប្រទេសចិន រួមទាំងក្រុមហ៊ុនអន្តរជាតិ និងក្រុមហ៊ុនចិនក្នុងស្រុកផង កំពុងពិចារណាផ្លាស់ប្តូររោងចក្រផលិតចេញពីប្រទេសចិនទៅរកប្រទេសដែលមិនជាប់ការដំឡើងពន្ធគយអាមេរិក។
ក្រុមហ៊ុនផលិតកុំព្យូទ័រអាមេរិក HP និង Dell អាចនឹងរើផលិតកម្មប្រមាណ ៣០% នៃការផលិតកុំព្យទ័រ Notebook របស់ខ្លួនចេញពីប្រទេសចិន ទៅកាន់ប្រទេសក្នុងតំបន់អាស៊ីអាគ្នេយ៍វិញ នេះបើតាមការរាយការណ៍របស់សារព័ត៌មានជប៉ុន Nikkei។ ជាមួយគ្នានេះ ក្រុមហ៊ុន Apple ក៏បានស្នើដល់ដៃគូផ្គត់ផ្គង់ធំៗរបស់ខ្លួន ឲ្យគិតគូរពីផលប៉ះពាល់នៃតម្លៃផលិតផល ដោយក្រុមហ៊ុននេះ ចង់ឲ្យមានការរើផលិតកម្មពី១៥ ទៅ៣០% ចេញពីប្រទេសចិន ទៅកាន់ប្រទេសឥណ្ឌាវិញ។
មិនតែប៉ុណ្ណោះ ថ្មីៗនេះដែរ ក្រុមហ៊ុន GoerTek ដែលជារោងចក្រសំខាន់មួយសម្រាប់ផ្គត់ផ្គង់ផលិតផលឲ្យ ក្រុមហ៊ុន Apple នោះ បានប្រកាសថា នឹងចាប់ផ្ដើមដំណើរការសាកល្បងរោងចក្រផលិតកាសស្ដាប់ត្រចៀកឥតខ្សែ Airpods នៅក្នុងប្រទេសវៀតណាម ដែលវាគឺជាកាត់មូលដ្ឋានផលិតចេញពីប្រទេសចិន។
ក្រុមហ៊ុនជប៉ុន Nintedo ក៏នឹងទាញចំណែកនៃការផលិតវីដេអូហ្គេមរបស់ខ្លួន ចេញពីប្រទេសចិន ទៅកាន់ប្រទេសវៀតណាមផងដែរ។ នេះបើតាមការបញ្ជាក់របស់ សារព័ត៌មាន Nikkei ដដែល។
ប្រភពព័ត៌មានដដែលបានឲ្យដឹងទៀតថា មិនមែនតែក្រុមហ៊ុនបរទេសនោះទេ ដែលបាននិងកំពុងគិតគូរើទីតាំងផលិតកម្មចេញពីប្រទេសចិន ប៉ុន្ដែក៏មានក្រុមហ៊ុនក្នុងស្រុករបស់ចិនមួយចំនួន នឹងត្រៀមរើចេញពីប្រទេសចិនផងដែរ។ តួយ៉ាង ក្រុមហ៊ុនផលិតគ្រឿងអេឡិចត្រូនិកចិន TCL នឹងរើការផលិតទូរទស្សន៍របស់ខ្លួនទៅកាន់ប្រទេសវៀតណាមដែរ ខណៈដែលក្រុមហ៊ុនផលិតសម្បកកង់រថយន្ដចិន Sailun Tire ក៏នឹងប្តូរខ្សែច្រវាក់ផលិតកម្មពីប្រទេសចិនទៅកាន់ ប្រទេសថៃផងដែរ។
ការអូសបន្លាយនៃសង្គ្រាមពាណិជ្ជកម្មអាមេរិក និងចិនហាក់កំពុងធ្វើឲ្យប៉ះពាល់ដល់សេដ្ឋកិច្ចចិន គួរឲ្យកត់សម្គាល់។ តាមរបាយការណ៍មួយ ដែលផ្សាយដោយសារព័ត៌មាន CNBC បញ្ជាក់ថា សេដ្ឋកិច្ចចិនបង្ហាញពីកំណើនយឺត ដែលមានប្រមាណ ៦,២% ប៉ុណ្ណោះ នៅត្រីមាសទី២ឆ្នាំនេះ ដែលវាជាកំណើនមួយស្ថិតក្នុងសភាពខ្សោយខ្លាំង គិតត្រឹម២៧ឆ្នាំចុងក្រោយនេះ។
លោកដូណាល់ ត្រាំ បានចាត់ទុកថា កំណើនយឺតនៃសេដ្ឋកិច្ចចិននាពេលនេះ គឺជាភ័ស្ដុតាងបញ្ជាក់ថា ចិនគឺកំពុងចាញ់ក្នុងសង្គ្រាមពាណិជ្ជកម្មនេះ ខណៈដែលប្រទេសចិនប្រឈមនឹងការចាកចេញរបស់ក្រុមហ៊ុនផលិតធំៗកាន់តែច្រើន។
អត្ថបទគួរឲ្យចាប់អារម្មណ៍!
លោកត្រាំ បាននិយាយនៅក្នុង Twitterរបស់ខ្លួនកាលពីថ្ងៃចន្ទ ទី១៥ កក្កដានេះថា «ពន្ធគយរបស់សហរដ្ឋអាមេរិក កំពុងមានប្រសិទ្ធភាពខ្លាំងក្លា ទៅលើក្រុមហ៊ុនដែលកំពុងចង់ចាកចេញពីប្រទេសចិនទៅរកប្រទេសដែលមិនមានរបាំងពន្ធគយនេះ។ មានក្រុមហ៊ុនរាប់ពាន់កំពុងចាកចេញ។ នេះ គឺជាមូលហេតុ ដែលប្រទេសចិនចង់បង្កើតកិច្ចព្រមព្រៀង [កិច្ចព្រមព្រៀងជាមួយសហរដ្ឋអាមេរិក]»៕.
None
